Loman 2 - Chahta Holisso Holitopa 1886

¹ Yʋmohmi ka kʋna chia hoh kia inla anumpa ish onochikmʋt, nan isht ile mihacha hi ʋt ik chim ikshoshke, hatak chia ma! kʋna chia hosh inla anumpa ish onochi hokmʋt, nana yʋmmak ash inli ho̱ ish ai yʋmohmi chatuk okʋt; nana ho̱ inla ya̱ ish onochi kʋt, chishno yash inli hosh anumpa ish il onochi hoke.

² Yohmi kia ilʋppa chiyuhmi yʋmihchi puta hokʋno Chihowa yokʋt ai a̱hli mak o̱ nan ʋlhpisa ya̱ onochi hoka il ithaiynʋshke.

³ Yohmi ka hatak chia ma! nana yʋmma yʋmihinchi puta ka anumpa ish onochi mʋt, yʋmmak ash inli ho̱ ish yʋmihinchi kʋt, Chihowa i̱ nan ʋlhpisa ya̱ ish ai i̱ hlakofa hinla, chim ahoba cho?

⁴ Micha Chihowa isht chi̱ kana ya̱ isht ish ile kostinincha he atuk ʋt chik ithaiyano hosh, isht chi̱ kana fehnʋt, chim ile salalit, na palʋmmi chi onocha hi osh ile halanli aiena ka ish shitelama cho?

⁵ Amba chi chu̱kʋsh kʋllo nan ai ashʋchika isht nukha̱klo keyu yak o̱ ish iakaiya hosh, Chihowa yokʋt nan ai ʋlhpiesa apesa ka otaiyana he, micha ai ilbʋsha nitak ʋt otaiyanikma, a chilbʋsha hi ʋt ish il im itʋnahanlishke.

⁶ Yʋmmak okʋto hatak puta kʋt ilap nana kaniohmi tok ak o̱ isht ai im atobba hi oke.

⁷ Yohmi kʋt kʋna hosh nuktaiyalʋt achunanchit nan achukma yʋmohmi kʋt, isht a holitopa, micha isht annoa achukma, micha isht ai illa he keyu hoho̱yo hokʋno isht ai okcha̱ya bilia he im apesa hi oke.

⁸ Amba kʋna hosh Chihowa ya̱ i̱ sanali, micha anumpa ai a̱hli ik holitoblo hosh, amba nan ai ʋlhpiesa keyu a yʋmohmi yokʋno, isht i̱ nukkilli chinto kʋt onʋtuyula hi oke,

⁹ Micha hatak nan ik achukmo yʋmihchi puta hokʋno isht ai ilbʋsha, micha isht anukhʋmmi aiena hosh onʋtuyula kʋt; Chu ak o̱ ti̱kba onʋtuyula cha, Chentail ak kia onʋtuyula hi oke:

¹⁰ Amba isht a holitopa, micha isht annoa achukma, micha isht it i̱ nanaiya aiena hosh hatak nana achukma yʋmihinchi puta hokʋno onʋtuyula he; yohmi kʋt Chu ak o̱ ti̱kba onʋtuyula cha, Chentail ak kia onʋtuyula hi oke;

¹¹ Yohmi ka Chihowa hokʋto hatak puta ka it i̱ shahshohlichi kʋt ik im iksho hoke.

¹² Yohmi ka laua kaniohmi hosh ʋba nan ʋlhpisa yʋt ik im iksho hosh nan ashahanchi hokʋto, ʋba nan ʋlhpisa iksho ho̱ ai okpulo kʋt kʋnia mak inla he; mikma laua kaniohmi hosh ʋba nan ʋlhpisa yʋt in tonla hosh nan ashahanchi hatuk mʋt, ʋba nan ʋlhpisa yak o̱ nan isht ai im ʋlhpisa hi oke:

¹³ Yohmi ka ʋba nan ʋlhpisa ya̱ haklo ʋhleha hak osh Chihowa itikba ya̱ isht ai ʋlhpiesa ho̱ keyu, amba ʋba nan ʋlhpisa ya̱ yʋmihinchi ʋhleha hak osh ai ʋlhpiesa hoke.

¹⁴ Yohmi ka Chentail ʋba nan ʋlhpisa ik im iksho ʋhleha hʋt ilap nan anukfilli hosh nana a kaniohma he ʋba nan ʋlhpisa ya̱ fo̱ka tuk a̱ yʋmihchi hokmʋt, yʋmmʋt ʋba nan ʋlhpisa yʋt ik im iksho ak inli kia, ilap ash inli hosh isht im il i̱ nan ʋlhpisa yoke.

¹⁵ Yʋmmak osh ʋba nan ʋlhpisa yʋt nan i̱ miha ka otʋninchi kʋt i̱ chu̱kʋsh oka ai o̱ holihi̱so ho̱, ilap nan isht il akostininchi yak kia nan atokowa ka ibai anohonli, mikma im anukfila puta kʋt i̱ himmak ano ilap ash inli hosh anumpa isht il onochi, isht il achukmali, kanimampo ka it im anohonli hoke.

¹⁶ Yohmi kʋt Chihowa hokʋt ʋm ʋbanumpa ak atuk pulla kak o̱ Chisʋs Klaist oka ishit hatak im anukfila luma puta tuk a̱ nan im apesa he nitak yʋmmak fehna ka yʋmohma hi oke.

¹⁷ Yakeh! Chu chi hohchifo kʋt, ʋba nan ʋlhpisa ya̱ ish anukchieto hosh Chihowa ya̱ isht ish ilauata;

¹⁸ Micha ʋba nan ʋlhpisa ya̱ isht a chim ʋlbʋchi hatuk osh, nan ai ahni ka ish ithana, micha nan achukma i̱ shahli ka ish holitobli hoke;

¹⁹ Micha nishkin tamoa ya̱ in tikba hika, ai okhlilika anu̱kaka aiasha ka im pʋla sia hoke, ai ahnit ish ile yimmi hokʋt;

²⁰ Micha im anukfila iksho kostininchi, ʋlla chipinta nan im abʋchi, nan ithana, micha nan ai a̱hli ʋba nan ʋlhpisa fo̱ka ka ai isht ithʋna ish i̱shi hoke.

²¹ Yʋmohmi ka chishno yʋt inla nan ithʋnanchi chia hokʋt, chishno inli kʋno chik il ithʋnancho cho? Hatak ʋt hu̱kopa he keyu ho̱ otʋninchit ish anumpohonli hokak osh, chishno yʋt ish hu̱kopa cho?

²² Hatak ʋt itin luma̱ka he keyu, ish aha̱ya hokak osh, ish itin luma̱ka cho? Na holbʋt toba ya̱ i̱ yuwalʋt ish shitilema hokak osh, Chihowa ya̱ nana ish ima hi atuk ʋt ish i̱shi cho?

²³ Ʋba nan ʋlhpisa isht ish ilauata ho kak osh, ʋba nan ʋlhpisa yash kobʋffit Chihowa ya̱ isht chik holitoblo cho?

²⁴ Yohmi ka, Yohma hi o̱ holihi̱so hatok oka, Chihowa hohchifo hʋt Chentail ʋhleha ha̱ ai i̱ kʋllakshi kʋt hʋchishno yak atuk pulla kak oke.

²⁵ Yohmi ka ʋba nan ʋlhpisa yak o̱ ish holitoblik mʋno, hakshup tʋpa yʋt isht ai achukma ai a̱hli; amba ʋba nan ʋlhpisa ya̱, ish kobʋffi yokmʋno chi̱ hakshup tʋpa yʋt hakshup ik tapo hoke.

²⁶ Yʋmohmi ka hakshup ik tapo yʋt ʋba nan ʋlhpisa yʋt isht ai ʋlhpiesa kak o̱ holitobli hokmʋt, hakshup ik tapo yash ot hakshup tʋpa yo̱ chohma hinla keyu̱?

²⁷ Micha hakshup ik in tapo yoh mak osh ʋba nan ʋlhpisa ya̱ holitobli hokmʋt, chishno yokʋt holisso hʋt chin tonla, micha chi̱ hakshup tʋpa kia ʋba nan ʋlhpisa ya̱ ish kobaha̱fi ka, nan chim apesa hinla keyu̱?

²⁸ Yohmi ka paknali yokʋto Chu keyu, micha nipi ai otʋni kʋto hakshup tʋpa keyu hoke.

²⁹ Amba im anukfila anu̱kaka yokʋto Chu oke; mikma hakshup tʋpa yʋto chu̱kʋsh anu̱kaka yak oke; yʋmmak oka hatak okʋt ahninchi keyu, amba Chihowa yak oke.