Loman 15 - Chahta Holisso Holitopa 1886

¹ Yakohmi hoka pi hlampko hokʋto ik hlampko hokʋno nan il ib ai isha he atuk; micha pishno inli il ile yukpala hi atuk keyu hoke.

² E moyuma kʋt ilap in chuka panta hatak ʋt ʋbanumpa ha̱ isht a hlampkot im achukma chi̱ ka e yukpalashke.

³ Yohmi ka Klaist ak kia ile yukpali tok keyu hoka; amba holihi̱so kʋt, Isht a hofahyali puta kʋt chi onʋtula hatuk ʋt sai onʋtula hatuk oke, achi hatok oka.

⁴ Yohmi ka nana fehna hoh kia ti̱kba pilla kash holihi̱so kʋt nana isht a pim ʋlbʋcha he mak o̱ holihi̱so hatok oka; yohmi kʋt Holisso Holitopa ak o̱ nana ka isht a nuktaiyalʋt achunanchit ai okcha̱yʋt bilia ya̱ il isha he, il ai ahna hi atok oke.

⁵ Yohmi ka Chihowa hak osh hʋchi atohnohonchit isht anuktaiyalʋt achunanchi ya̱ hʋch ima na nana hʋsh it im anukfilli kʋt ai achʋfʋt Klaist Chisʋs ak atok ak o̱ hʋsh chiyumashke.

⁶ Yohmi hosh hʋchim anukfila hʋt ai achʋfʋt, itih achʋfa hosh Chihowa, pin Chitokaka Chisʋs Klaist I̱ki yak fehna ka hʋsh holitobla hi atuk oke.

⁷ Yʋmohmi hoka Chihowa hʋt isht aholitopa chi̱ kak o̱ Klaist ak kia pi̱ kana hatok ash o̱, chiyuhmit hʋsh it i̱ kanashke.

⁸ Yohmi ka Chihowa isht ai a̱hli yak atuk pulla kak o̱ Chisʋs Klaist okʋt hakshup tʋpa yak o̱ nan isht im ʋtta toba kʋt, i̱ki ʋhleha ha̱ nan im ihi̱sa tok puta ka ai a̱hlicha chi̱ kak atok oke, achi lishke.

⁹ Micha yohmi ho̱ Chentail ʋhleha hʋt ilap isht i̱ nukha̱klo tok ak o̱ Chihowa ya̱ holitobla hi atok oke; holihi̱so kʋt, Ilʋppak atuk mak o̱ Chentail ʋhleha ha̱ ibai achʋfʋt chi aiokpahanchi la he; micha chi hohchifo ha̱ isht taloho̱wa la hi oke, achi hatok oka.

¹⁰ Micha anonti Chentail hʋchia hʋt ʋm okla ʋhleha ha̱ hʋsh ibai okpahanchashke, Chitokaka yʋt achishke.

¹¹ Micha anonti, Chentail moyuma kʋt Chitokaka ya̱ hʋsh aiokpahanchashke: micha okla moyuma kʋt hʋsh aiokpahanchashke, achishke.

¹² Micha anonti Chesse ak o̱ isht atiaka yosh ahanta he, micha yʋmmak fehna hosh Chentail okla ha̱ i̱ shahlit mi̱kot wakaya hi oke: yʋmmak o̱ Chentail okla hʋt anukchieta hi oke, Esaias ʋt achishke.

¹³ Yohmi ka ai okcha̱yʋt bilia ya̱ pisa he ai ahni ya̱ in Chihowa yak osh isht ai yimmit ai isht it i̱ nanaiya, micha ai isht il aiyukpa moyuma ka hʋchi alotoli ho̱ Shilombish Holitopa nan isht ai a̱hli yak atuk pulla mak o̱ ai okcha̱yʋt bilia hʋsh isha hi okʋt, ai a̱hli fehnʋt hʋchi anukfoyukashke.

¹⁴ Micha itibapishi li hʋchia hʋt nana achukma bieka hosh hʋchi anukfoyukʋt, nan ithana isht a hʋchi alotowa hatuk osh, nana ka hʋsh it i̱ miha he bieka ak inli ka, ʋno ak inli kʋt hʋchi yimmi li ak inlishke.

¹⁵ Yohmi ak inli kia itibapishi li ʋhleha ma! Chihowa ak osh isht i̱ kana ya̱ ʋma hatuk oka, ik sa nukwa̱yo kʋt isht i̱ shahli hosh isht hʋsh ithana chi̱ kak o̱, nana a kaniohmi ka hʋchi̱ holissohonch lishke;

¹⁶ Yohmi hosh Chisʋs Klaist nan isht im ʋtta yosh, Chihowa im ʋbanumpa ha̱ Chentail okla hak o̱ isht im ahanta la chi̱ hatok; yohmi ho̱ Chentail ʋt Shilombish Holitopa yak o̱ isht a kashofa hatuk o̱ ʋba isht aiokpʋchi ka ahnincha hi atok oke.

¹⁷ Yʋmohmi hoka nan oklu̱yuha, Chihowa hʋt isht pit ahala̱ya ka Chisʋs Klaist ak atuk pulla mak o̱, nana ka isht ilauata la hi ʋt ieshi lishke.

¹⁸ Chihowa imi Shilombish nan isht ai a̱hli yak atuk pulla mak o̱ nan isht nukhlakancha, micha nan isht atokowa yo̱ nana ka isht ai yʋmohmit anumpohonli li ho̱, Chentail okʋt im antia chi̱ ka, Klaist ʋt isht a si atoksʋli hatuk keyu hokʋno nana ai yʋmohmi tuk ash achʋfa kia isht anumpuli la he keyu hoke.

¹⁹ Yʋmohmi hosh Chelusalem, micha isht ai apakfoyupʋt Illilikʋm a̱ ont ai ʋhli itintakla ya̱ Klaist im ʋbanumpa ya̱ ai a̱hli fehnʋt isht ai anumpohonli li hatuk oke.

²⁰ A̱hli, yakohmi hosh intolahpi hatak inla immi paknaka yo̱ ai ikbi li yoba ná, ai ahni li kak osh kanima yo̱ Klaist ʋt isht ik ai anumpo hokʋno ʋbanumpa ya̱ isht ai anumpohonli sa bʋnna fehna chatuk oke.

²¹ Yohmi kia holihi̱so kʋt, yʋmmak o̱ isht im anumpa hatok keyu kia, okla pisa hi oke; micha okla yʋmmʋt haklo hatok keyu kia, akostinincha hi oke, achi hatok oka.

²² Yohmi ka ilʋppak atuk pulla kak o̱ hʋchim ona la hi atok ʋt, isht a si ataklʋma fehna ak inli hatuk oke.

²³ Yohmi kia himonasi hokʋno ilʋppa ai anumpuli la hi okʋt ik sʋm iksho hatuk osh; micha hʋchim ona sa bʋnna fehna tok a̱ himak a̱ afʋmmi hʋt laua fehna hatuk osh;

²⁴ Kanima kash inli ho̱ nowʋt a̱yʋt Ispani yoka chukowa likmʋt, hʋchim ona la hi oke: yohmi kʋt nowʋt a̱ya li hokʋt, ont hʋchi pisa la he ai ahni li: micha hʋchi pisʋt kaniohmit ʋm ʋlhpiesa ha yokmʋno, nowʋt a̱ya li kash achakalit pit hʋs sa pila he chishke, ai ahni lishke.

²⁵ Yohmi kia himonasi hokʋno ʋbanumpuli ʋhleha hak o̱ i̱ hopela la chi̱ hosh Chelusalem ak o̱ ia la chishke.

²⁶ Yohmi ka Masetonia, micha Akaia okla aiena kʋt im ʋlhpiesa hosh ʋbanumpuli ilbʋsha Chelusalem ai asha ka nan isht apelʋchi kaniohmi ka i̱ bohonli tuk oke.

²⁷ Im ʋlhpiesa ai a̱hli fehna hosh yʋmihchi tuk: yohmi hatuk o̱ im aheka ʋhleha hokʋt. Yohmi ka Chentail okla hʋt nana Shilombish immi puta ka ibai ihi̱shi toba hatuk mʋt, anonti nana haknip immi puta ka yʋmma isht apelʋcha hi okʋt im ai ʋlhpiesa ak inlishke.

²⁸ Yʋmohmi hoka ilʋppa isht ʋttʋt ʋm ʋlhtaha, micha nan isht apehlʋchi ilʋppak ash o̱ im ai a̱hlichi li ha yok mak osh, hʋchin tʋmaha ha̱ hlopullit Ispani yoka ont chukowa la hi oke.

²⁹ Micha hʋchim ona likmʋt, Klaist im ʋbanumpa ai isht ilaiyukpa ai a̱hli fehna laua ka isht hʋchim ona la hi okʋt, ithaiyana lishke.

³⁰ Yohmi ka itibapishi li ʋhleha ma! Chitokaka Chisʋs Klaist ak atuk puyula, micha Shilombish ak atuk mak o̱ isht iti̱ hullo yʋt hʋchi anukfoyuka hokʋt, sʋbai yichina fehna hosh anumpa ilbʋsha Chihowa ya̱ im anumpohonli kʋt, isht hʋs si anumpohonlashke.

³¹ Yohmi ho̱ ik yimmo ʋhleha Chutia ai asha ka ai i̱ hlakofi lashke: micha Chelusalem a̱ nan i̱ hopela la chi̱ i̱shi li kash ʋbanumpuli ʋhleha hash ot aiokpahanchashke.

³² Yohmi ho̱ Chihowa nan ai ahni pulla ho̱ nan isht ilaiyukpa ya̱ ieshit hʋch im ona li hosh, nana ka hʋch ibai yuhu̱kpa li hokbano.

³³ Yohmi ka nan isht it i̱ nanaiya in Chihowa yak osh hʋsh moyuma ka hʋch iba foyukashke, Amen.