Loman 7 - Chahta Holisso Holitopa 1886

¹ Itibapishi li ʋhleha ma! nan ʋlhpisa ya̱ ithana ʋhleha hak o̱ im anumpuli lishke; yohmi ka hatak ʋt okcha̱ya ta̱kla ka nan ʋlhpisa yʋt i̱ shaiyahli hoka hʋch ik ithano cho?

² Yohmi ka ohoyo hʋt i̱ hatak a̱shakmʋt, nan ʋlhpisa ya̱ nutaka ahanta hatuk osh, i̱ hatak ʋt okcha̱ya ta̱kla ka i̱ filʋmma he keyu; amba i̱ hatak ak osh illi hok mʋno, i̱ hatak a̱ i̱ filʋmma he keyu nan ʋlhpisa yash o̱ ai i̱ mokofa hoke.

³ Yʋmohmi hatuk o̱ i̱ hatak ʋt okcha̱ya ta̱kla ho̱, hatak inla auwaya hokmʋto, haui hohchifa hi oke; amba i̱ hatak ʋt illi hokmʋno, nan ʋlhpisa yʋmmak ash ai i̱ mokofa hoke; yohmi hokʋt hatak inla yo̱ ik auwaya mak osh haui toba he keyu hoke.

⁴ Yʋmohmi hoka itibapishi li ʋhleha ma! hʋchishno yak kia Chisʋs Klaist haknip atuk pulla mak o̱ nan ʋlhpisa ya̱ hʋsh im illi hoke: yohmi kʋt inla yo̱ hʋsh auwaya kʋt, illi tok ʋt falamʋt tani tok yʋmmak a hi atuk: yohmi hosh Chihowa yoka nan ʋnit hʋsh i̱ waya hi atok.

⁵ Yohmi ka haknip ak o̱ i̱ nutaka hosh il ai asha mʋno, ai ashʋchika anukfila puta kʋt nan ʋlhpisa atuk pulla mak o̱ yʋmohmit, haknip moyuma ka a toksahanli hosh isht illi ya̱ ʋnit waha̱ya tok.

⁶ Amba himonasi kʋno nan ʋlhpisa ya̱ il ai i̱ mokofa kʋt, i̱ nutakʋt il ai asha hatok ʋt il im illi hatuk okʋt; Chihowa ya̱ holisso tikba ya tok ak o̱ isht il a holitobla he atuk keyu, amba shilombish himona yo̱ isht e holitobla he atuk oke,

⁷ Yakohmi hoka nanta hak o̱ il acha hinla ho̱? ʋba nan ʋlhpisa yak osh ai ashʋchika yo̱? ik yʋmohmo pullashke. Keyu, ai ashʋchika ya̱ ak ithano ke tuk osh, amba ʋba nan ʋlhpisa ak atuk pulla mak o̱ ithana li tok; yohmi kʋt nan ʋlhpisa yak osh, Chik anushkunno kashke, achi hatuk keyukma, nan anushkunna yo̱ ithana la hi atuk keyu hoke.

⁸ Amba ai ashʋchika yʋt ʋba nan ʋlhpisa atuk pulla mak o̱ nan‐anushkunna ilaiyuka puta ka isht si anukfokihinchi tok; ʋba nan ʋlhpisa yʋt iksho hokʋno ai ashʋchika yʋt illi yatok oka.

⁹ Yohmi ka ʋba nan ʋlhpisa ya̱ ak ithano hokʋto, himonna ka sai okcha̱ya tok; amba ʋba nan ʋlhpisa nan ai ahni kʋt ʋla mʋno, ai ashʋchika yʋt okcha tok: mihma sʋlli tok.

¹⁰ Micha ʋba nan ʋlhpisa yʋmmʋt isht ai okcha̱ya yosh ʋlhpihi̱sa tok ash osh, isht illi yo̱ ahayuchi li tok.

¹¹ Yohmi ka ai ashʋchika yʋt ʋba nan ʋlhpisa yak o̱ isht okcha cha, sa haksichi tok; micha yʋmmak o̱ isht sʋbi tok.

¹² Yʋmohmi hatuk o̱ ʋba nan ʋlhpisa yʋt holitopa, mikma nan ʋlhpisa nan ai ahni kʋt holitopa, ai ʋlhpiesa, micha achukma hoke.

¹³ Yʋmohmi ka nana achukma yʋmmak okak osh isht a sʋlla he an toba tok o̱? ik yʋmohmo pullashke. Amba ai ashʋchika yak atok yohmi ho̱ ai ashʋchika yʋt otʋna chi̱ kak osh, nana achukma ka isht a sʋlla he ʋm ikbi tok; yohmi ho̱ ai ashʋchika yʋt ik achukmo atampa fehna kʋt nan ʋlhpisa nan ai ahni kak o̱ isht ai otʋna hi atok.

¹⁴ Yohmi ka ʋba nan ʋlhpisa yʋto shilombish imma hoka il ithanʋshke; amba ʋno yokʋto haknip nan ai ahni i̱ nuta sia, ai ashʋchika ya̱ i̱ yuka sia hoke.

¹⁵ Yohmi kʋt nana ho̱ yohmi li kʋt, ʋlhpesa ak ahno; yohmi kʋt nana ho̱ ai ahni li hokʋto, yʋmmʋno ak yʋmihcho; amba nana ho̱ ak ahninchokmʋt, yʋmmak o̱ yʋmihchi lishke.

¹⁶ Yʋmohmi kʋt nana ka ak yʋmihcho hokbano ai ahni lik mak osh yʋmihchi li hokmʋt, ʋba nan ʋlhpisa yʋt achukmʋshke, ʋno yʋt ai ahni lishke.

¹⁷ Yakohmi hoka ʋno ak osh himmakma yʋmma yʋmihinchi li kak keyu, amba ai ashʋchika si anukfoyuka kak oke.

¹⁸ Yohmi ka ʋno ya̱ sa foyuka, yʋmmʋt sa haknip anu̱kaka ya̱ nana achukma kʋt iiksho ka ithaiyana lishke: yohmi kʋt nana achukma ai ahni hokʋto si anukfoyuka; yohmi kia nana achukma yʋmma yʋmihinchi la he ak osh ak ahayuchoshke.

¹⁹ Yohmi kʋt nana achukma kʋno yʋmihchi la he ai ahni li kʋt, ak yʋmihchoshke; amba nana ik achukma kʋno yʋmihchi la he ak ai ahno kia, yʋmmʋno yʋmihchi lishke.

²⁰ Anonti nana ka ak yʋmihcho hok bano ai ahni lik mak osh yʋmihchi li hokmʋt, ʋno ak osh himmakma yʋmma yʋmihchi li kak keyu; amba ai ashʋchika si anukfoyuka kak oke.

²¹ Yakohmi hoka nana achukma ka yʋmihchi la he ai ahni likma, nana ik achukmo hokʋt si anukfoyuka a bilia kʋt, il akostininchi lishke.

²² Yʋmohmi hoka Chihowa i̱ nan ʋlhpisa ya̱ ʋm anukfila himona yak okʋno isht i̱ hullo lishke.

²³ Yohmi kia sa haknip nan ai ahni hokʋt inla hatuk osh, ʋm a nukfila nana ai ahni ka in tanahampi, micha ai ashʋchika nan ai ahni sa haknip foyuka kak o̱ i̱ yuka saha̱kbi ho̱, pisa lishke.

²⁴ Ʋno hatak ilbʋsha fehna sia hoka, kʋta hak osh isht ai illi haknip ilʋppa a sa hlakoficha chi̱ cho?

²⁵ Pin Chitokaka Chisʋs Klaist atuk pulla kak o̱ Chihowa ya̱ yak oke pit im ai ahni lishke. Yakohmi hoka ʋm anukfila hokʋno Chihowa i̱ nan ʋlhpisa yoka isht holitobli li; amba sa haknip okʋno ai ashʋchika nan ai ahni kak o̱ isht i̱ yuka sia hoke.