Loman 16 - Chahta Holisso Holitopa 1886

¹ Klenklea chʋch hikia ka nan isht im ʋtta, pin tek, Febi ya̱ hʋsh aiokpancha he pit hʋchim ai ahni lishke:

² Yohmi hosh Chitokaka yak o̱ ai achʋfa hoka ʋbanumpuli ai yʋmohmi yak o̱ chiyuhmit hʋsh aiokpʋchashke: micha nana hoh kia isht apelʋcha hi a̱ bʋnna hokma, hʋsh apelashke: yohmi ka yʋmmʋt laua ka apelahanchi chatuk; micha ʋno ak kia aieninchit si apelahanchi chatuk oke.

³ Klaist Chisʋs a̱ ibai achʋfʋt sʋb a toksahanli Akuila, micha Plissilla ita tuklo ka hʋsh aiokpʋchashke.

⁴ Yʋmmak okʋt ʋm ilhfiopak ak atuk pulla kak o̱ ilap ikunla fehna ka aka ya̱ bohonli tok: yʋmmak oka ʋno ak illa keyu, amba Chentail iksa hiohli puyuta aiena kʋt yak oke, im ai ahnishke.

⁵ Yʋmmak ash chiyuhmit yʋmma in chuka ʋbanumpuli iksa ma̱ya ka hʋsh aiokpʋchashke. Epenetʋs a̱ holitopa fehna, yʋmmʋt Klaist i̱ yimmi kʋt Akaia ya̱ ai yʋmohmit nan ʋni ʋmmona hatok a̱ hʋsh aiokpʋchashke.

⁶ Meli ya̱ hʋsh aiokpʋchashke; yʋmmak okʋt pin toksahanli fehna hatok oke.

⁷ A̱ kanomi, micha sʋbai yuka Antonikʋs, micha Chunia itatuklo, yʋmmak okʋt ʋbanumpeshi ʋhleha ha̱ i̱ holitopa yoka hʋsh aiokpʋchashke; yʋmmak okʋt sa ti̱kba Klaist ai ibai achʋfa hatok mak oke.

⁸ Amplias Chitokaka ya̱ ai achʋfa a̱ holitopa ya̱ hʋsh aiokpʋchashke.

⁹ Ʋlbani Klaist ai achʋfʋt piba toksahanli, Stakʋs a̱ holitopa aiena ka hʋsh aiokpʋchashke.

¹⁰ Apelles, Klaist ʋt ahninchi ya̱ hʋsh aiokpʋchashke. Alistobulʋs in chuka chʋfa ai achʋfa ka hʋsh ai okpʋchashke.

¹¹ A̱ kanomi Helotion a̱ hʋsh aiokpʋchashke. Nasissʋs in chuka chʋfa Chitokaka ai achʋfa ka hʋsh aiokpʋchashke.

¹² Tlaifina, micha Tlaifosa itatuklo, Chitokaka in toksahanli ya̱ hʋsh aiokpʋchashke. Pasis holitopa, yʋmmʋt Chitokaka ya̱ in toksahanli fehna chatuk a̱, hʋsh aiokpʋchashke,

¹³ Lufʋs Chitokaka im ʋlhtoka, micha ishki, micha yʋmmʋt ʋshki ya̱ hʋsh aiokpʋchashke.

¹⁴ Asinklitʋs, Flekon, Hemas, Patlobʋs, Hemes, micha il itibapishi ʋhleha hʋt yʋmma apehʋt ma̱ya aiena ka hʋsh aiokpʋchashke.

¹⁵ Filolokʋs, micha Chulia, Neleʋs, micha in tek, micha Olimpas, micha ʋbanumpuli yʋmma apehʋt ma̱ya aiena ka hʋsh aiokpʋchashke.

¹⁶ It i̱ su̱ksowa holitopa yo̱ isht hʋsh it aiokpʋchashke. Klaist in chʋch ʋhleha hokʋt hʋchi aiokpʋchishke.

¹⁷ Yohmi ka itibapishi li ʋhleha ma! nan ʋlbʋchi hʋsh ithʋna kash i̱ sanalit isht it i̱ filʋmmichi; micha isht ibetʋblichi aiena ihi̱kbi hokʋno, yakohmi hʋsh ahni pulla cha, hʋch ik ahalaiyo kashke.

¹⁸ Yohmi ka ilʋppa chiyuhmi puta hokʋto Chitokaka Chisʋs Klaist ak o̱ in toksʋli keyu hoke, amba ilap ikfoka yak inli hoke: mikmʋt anumpa achukma puta, micha isht ahninchi anumpa puta aiena kak o̱ nuktʋhlʋt ahah! ik ahno chu̱kʋsh puta ka isht haksichi hoke.

¹⁹ Yohmi ka isht hʋsh im antia yokʋt hatak moyuma ka im anoho̱wa hoke: yʋmohmi hoka hʋchishno yak atuk pulla kak o̱ sai yukpʋshke: yohmi ak inli kia nana achukma kak o̱ hʋch imponna cha, nan ik achukmo hokʋno ik hʋch imponno hok bano hʋchim ai ahni lishke.

²⁰ Mikma nan isht it i̱ nanaiya in Chihowa yak osh Setan oka chekosikma chiyi nuta ya̱ a litola chi̱ hoke. Pin Chitokaka Chisʋs Klaist isht i̱ kana yʋt hʋchi anuk foyu kashke. Amen.

²¹ Timohliʋs sʋba toksʋli, micha Lusiʋs, micha Chason, micha Sosipata a̱ kanomi aiena kʋt pit hʋchi aiokpʋchishke.

²² Tetiʋs sia holisso ilʋppa holissohonchi kash ot Chitokaka ibai achʋfa hʋchia ha̱ pit hʋchi aiokpʋchi lishke.

²³ Ʋno, micha chʋch moma aiena ka nan im atahli Kaiʋs ash ot pit hʋchi aiokpʋchishke. Elastʋs, tʋmaha in tʋli holisso sholi, micha il itibapishi Katʋs aiena kʋt pit hʋchi aiokpʋchishke.

²⁴ Pin Chitokaka Chisʋs Klaist isht i̱ kana yʋt hʋsh moyuma ka hʋchi anukfoyukashke. Amen.

²⁵ Yohmi cha Chisʋs Klaist ʋt nan abahanchi tok ʋm ʋbanumpa ak atuk na luma ituyula chatuk yakni toba tok itin takla ka isht ik anumpo chatuk osh isht anuhumpa ak atuk puyula mak o̱ isht a hʋchim ai a̱hlicha he im ai ʋlhpiesa hatuk,

²⁶ Micha Chihowa okcha̱yʋt bilia yʋt nan apihi̱sa hatuk mak o̱ hopaii ʋhleha hʋt holissohonchi tok o̱, oklushi moyuma kʋt na yimmit isht im antia chi̱ mak o̱, im otaiyani hatok:

²⁷ Chihowa hopoyuksa achʋfa bano kash ot Chisʋs Klaist ak atuk pulla kak o̱ isht a holitopa yʋt immit biliashke. Amen.