Loman 12 - Chahta Holisso Holitopa 1886

¹ Yʋmohmi ka itibapishi li ʋhleha ma! Chihowa hʋt isht i̱ nukha̱klo puta hak atuk pulla mak o̱ hʋchi haknip puta hokʋno ʋba isht aiokpʋchi okcha̱ya, holitopa, Chihowa yʋt aiokpancha he ʋlhpesa ho̱, yʋmma isht hʋsh ai ahanta he ʋlhpiesa hokʋt, hʋsh im issa he, hʋchim ai ahni lishke.

² Micha yakni ilʋppak inli ka hʋch ik hoyulbo kashke; amba hʋchim anukfila hʋt himonʋt toba pulla hatuk mak osh inlʋt hʋsh tobashke; yohmi hosh nan achukma, nan ai ʋlhpiesa, nan ai a̱hli Chihowa nan ai ahni ka hʋsh akosti ninchashke.

³ Yohmi ka isht i̱ kana ya̱ ʋma hatuk pulla mak o̱, hatak hʋch ibafo̱ka puta ka ilap ash inli kʋt isht il anukfilla he ai ʋlhpiesa ka isht i̱ shahlichit isht ik anukfillo kashke, im achi lishke: amba il oktamblit Chihowa hʋt hatak hikia aiyuka ka isht ai yimmi kaniohmi ho̱ ima hatok ash o̱, hatak hikia aiyuka kʋt isht il anukfillashke.

⁴ Yohmi ka pi haknip ʋt achʋfa kia, pit ai achʋfa hʋt laua, micha pit ai achʋfa ilʋppʋt moyuma kʋt nan isht ai ʋtta yʋt miash inli keyu kash o̱:

⁵ E chiyuhmi hosh e laua kia, Klaist il ibai achʋfa kʋto haknip achʋfa pia, micha achʋfa aiyuka kʋt pit il it ibai achʋfa hoke.

⁶ Yʋmohmi ka isht i̱ kana yʋt kaniohmi ho̱ il ishi hatok ak osh na hʋlbina puta kʋt ilaiyuka ho̱ il ieshi hokʋt, Shilombish anukfoyukʋt anumpuli isht ai ʋtta yo̱ e habena hatuk okmʋt, isht ai yimmi yak o̱ ai itilaui ho̱ yʋmmak o̱ isht il ahantashke.

⁷ Mikmʋt chʋch nan isht im ʋtta isht ai ʋtta ya̱ e habena hatok mʋt, yʋmmak o̱ isht il ahantashke; micha nan ithʋnanchi yokmʋt, yʋmmak o̱ isht ahantashke.

⁸ Micha ʋbanumpa isht atohnochi yokmʋt, yʋmmak o̱ isht ahantashke: na hopela yokmʋt, im anukfila apissali hosh yʋmihchashke: pehlichi yokmʋt, ai a̱hli achukmashke: i̱ nukha̱klot nan isht im ʋtta yokmʋt, aiokpanchi hosh yʋmihchashke.

⁹ Isht i̱ hullo yʋt isht il ahobi iiksho hashke. Nan ik achukmo ka ish i̱ nukkillashke; nan achukma hoka ish asitiashke.

¹⁰ Itibapishi chiyuhmit it i̱ kana fehnʋt hʋsh it i̱ hullashke; hʋsh iti holitobli kʋt hʋsh it im i̱ shahlashke.

¹¹ Nan isht ʋtta kʋt intakobi keyu; chu̱kʋsh isht ai yiminta fehnʋt, Chitokaka yak o̱ in toksʋli hosh isht hʋsh ahantashke.

¹² Ai okcha̱yʋt bilia pisa la he ai ahnit, hʋchi yuhu̱pashke: na palʋmmi hʋsh pihi̱sa kʋt hʋchi nuktaiyalashke: achunanchi hosh anumpa ilbʋsha hʋsh anumpohonlashke.

¹³ Ʋbanumpuli a bʋnna ka hʋsh i̱ hopehinlashke: hatak ik ithano ya̱ hʋsh i̱ kana fehnashke.

¹⁴ Hʋch ilbʋshali ka isht im ai achukma he ai ahnit isht hʋsh anumpohonlashke; isht ai okpula hi a̱ hʋch ik ai ahno hosh, isht ai achukma he ak o̱ ai ahnit isht hʋsh anumpohonlashke.

¹⁵ Nan isht ilaiyukpa ka hʋsh ibai yukpashke; micha nukha̱klokma, hʋsh iba nukha̱klashke.

¹⁶ Hʋchim anukfila hʋt ai achʋfʋt hʋsh it im anukfillashke. Isht a holitopa puta ka hʋch ik hoho̱yo kashke: amba hatak ilbʋsha yak o̱ hʋsh il itilauechashke. Hʋchishno inli hʋch ik ile yimmo kashke.

¹⁷ Hatak ʋt nan ik achukmo hʋchi̱ yʋmihchi ka nan ik achukmo yo̱ hʋch ik i̱ falamincho kashke. Hatak moyuma itikba ya̱ nana achukma puta ka hʋsh yʋmihchashke.

¹⁸ Yohma he yobakma, hʋsh a yʋmohma he ai ʋlhpiesa kʋto, hatak moyuma ka hʋsh it i̱ nanaiya hosh hʋsh ahantashke.

¹⁹ A̱ holitopa ma! hʋch ik il ai okho kashke, amba ai ʋlhpiesa isht im atobbi yak o̱ hʋsh il im issashke; holihi̱so kʋt, Ai ʋlhpiesa isht atobba hi okʋt ʋmmi hatuk osh, afalaminchit atobbi la hi oke, Chitokaka yʋt achi hatok oka.

²⁰ Yʋmohmi ka chin tʋnʋp ʋt hohchʋfo hokma, ish ipetashke; itukshila hokma, nan ishko ish ipetashke; ilʋppak o̱ ish yʋmihchi hokmak osh luak tobaksi yo̱ noshkobo ha̱ ish o̱ fohobla hi oke.

²¹ Nan ik achukmo i̱ nutʋt chik il ai okho kashke; amba nan achukma kak o̱ nan ik achukmo ka isht ish imaiyachashke.