Loman 3 - Chahta Holisso Holitopa 1886

¹ Yohmi ka Chu hʋt nanta isht i̱ shahli ho̱ i̱shi ho̱? micha hakshup tʋpa ya̱ nanta hak o̱ isht im ai achukma ho̱?

² Ai oklu̱ha bieka; ʋmmona ka Chihowa im anumpa hʋt ibbak a foyuka hatok oka.

³ Yohmi ka kaniohmi kʋt ik yimmo hatuk okma, nanta katiohmi cho? yʋmmʋt ik yimmo kak osh Chihowa yʋt nan isht ai a̱hli yoka ik ai a̱hlecho ho̱?

⁴ Ik yʋmohmo pullashke; a̱hli, Chihowa hokʋto ai a̱hlikma, amba hatak moma kʋto holabi ashke; yohma hi o̱ holihi̱so hatok oka, Ish ai anumpohonli puta kʋt ish ai a̱hla hi atok, micha nana chim ʋlhpisakmʋt, ish imaiyacha hi atok.

⁵ Yohmi ka nan ai ʋlhpiesa keyu e yʋmohmi kak osh Chihowa hʋt nan ai ʋlhpiesa yʋmohmi ka otʋninchi hokmʋno, nanta hak o̱ il acha hinla ho̱? Chihowa hʋt na palʋmmi ka onochi kʋt ik ai ʋlhpieso ho̱? Hatak ʋt anumpuli chatuk mak o̱ anumpuli lishke.

⁶ Ik yʋmohmo pullashke; yohmi hokmʋno, Chihowa hʋt okla moyuma ka katiohmit nan im apesa hinla ho̱?

⁷ Yohmi ka Chihowa nan isht ai a̱hli yokʋt ʋno ak osh holabi li kak o̱ isht i̱ shahlit otʋni na ilap ʋt isht a holitopa hokak o̱, nanta katiohmi ho̱ nan ashʋchi yo̱ chiyuhmit nan ʋm ʋlhpisa hinla ak inli ho̱?

⁸ Amba nan ik a̱hlo isht a pi annoho̱wa kʋt, nan ik achukmo kak o̱ e yʋmohmi na nana kʋt isht ai achukmashke, il achi ho̱ kaniohmi hokak heto kʋllochit anohonli hatuk a̱, nanta katiohmi ho̱ ke yʋmohmo cho? yʋmmak ash nan ʋlhpisa hʋt onʋtuyula he ʋt ai ʋlhpiesa hoke.

⁹ Yakohmi ka katiohmi ho̱? isht a pim achukma kʋt yʋmma il i̱ shahli ho̱? Keyu kamohmi hoke; yohmi ka Chu, micha Chentail ʋhleha moyuma hokʋt ai ashʋchika nuta ai asha ka tikba kash il otʋninchi tuk oke:

¹⁰ Yohma hi o̱ holihi̱so hatok oka, ai ʋlhpiesa yʋt iksho, achʋfa kia iksho hoke:

¹¹ Achʋfona kia nana ka akostininchi kʋt iksho; achʋfa kia Chihowa ya̱ hoho̱yo kʋt iksho hoke.

¹² Moyuma kʋt naksika yo̱ itʋnoho̱wa, moyuma kʋt itapi̱hʋt isht ai achukma hi ʋt iksho; achʋfa kia nana achukma yʋmihchi kʋt iksho; achʋfa kia iksho hoke.

¹³ Ishit nʋlli yʋt hatak a hollopi tiwa yoke; isunlʋsh a̱ isht haksihinchi; asps nan isht ʋbi yʋt itiʋlbi anu̱kaka ya̱ fo̱ka hoke:

¹⁴ Inla ya̱ nan okpulo im ai ahnit anumpuli, micha anumpa na hotopali aiena kʋt itih ha̱ alotowa hoke.

¹⁵ Iyi yʋt issish a̱ hlatahampla chi̱ kʋt pʋlhki hoke.

¹⁶ Isht ai okpulo, micha isht ai ilbʋsha aiena kʋt i̱ hina ya̱ foyuka hoke:

¹⁷ Isht it i̱ nanaiya hina ya̱ ik ithano chatuk oke.

¹⁸ Chihowa isht i̱ nukshopa yʋt nishkin itikba ya̱ ik im iksho hoke.

¹⁹ Yohmi ka nana ho̱ ʋba nan ʋlhpisa yʋt achi kʋt, kʋna hosh ʋba nan ʋlhpisa i̱ nuta ai asha kak o̱ im achi ka il ithana; yohmi na itih puta kʋt ʋlhkʋma hi atok; micha okla moyuma kʋt Chihowa itikba ya̱ nan ʋlhpisa yʋt ai onʋtula hi atok.

²⁰ Yʋmohmi hoka nan isht ai ʋtta ʋba nan ʋlhpisa yʋt ai ahni kak o̱ hatak nana kia itikba ya̱ ai ʋlhpiesa he keyu hoke; yohmi ka ʋba nan ʋlhpisa yak o̱ ai ashʋchika ya̱ isht ithʋna yoka.

²¹ Amba himonasi kano nan ai ʋlhpiesa kʋt ʋba nan ʋlhpisa holitobli kak o̱ keyu, Chihowa hʋt atahli tok a̱ otaiyani kʋt, ʋba nan ʋlhpisa, micha hopaii ʋhleha hʋt nan atokowa anohonli tok ak atok:

²² Yʋmmʋt Chihowa i̱ nan ai ʋlhpiesa Chisʋs Klaist i̱ yimmi kak o̱ a minti mak osh moyuma ka im annoho̱wa, micha yimmi moyuma, kʋt anukfoyuka; it im inla kʋt iksho hoka:

²³ Yohmi ka moyuma kʋt nan ashʋchi hatuk, micha Chihowa hʋt ai ahnincha hi a̱ ik ono hatuk oka:

²⁴ Chisʋs Klaist ʋt isht ʋlhtoba ya̱ atobbi tok pulla mak o̱, Chihowa isht i̱ kana ya̱ pilla isht ai im ʋlhpiesa hatuk oke:

²⁵ Yʋmmak oka im issish a̱ anukchieto hokmak o̱, Chihowa hʋt haiakʋchi tok; yohmi hosh Chihowa hʋt na palʋmmi onocha hi osh ile halanlit, tikba nan ai ashahanchi tok a̱ i̱ kashofi kʋt, nan isht ai ʋlhpiesa otʋnincha hi osh yʋmohmi tok:

²⁶ Yohmi hosh himonasi ya̱ nan isht ai ʋlhpiesa ya̱ otʋnincha chi̱ hosh yʋmohmi kʋt, Chisʋs ak o̱ i̱ yimmi hokʋno nan ai ashʋchika ya̱ ai ʋlhpiesachi kʋt, ilap ʋt ai ʋlhpiesa hi atok.

²⁷ Yohmi ka nan isht ilauata yʋt katimak o̱? Iksho kamohmishke. Nan ʋlhpisa nanta hak o̱ isht ai akshu ho̱? nan isht ʋtta nan ʋlhpisa hak o̱? Keyu, amba na yimmi nan ʋlhpisa kak oke.

²⁸ Yʋmohmi hoka hatak ʋt ʋba nan ʋlhpisa ya̱ holitobli tok ak o̱ keyu, amba na yimmi pulla kak osh isht ai ʋlhpiesa il ai ahnishke.

²⁹ Chihowa hʋt Chu ak illa in Chihowa ho̱? yʋmmʋt Chentail ak kia in Chihowa ak inli keyu ho̱? A̱hli, Chentail ak kia in Chihowa hoke;

³⁰ Yohmi ka hakshup tʋpa yʋt i̱ yimmi hatuk pulla mak o̱, micha hakshup ik tapo yʋt yimmi hatuk pulla mak o̱ ai ʋlhpiesacha hi ʋt Chihowa achʋfa illa hoka.

³¹ Yohmi ka na yimmi yatuk pulla kak o̱ ʋba nan ʋlh pisa ya̱ il akshochi ho̱? Ik yʋmohmo pullashke: amba ʋba nan ʋlhpisa yak o̱ il ai a̱hlichi hoke.