Loman 13 - Chahta Holisso Holitopa 1886

¹ Shilombish puta kʋt nan ʋlhtoka i̱ shahli ʋhleha ha̱ im antiashke. Nan ʋlhtoka inla kʋt iksho: amba Chihowa ak osh ai ahni kak bano hoka; nan ʋlhtoka puyuta ka Chihowa hak osh ʋlhtoka he ai ahni hoke.

² Yʋmohmi hoka kʋna fehna hoh kia nan ʋlhtoka yoka i̱ sanali hokʋt, Chihowa hʋt nan apesa tok a̱ i̱ sanali hoke: mikmʋt i̱ sanali ʋhleha hokʋto ilap inli isht ai ilbʋsha yosh im ʋlhpisʋt isha hi oke.

³ Nan ʋlhtoka ʋhleha hoka nan toksʋli achukma yak osh ai i̱ nukshopa yo̱ keyu hoke: amba nan ik achukmo toksʋli yak oke. Yakohmi ka nan ʋlhtoka yoka chishno yʋt i̱ nukshopa la he, chik ai ahno cho? Nan achukma kak o̱ ish yʋmohmashke; mikmʋto yʋmmak ash o̱ ish im a holitopa hi oke.

⁴ Nan isht chim achukma chi̱ mak o̱ yʋmmʋt Chihowa nan isht im ʋtta hatuk oka. Yohmi kia nan ik achukmo kak o̱ ish yʋmihchi hokmʋt, chi nukshopashke: yohmi ka yʋmmʋt bʋshpo falaia ya̱ peh pilla ieshi ho̱ keyu; amba yʋmmʋt Chihowa nan isht im ʋtta yosh nana ka ai a̱hlichit nan ik achukmo yʋmihchi ya̱ isht ai i̱ palʋmmi ka onohonchi mak oke.

⁵ Yʋmohmi hoka isht ai i̱ palʋmma he ak bano kak o̱ keyu, amba isht il akostininchi yak atuk pulla aiena kak o̱ ish im antia pullashke.

⁶ Yohmi ka ilʋppak atuk pulla kak o̱ noshkobo chumpa ya̱ ish atobbi makinlashke: yʋmmʋt Chihowa nan isht im ʋtta ʋhleha hatuk osh nana ilʋppak fehna ka isht ahantʋt bilia hoke.

⁷ Yʋmohmi ka moma kʋt ilap ai isha he ai ʋlhpiesa ka ish imashke: noshkobo chumpa ya̱ kʋna hosh isha he ai ʋlhpiesa kak o̱ ish imashke: ʋlhpoyak isht ai ʋlhtoba kashampa kʋnia he tuk a̱ kʋna hosh isha he ai ʋlhpiesa kak o̱ ish imashke: kʋna ho̱ i̱ nukshopa he, ai ʋlhpiesa kak o̱ ish i̱ nukshopashke: kʋna ho̱ holitoba he ai ʋlhpiesa kak o̱ ish holitoblashke.

⁸ Hatak nana kia aheka yʋt ik chin takanlo kashke: amba hʋsh it i̱ hulla he ʋto hʋsh it in takanlashke; yohmi ka kʋna hosh inla ya̱ i̱ hullo hokʋto ʋba nan ʋlhpisa ya̱ ai a̱hlichi hoke.

⁹ Yohmi ka, Chik it in luma̱ko kashke, Chik bo kashke, Chik hu̱kopo kashke, Chik aholʋbecho kashke, Chik anushkunno kashke; micha nan ʋlhpisa inla kʋt takanli hokmʋt, anumpa kanomosi, Chin chuka panta hatak a̱ ish i̱ hullo kʋt, chishno ish il i̱ hullo kak i̱ chiyuhmashke, achi ilʋppak o̱ fo̱ka hoke.

¹⁰ It i̱ hullo yʋt nan ik achukmo in chuka panta hatak a̱ ik i̱ yʋmihcho yoke: yʋmohmi hoka it i̱ hullo yak osh ʋba nan ʋlhpisa ya̱ ai a̱hlichi mak oke.

¹¹ Micha ilʋppak o̱ hʋsh yʋmohmashke: mikmʋt himonasi ka nusi tuk ʋt pi okcha he hʋshi kanʋlli hʋt ont ai ʋlhpiesa ka il ithaiyanashke; himonasi kʋno isht ai pi ok cha̱ya yokʋt pi̱ bili̱ka kʋt pi yimmi hatok ano i̱ shahli hoka.

¹² Ninak ʋt ant ia̱ hosi ma, nitak ʋt ʋla̱ hosishke: yʋmohmi hoka okhlili isht a toksʋli puta ka e kaiyanchashke: micha nan tohwikeli isht il atukkochi yak o̱ e foyukashke.

¹³ Nitak itʋnowa yak o̱ chiyuhmit ai ʋlhpiesa hosh il itʋnowashke: haksi, micha tasimbot tasali keyu, itiba nusit isht a haui keyu, itachowa, micha it i̱ potʋnnot hʋch ik it i̱ nukkillo kashke.

¹⁴ Amba Chitokaka Chisʋs Klaist ak o̱ hʋsh foyukashke; micha haknip nan ai ahni okpulo puta ka im ai a̱hlicha chi̱ kʋt haknip a̱ nana hʋch ik atahlo kashke.