Loman 14 - Chahta Holisso Holitopa 1886

¹ Na yimmi kʋt ik ono ka hʋsh i̱ kana banashke; micha im anukfila anuktuklo atuk a̱ nana isht chik im apeso kashke.

² Yohmi ka achʋfa hokʋto nan oklu̱ha ka ʋpa hi atuk ʋt yimmishke; inla hokʋto na yimmi kʋt ik ono mʋt, na waya yak o̱ ʋpʋshke.

³ Yohmi ka ʋpa hokʋt ik po hoka ik kanimancho kashke; micha ik po hokʋt ʋpa hoka nan ik im apeso kashke; Chihowa ak osh i̱ kana hatuk oka.

⁴ Kʋta chia hokak osh hatak inla in tishu ha̱ nan ish im apesa hoh cho? ilap i̱ shahli ak illa ho̱ isht im a hikia he, keyukmʋt isht ai im itula hi oke. A̱hli, ai a̱hlit hikia hi oke, Chihowa hak osh ai a̱hlichit hilecha hinla hoka.

⁵ Hatak achʋfa hokʋto nitak achʋfa kʋt inla ka i̱ shahli, ai ahnishke; inla hokʋto nitak moma kʋt itilaui, ai ahnishke. Hatak puyuta kʋt ilap im anukfila fehna ka ai a̱hlit anukfoyukashke.

⁶ Kʋna hosh nitak a̱ holitoblikmʋt, Chitokaka yak o̱ i̱ holitobli hoke: mikma kʋna hosh nitak a̱ ik i̱ holitoblo hokmʋt, Chitokaka yak o̱ ik i̱ holitoblo hoke. Kʋna hosh ʋpakmʋt, Chitokaka yak o̱ im ʋpa hoke; Chitokaka yak o̱ isht aiokpʋchi ya̱ ima hokʋt: mikma kʋna hosh ik pokmʋt, Chitokaka yak o̱ ik im ʋpo hoke: yohmi kia isht aiokpʋchi ya̱ Chihowa yak o̱ ima hoke.

⁷ E kanima kʋt pishno inli il im anta keyu hoke: micha hatak nana kia ilap inli il im illi keyu hoke.

⁸ Pi okcha̱yʋt il ahanta kʋt, Chitokaka yak o̱ il im ahanta hoke; micha pilli hokmʋt, Chitokaka yak o̱ il im illi hoke yʋmohmi hoka pi okcha̱ya, pilli, kanimampo hoh kia Chitokaka yak o̱ immi pia hoke.

⁹ Yohmi ka Klaist okʋt illi tuk ʋt falamʋt okcha̱ya kʋt, illi, micha okcha̱ya it aieninchit in Chitokaka toba chi̱ ilʋppak fehna hatok oka.

¹⁰ Yohmi kia nanta katiohmi ho̱ chitibapishi ha̱ nan ish im apesa cho̱? micha nanta katiohmi ho̱ ish itibapishi ha̱ ish kanimanchi cho? e moyuma kʋt Klaist nan apesʋt ai o̱ binili ka itikba ya̱ e hiohla hi oka.

¹¹ Yohmi ka holihi̱so kʋt, Sai okcha̱ya hoka iyi̱kalaha puta kʋt a̱ hʋchukbihlapa hi oke; mikma isunlʋsh puta kʋt Chihowa ha̱ aiokpahancha hi oke, Chitokaka yʋt achi hoke, achi hatuk oka.

¹² Yakohmi hoka e moyuma kʋt Chihowa hoka il im il anohonla hi oke.

¹³ Yʋmohmi hoka himak a pilla kʋno nan it im apesʋt kil ahanto kashke; amba hatak nana kia isht ai ibetʋbla he, keyukmʋt isht ai itula he nana kia itibapishi i̱ hina ya̱ ik bohlo ka he ilʋppak o̱ hʋsh im anukfillashke.

¹⁴ Yohmi ka nana kʋt ilap ak inli kʋt ik kashofo kʋt iksho ka, Chisʋs Klaist ak atuk mak o̱ isht a sa nukfoyukʋt, ithaiyana lishke: amba kʋna hosh nana kʋt ik kashofo ai ahni hokʋno, yʋmmʋno nana kʋt ik i̱ kashofo hoke.

¹⁵ Ish itibapishi hʋt nana ish pa ka isht ik im ʋlhpieso hokma, himak a i̱ hullot ish noho̱wa keyushke. Yʋmmak ash Klaist ʋt ʋlhtobʋt illi hatok oka, chim ilhpak a̱ isht chik okpano kashke.

¹⁶ Yʋmohmi hoka nana achukma isht ish ilaiyukpa kʋt ik ai ʋlhpesot isht ik anumpo kashke.

¹⁷ Yohmi ka Chihowa apehlichika yokʋt nan impa, nan ishko kak o̱ keyu hoke; amba nan isht ai ʋlhpiesa, micha isht it i̱ nanaiya, micha Shilombish Holitopa ai isht ilaiyukpa yak oke.

¹⁸ Yohmi ka kʋna hosh nana ilʋppak fehna ka Klaist a̱ isht im antia hokʋno Chihowa yʋt ahninchi, mikmʋt hatak puta kʋt ʋlhpesa ai ahni hoke.

¹⁹ Yʋmohmi hoka nana kʋt isht ai it i̱ kana puta, micha nana ka isht it i hlampkohoncha he aiena kak o̱ e yʋmoho̱mashke.

²⁰ Yohmi ka nan ʋpa ak atuk mak o̱ Chihowa hʋt nana toksahanli tuk ash isht chik okpano kashke. Nan oklu̱ha kʋt kashofa mʋhli hoke: yohmi kia hatak nana hosh inla isht ai ibetʋbli ho̱ impa hokʋto, isht ik im achukmo hoke.

²¹ Nipi ʋpa, oka pa̱ki ishko, keyukmʋt nana kia ish itibapishi hʋt isht ai itulʋt isht ai ibetʋblit isht ik a hlampko ka chi̱ ho̱, ai yʋmohmi kʋt ik achukmo hoke.

²² Nana kash chi yimmi cho? Chihowa itikba yak o̱ chishno illa hosh ish a yʋmohmashke. Kʋna hosh ilap ʋt nana ho̱ ʋlhpiesa ahnit, ilap ash inli anumpa isht ik il onocho hokʋt, na yukpa hoke.

²³ Yohmi ka kʋna hosh anuktuklo hoh kia ʋpa hokmʋto, anumpa onʋtula hoke: nana hoh kia yimmi keyu hosh yʋmihchi hokʋto ai ashʋchi yoka.