Loman 6 - Chahta Holisso Holitopa 1886

¹ Yohmi ka nanta hak o̱ il acha hinla ho̱? Isht i̱ kana yʋt laua chi̱ mak o̱, isht ai ashʋchika ya̱ e ma̱ha̱ya hinla ho̱?

² Ik yʋmohmo pullashke. Ai ashʋchika ya̱ il im illi ha yʋt, katiohmi kak osh yʋmmak ash inli ho̱ il ai ahanta moma hinla ho̱?

³ Yohmi ka Chisʋs Klaist ak o̱ im a baptismo kʋt, illi tok a̱ isht a pi baptismo ak inli hatuk a̱, hʋch ik ithano ho̱?

⁴ Yʋmohmi ka pi baptismo pulla kak osh illit il iba hollopi hoke: yohmit Klaist illi tok ʋt Chihowa isht a holitopa yak pulla kak o̱ falamʋt isht a tani tok ash inli chiyuhmit, pishno yak kia himonʋt toba yosh il itʋnowa hi atok.

⁵ Yohmi ka ilap illi tok ak o̱ isht a hoyulba hosh il iba hollokchi hatokmʋt, illi tuk ʋt falamʋt tani tok ak kia isht il a hoyulba ak inla hi atok.

⁶ Yohmi ka ai ashʋchika haknip ʋt okpulot kʋnia na himak a pilla hokʋno ai ashʋchika yʋno il i̱ yuka he keyu mak o̱, pim anukfila tikba yʋt ititaiyukhʋna yak o̱ yʋmma ibai illi hatok, ilʋppa il ithana hoka.

⁷ Yohmi ka kʋna hosh ibai illi hokʋto, ai ashʋchika ya̱ ai i̱ mokofa hoke.

⁸ Anonti Klaist a̱ il ibai illi hatok mʋt, il ibai okcha̱ya ak inla hi okʋt, pi yimmishke.

⁹ Yohmi ka Klaist ʋt illi tuk ʋt, falamʋt tani hatok okʋt, himmakma illa he keyu: nan illi yʋt himmakma imaiyacha he keyu ka il ithaiyanʋshke.

¹⁰ Yohmi ka illi hokʋto, himonna illa ho̱ ai ashʋchika pulla kak o̱ illi hatok: amba okcha̱ya hokʋto, Chihowa hak o̱ im ahantʋshke.

¹¹ Yʋmmak inli ho̱ chiyuhmit hʋchishno yak kia ai ashʋchika ya̱ il im illi ho mʋhli, hʋsh il ahni, amba pin Chitokaka Chisʋs Klaist ak atok pulla mak o̱ okcha̱yʋt Chihowa ya̱ il im ahanta, hʋsh il ahni ak inlashke.

¹² Ai ashʋchika yʋt hʋchi haknip illa hi a̱ ik imaiyacho ki̱, im anukfila okpulo yʋmma hʋch ik im antio kashke.

¹³ Hʋchi haknip moyuma ka ʋlhpesa ahnit, nan ik ai ʋlhpieso isht a yʋmohmi yo̱ chiyuhmit isht hʋsh ashʋchi ná; amba illi tok osh falamʋt okcha̱ya ho̱ chiyuhmit, Chihowa ya̱ hʋsh il im issashke; micha hʋchi haknip moyuma kʋt Chihowa yak o̱ nan isht ai ʋlhpiesa isht i̱ yʋmohmi mak o̱ hʋsh chiyumashke,

¹⁴ Yohmi ka ai ashʋchika yʋt hʋch i̱ shahla he keyu; yohmi ka nan ʋlhpisa yak o̱ nutaka hʋsh anta keyu, amba isht i̱ kana yak oke.

¹⁵ Yohmi ka katiohmi cho? nan ʋlhpisa ya̱ nutaka il anta keyu; amba isht i̱ kana nutaka yo̱ il anta kak osh il ashʋcha chi̱ ho̱? ik yʋmohmo pullashke.

¹⁶ Yohmi ka kʋna ho̱ in tishu tobʋt hʋsh im antia hokmʋt, kʋna ho̱ hʋsh im antia kʋt, in tishu hʋchia hokʋt hʋch ik ithano ho̱? Ai ashʋchika isht ai illi, keyukmʋt im antiʋt isht ai ʋlhpiesa yak okmá, kanimampo yoke.

¹⁷ Amba ai ashʋchika ya̱ i̱ yuka hʋchia hatok ak inli kia, nan isht ʋlbʋchi kaniohmi ho̱ hʋchim ʋlbʋchi hatok ʋt hʋchi chu̱kʋsh ak o̱ isht hʋsh holitobli hatuk ak o̱, Chihowa ya̱ yak oke, pit im ai ahni lishke.

¹⁸ Yʋmohmi ka ai ashʋchika ya̱ hʋsh ai i̱ mokofa mak osh, nan isht ai ʋlhpiesa ya̱ in tishu hʋsh toba hatok.

¹⁹ Hʋchim anukfila hʋt ik hlampko pulla kak o̱, hatak anumpuli chatuk mak o̱ chiyuhmit anumpuli lishke; yohmi kʋt hʋchi haknip moyuma ka ʋlhpesa ahnit, nan ik ʋlhpeso ya̱ hʋsh yʋmohma chi̱ kak osh, na liteha, micha nan ik ʋlhpeso aiena ka i̱ yuka hʋsh toba tok ash inli chiyuhmit, himonasi hokʋno hʋchi haknip moyuma ka ʋlhpesa ahnit, ai ashʋchika yʋt ik hʋchim iksho ka chi̱ kak osh nan isht ai ʋlhpiesa ya̱ in tishu hʋsh tobashke.

²⁰ Yohmi kʋt ai ashʋchika ya̱ i̱ yuka hosh hʋsh ai asha mʋto, nan isht ai ʋlhpiesa yʋt ik hʋchim iksho ki tok;

²¹ Yohmi ka nana yakohmi puta kʋno nan isht il ai yukpa nanta ho̱ hʋsh ai ishi tok okak osh himonasi hokʋno yʋmmak a tok a̱ hʋsh i̱ hofahya ho̱? yohmi ka nana yakohmi puta ka ont im ai isht aiyopi hokʋto nan illi hak oke.

²² Amba himonasi hokʋno ai ashʋchika ya̱ ai i̱ mokofa hatuk osh, Chihowa yak o̱ in tishu hʋsh toba hosh, ai ashʋchika i̱ kashofʋt isht il ai yukpa hʋsh i̱shi hoke: yʋmmʋt ont im ai ishtaiyopi kʋt ai okcha̱yʋt bilia yak oke.

²³ Yohmi ka ai ashʋchika ya̱ isht ʋlhtoba hokʋto nan illi hak oke; amba pin Chitokaka Chisʋs Klaist ak atok pulla mak o̱ Chihowa i̱ na hʋlbina hokʋto ai okcha̱yʋt bilia yak oke.