Loman 4 - Chahta Holisso Holitopa 1886

¹ Yohmi ka pi̱ki Eblaham ʋt haknip imma hokʋno nanta hak o̱ ahayuchi tok o̱, il acha hinla ho̱?

² Yohmi ka Eblaham ʋt ʋba nan ʋlhpisa ya̱ isht ahanta kak osh isht ai ʋlhpiesa hokmʋt, nan isht ilauata i̱shi; yohmi kia Chihowa itikba hokʋno yʋmohmi keyu ki tok.

³ Yohmi ka Holisso Holitopa yʋt nanta hak o̱ achi ho̱? Eblaham ʋt Chihowa ya̱ i̱ yimmi kak osh nan isht ai ʋlhpiesa yʋt immi toba tok.

⁴ Yohmi ka na toksahanli ka isht im ʋlhtoba kʋt isht i̱ kana yo̱ keyu, amba aheka yoke.

⁵ Amba toksahanli yak keyu, amba nan ashʋchi ya̱ ai ʋlhpiesachi yak o̱ i̱ yimmi hokʋto, ilap na yimmi ak osh nan isht ai ʋlhpiesa yʋt immi toba hoke.

⁶ Yʋmma chiyuhmi ka hatak ʋt toksahanli keyu kia, nan isht ai ʋlhpiesa ya̱ Chihowa hʋt ima na nan isht ilaiyukpa ka Lewi ak kia isht anumpuli kʋt,

⁷ Kʋna hosh nan ik ai ʋlhpieso yʋt i̱ kashofa, micha ai ashʋchika yʋt im ompoholmo hokʋto, na yukpʋshke.

⁸ Chitokaka yʋt ai ashʋchika ik im iksho yo̱ chohmichi hokʋno hatak yʋmmʋt na yukpʋshke, achi tok.

⁹ Yohmi ka nan isht ilaiyukpa ilʋppʋt hakshup tʋpa ak illa ho̱ immi ho̱? keyukmʋt hakshup ik tapo yak kia aiena ho̱? Yohmi ka na yimmi yak osh Eblaham a̱ nan isht ai ʋlhpiesa immi toba tok, il achi hoke.

¹⁰ Yohmi ka katiohmit immi toba tok o̱? hakshup tʋpa hayak atok o̱? keyukmʋt hakshup ik tapo ki̱sha kak atok o̱? Hakshup tʋpa hayak atok keyu, amba hakshup ik tapo ki̱sha kak atok.

¹¹ Yohmi ka hakshup tʋpa yak osh nan isht atokowa, micha nan isht ai ʋlhpiesa isht ai a̱hli mak o̱ hakshup ik tapo kash inli hosh i̱shi tok; yohmi kʋt hakshup ik tapo kia, yimmi hokʋno moyuma ka i̱ki ya hi atok; yohmi ho̱ yʋmmak kia nan isht ai ʋlhpiesa yʋt immi ak inla hi atok:

¹² Yohmi kʋt hakshup tʋpa i̱ki, micha hakshup tʋpa kak illa keyu, amba pi̱ki Eblaham ʋt hakshup ik tapo ki̱sha ak inli kash osh yimmi a noho̱wa tok ak o̱ iakaiya yʋmmak okʋno i̱ki ya hi atok.

¹³ Yohmi ka Eblaham, micha isht atiaka yʋt yakni moyuma kʋt immi ha hi o̱ im issa kʋt, ʋba nan ʋlhpisa ya̱ holitobli tok ak atok keyu, amba na yimmi nan isht ai ʋlhpiesa kak atok.

¹⁴ Yohmi ka ʋba nan ʋlhpisa yʋmma anukchieto yak osh immi ha he yokma, na yimmi ʋt akshu toba, micha nan im issa tok a̱ ai a̱hla he keyu hoke.

¹⁵ Yohmi ka ʋba nan ʋlhpisa yʋto nan isht a palʋmmi yoka; yohmi ka nan ʋlhpisa iksho hokʋno, nan ʋlhpisa kobʋffi iksho hoka.

¹⁶ Yʋmohmi hoka isht i̱ kana yak a hi atuk pulla kak o̱, na yimmi isht ai ʋlhpiesa kak oke: yohmi ho̱ yʋmmak ash isht atiaka moyuma ka nan im issa tok ash im ai a̱hla hiatok: isht atiaka ʋba nan ʋlhpisa in tonla kash illa keyu, amba isht atiaka Eblaham e moyuma ka pi̱ki ʋt yimmi tok ak o̱ chiyuhmi aiena kak o̱ im ai a̱hla hi atok.

¹⁷ Yohmi ka, Oklushi la̱wa ka i̱ki yo̱ chikbi li tok; achi kʋt holihi̱so hatok ak o̱ yohmi hoke; Chihowa i̱ yimmi tok yʋmmak osh illi ya̱ tanihinchi, micha nana kʋt ik yʋmohmo ki̱sha kia, yohmi tuk ash inli ho̱ chohmichit isht anumpohonli yʋmmak o̱ itikba ai yʋmohmi hoke.

¹⁸ Yʋmmʋt yohma he ik ahobo fehna kia, yohmi pulla chi̱ ahnit, oklushi la̱wa ka i̱ki toba hi atuk ʋt yimmi tok; yohma hi o̱ anuhumpa hatuk oka, Isht chi ai unchululi hʋt yʋmohma hi oke.

¹⁹ Yohmi kʋt yimmi kʋt ik kʋllo keyu hokʋt, sipokni kʋt afʋmmi tahlepa achʋfa foka kia, ilap haknip ʋt himonasi kʋno illi, micha Sela im oshʋto yʋt illi, ai ahni tok keyu.

²⁰ Chihowa hʋt nan im issa tok ash ik yimmot anuktuklo keyu; amba yimmi kʋt kʋllo hatuk osh Chihowa ha̱ holitohombli tok:

²¹ Micha nan im ihi̱sa hatuk ʋt ai a̱hlicha he bano aiena ka nukfoyuka fehna tok.

²² Micha yʋmohmi kak o̱ nan isht ai ʋlhpiesa yʋt immi toba tok.

²³ Yohmi ka yʋmmʋt immi toba tok a̱, holihi̱so kak osh ilap ak atuk illa hak atok keyu:

²⁴ Amba pishno ak kia pi̱ holihi̱so ak inli tok; pin Chitokaka Chisʋs okʋt illi tuk a̱ falaminchit tanichi tok a̱ il i̱ yimmi hokmʋt, pishno ak kia pimmi toba hi atok oka,

²⁵ Yʋmmak ash ot pim ai ashʋchika yak atuk pulla mak o̱ illa chi̱ hosh im ʋlhpisa tuk osh, isht pi ai ʋlhpiesa he mak o̱ anonti falamʋt tani tok.