Loman 8 - Chahta Holisso Holitopa 1886

¹ Yʋmohmi hoka Klaist Chisʋs ibai achʋfa, haknip nan ai ahni kak o̱ yʋmohmi keyu, amba Shilombish nan ai ahni kak o̱ iakaiya ʋhleha hokʋno himonasi ka isht ai i̱ palʋmma he anumpa hʋt im ʋlhpisa keyu hoke.

² Yʋmohmi ka isht ai okcha̱ya Shilombish nan ai ahni Klaist Chisʋs a minti kak osh ai ashʋchika nan ai ahni isht ai illi yo̱ a sa hlakofichi hatok oke.

³ Yohmi ka ʋba nan ʋlhpisa yʋt nana ka ik atahlo kʋt, haknip ak atuk pulla kak o̱ ik ai a̱hlo hatuk o̱, Chihowa hʋt ilap Ushi ak inli ho̱ ai ashʋchika isht ʋlhtoba mak o̱ hatak nan ashʋchi haknip a̱ hobachit auet kanchi hosh, haknip ak o̱ ai ashʋchika ya̱ ai i̱ palʋmminchi tok:

⁴ Yohmi ho̱ pishno yokʋno haknip nan ai ahni ka e yʋmoho̱mi keyu, amba Shilombish nan ai ahni kak o̱ il iakaiya kak osh, ʋba nan ʋlhpisa isht ai ʋlhpiesa kʋt pim ai a̱hla he atok oke.

⁵ Yohmi ka haknip nan ai ahni kak o̱ iakaiya hokʋto, nana puta haknip immi hak o̱ i̱ hullot anukfihinli chatuk: amba Shilombish nan ai ahni kak o̱ iakaiya hokʋto, nana puta Shilombish immi hak o̱ i̱ hullot anukfihinli chatuk oke.

⁶ Yohmi ka haknip nan ai ahni kak o̱ isht ahanta hokʋto isht ai illi yoke; amba Shilombish nan ai ahni kak o̱ isht ahanta hokʋto isht ai okcha̱ya, micha isht it i̱ nanaiya yoke:

⁷ Haknip nan ai ahni kak o̱ isht ahanta hokʋto Chihowa i̱ nukkilli yoka; yohmi kʋt Chihowa i̱ nan ʋlhpisa ya̱ im antia keyu, micha yohma hi o̱ keyu kamohmi mʋhlishke.

⁸ Yakohmi hoka haknip nan ai ahni kak o̱ i̱ nutakʋt ahanta hokʋto Chihowa ya̱ yukpala himma keyushke.

⁹ Amba haknip nan ai ahni kak o̱ i̱ nutakʋt hʋsh ahanta keyu, amba Shilombish nan ai ahni kak o̱ i̱ nutakʋt hʋsh ahanta hoke; Chihowa imi Shilombish ak osh hʋchi anukfoyuka ho mʋhli hokmʋt. Yohmi ka hatak nana hosh Klaist imi Shilombish a̱ i̱shi keyu hohmʋt, immi ho̱ keyu hoke.

¹⁰ Micha Klaist ak osh hʋchi foyuka hokma, hʋchi haknip okʋto ai ashʋchika yak atuk pulla kak o̱ illi hoke: amba hʋchi shilombish okʋto nan isht ai ʋlhpiesa pulla kak o̱ okcha̱ya hoke.

¹¹ Amba Chisʋs ʋt illi tuk a̱ falaminchit tanichi tok imi Shilombish ak osh hʋchi anukfoyuka hokmʋt, Klaist ʋt illi tuk a̱ falaminchit tanichi hatok ak osh hʋchi haknip illi im ʋlhtayak ilap imi Shilombish hʋchi anukfoyuka kak o̱ isht okchalinchi ak inla hi oke.

¹² Yʋmohmi ka itibapishi li ʋhleha ma! nan aheka ʋhleha pia kʋt haknip nan ai ahni kak o̱ il im aheka yosh haknip nan ai ahni kak o̱ il iakaiya hi o̱ keyu hoke.

¹³ Yohmi ka haknip nan ai ahni kak o̱ hʋsh iakaiya hokmʋto, hʋch illa hi oke; amba Shilombish ak atuk pulla kak o̱ haknip nan a kaniohmi puta ka hʋsh illihinchi hokmʋto, hʋchi okcha̱ya hi oke.

¹⁴ Yohmi ka laua kaniohmi ho̱ Chihowa imi Shilombish ak osh anukfohkit isht a̱ya hokʋno, Chihowa ak o̱ ushi ʋhleha hoke.

¹⁵ Yohmi ka anonti isht a hʋchi nukshopa chi̱ hosh yuka im anukfila ho̱ hʋsh ishi hatok keyu; amba ʋlla im anukfila ho̱ hʋsh ishi hatok ak o̱, pishno ʋt Abba, Pi̱ki, il achishke.

¹⁶ Shilombish Holitopa ak inli hosh pimi shilombish a̱ nan isht atokowa it ibai anohonli kʋt, Chihowa im ʋlla ʋhleha pia ka anolishke,

¹⁷ Micha im ʋlla pia hokmʋt, isha he ai ʋlhpiesa pia: micha Chihowa yak o̱ im ai isha he ʋlhpiesa pia, micha Klaist ak o̱ it ibai isha he ai ʋlhpiesa pia hoke: yohmi ka il ibai ilbʋsha ho mʋhli hok mak osh il iba holitopa hi atok.

¹⁸ Yohmi ka yakni paknaka ilʋppa nan isht ai ilbʋsha puta hokʋto nan isht a holitopa pim otaiyana hi a̱ pit it ʋlhpisa hi a̱ ik ono, ai ahni lishke,

¹⁹ Nana toba tok puta hokʋto Chihowa ushi ʋhleha hʋt isht otaiyana hi ak o̱ pit hoho̱yo fehna hosh ai asha hoke.

²⁰ Nana toba tok puta hokʋto ʋlhpesa ik ahno kia, isht ai illa hi ʋt im ʋlhpisa tok: yohmi kia isht ai illa he im apesa kʋt, isht a hlakofa he ahna hi a̱ nukfo̱kit yʋmihchi tok.

²¹ Yohmi hoka nana toba tok ash puta kʋt isht ai illa he i̱ yuka hatuk ʋt ai i̱ hlakofi cha, Chihowa im ʋlla ʋhleha hʋt yuka keyut isht a holitopa yʋt immi ak inla hi oke.

²² Yohmi ka nana toba tok puta moyuma kʋt it ibai hi̱hi̱hʋt, it ibai ilbaha̱sha na himak a̱ hoka, il ithaiyanʋshke.

²³ Micha yʋmmak illa ho̱ keyu, amba pishno ak kia Shilombish isht ai ʋni waya ʋmmona ka il ishi kʋt, pishno ak kia e hi̱hi̱ha kʋt ʋlla ai a̱hli e toba he, yʋmmʋt pi haknip isht a hlakofi yak o̱ e hoho̱yo hoke,

²⁴ Yohmi ka nana kʋt pim ʋlhtaha tok ʋt il isha he il ai ahni kak osh isht ai okcha̱yʋt il ahanta hoke: amba nana ka il i̱shi hokʋto, himmak o̱ il isha he il ahna he keyu hoka: yohmi ka katiohmit hatak ʋt nana ka i̱shi kʋt himmak o̱ ishi la hi oka, ahni ho̱?

²⁵ Amba nana ka e pi̱sa keyu hosh il isha chi̱, il ai ahni hok mak osh nuktaiyalʋt achunanchit e hoho̱yo hoke.

²⁶ Yʋmmak i̱ chiyuhmit Shilombish ak kia ik a pi hlampko puta ka pi apelahanchi fehna hoke: nana ka il asilhha he tuk ai ʋlhpiesa kʋt pishno ak inli kʋt il ithana keyu hoka; amba Shilombish ash inli hosh isht a hi̱hi̱ha isht anumpa he keyu puta kak o̱ pi anukfokihinchi hoke.

²⁷ Yohmi kia chu̱kʋsh puta silhhit akostininchi yak okʋto Shilombish ʋt nana ho̱ pi anukfokihinchi ka ithana hoke: Chihowa nan ai ahni kak o̱ Shilombish ash ot ʋbanumpuli a̱hli puta ka nana ka anukfokihinchi hokʋt.

²⁸ Yohmi ka nan oklu̱ha hokʋt Chihowa i̱ hullo ʋhleha, ilap nan ai ahni tok pulla mak o̱ ʋlhtoho̱ka tok ʋhleha hokʋto, isht im ai achukma he mak o̱ it ibai toksahanli ka il ithaiyanʋshke.

²⁹ Yʋmohmi ka tikbanli ithaiyana tok okʋto ilap Ushi yak o̱ hoyulba he mak o̱ tikbanli atokohonli mak inli tok; yohmi ho̱ yʋmmak ash ot itibapishi laua ka ti̱kba ʋttahpi ha hi atok.

³⁰ Anonti tikbanli atokohonli hatok okʋto hoyo mak inli tok: mihmʋt hoyo hatuk okʋto ai ʋlhpiesʋchi mak inli tok: mihmʋt ai ʋlhpiesʋchi hatuk okʋto ilap isht aholitopa yo̱ ib ai isha he im ai ahni tok.

³¹ Yakohmi kʋno nana ilʋppa puta imma hokʋno nanta hak o̱ il acha hinla ho̱? Chihowa hak osh pi̱ kana hokma, kʋta hosh pi̱ sanala hinla ho̱?

³² Ilap Ushi fehna ka ik ilatombo hosh, amba pishno e moyuma hak atok pulla mak o̱ pim issa tok ʋt, katiohmi ho̱ yʋmma pima hatuk ʋt nan oklu̱ha ka anonti pilla pima ak inla he keyu ho̱?

³³ Kʋta hak osh Chihowa im ʋlhtoka ʋhleha ha̱ isht ai i̱ palʋmmi anumpa kia onocha hinla ho̱? Chihowa ak osh i̱ kashofi hoke.

³⁴ Kʋta hosh nan ʋlhpisa onocha hinla ho? Klaist ak osh illi hatok; a̱hli, yʋmma i̱ shahli, yʋmmak osh falamʋt tani hatok osh Chihowa ibbak isht impak imma yo̱ binilit, yʋmmak osh isht pi anumpohonli hoke.

³⁵ Kʋta hak osh Klaist ʋt pi̱ hullo ka pi̱ filʋmmicha hinla ho̱? Isht ai ilbʋsha, isht a palʋmmi, hatak bi̱ka yʋt pi hotopali, isht a hohchʋfo, haknip bieka, isht ai illa he, keyukmʋt bʋshpo falaia yak a hinla ho̱?

³⁶ Yohma hi o̱ holihi̱so hatok oka, Chishno yak atuk pulla mak o̱ nitak moma ka pihimbi na shohombishke, chukfi ʋlhpoba ʋba chi̱ kak o̱ e chiyuhmi hoke.

³⁷ Yʋmmak illa keyu, nan oklu̱ha ilʋppa puta ka ilap pi̱ hullo tuk pulla kak o̱ im aiyachi yak kia il i̱ shahli hoke.

³⁸ Yohmi ka isht illa he, isht okcha̱ya he, enchil ʋhleha, enchil ʋhleha i̱ shahli, mi̱ko puta, himonasi nana ai asha puta, himak a pilla ai asha he puta;

³⁹ Isht a holitopa fehna, ilbʋsha fehna, keyukmʋt nana toba tok nana kia, pin Chitokaka Chisʋs Klaist ak atuk pulla mak o̱, Chihowa il i̱ hullo ka, pi̱ filʋmmicha himma keyu ka, sai yimmishke.