Loman 11 - Chahta Holisso Holitopa 1886

¹ Yakohmi ka Chihowa hʋt im okla fehna ka kanchit taiyahli hatok o̱? Ik yʋmohmo pullashke; yohmi ka ʋno yak kia Islaelait Eblaham isht atiaka Benchamin iksa sia hoke, achi lishke.

² Chihowa hʋt im okla fehna tikbanli ithaiyana tok okʋto kanchit taiyahli hatok keyu hoke. Holisso Holitopa yʋt Elias ai isht anumpohonli ka chik ithano cho? Islael oka anumpa onochit Chihowa ya̱ isht anumpohonli kʋt,

³ Chitokaka ma! chi̱ hopaii ʋhleha ha̱ ahambi tok, chim alta puta ka iba kullit akahanchi tok; yohmi ka ʋno ak bano hosh ahanta li ma, ʋm ilhfiohpak a̱ tʋbli bahanʋshke, ahanchishke.

⁴ Yohmi kia Chihowa hʋt afalaminchit nanta hak o̱ im achi ho̱? Hatak tahlepa sipokni untuklo hokʋto Baal holbʋt toba ya̱ ik i̱ hʋchukbihlepo atuk okʋno ʋno ʋmmi yo̱ ilatohomba li tuk oke, achishke.

⁵ Yʋmmak ash inli chiyuhmit himonasi ak kia isht i̱ kanʋt isht ai ʋlhtoka tok ʋt kaniohmi kʋt ai asha ak inli hoke.

⁶ Yohmi ka isht i̱ kana yak okma, toksahanli tuk pulla yak o̱ ai yʋmohmi keyu hoke; yakohmi hokma isht i̱ kana yʋt isht i̱ kana keyu yoke. Amba toksahanli tuk pulla yak o̱ ai yʋmohmi hokma, isht i̱ kana yak o̱ ai yʋmohmi keyu hoke: yakohmi hokma toksahanli yʋt toksahanli keyu hoke.

⁷ Yakohmi ka katiohmi ho̱? Islael okʋt nana hoho̱yo kʋt ishi hatok keyu hoke: amba ʋlhtoka yak osh ishi hatok; mihma kashapa hokʋto im anukfila hʋt kʋllot kʋnia tok oke;

⁸ Yohmi ka holihi̱so kʋt, Chihowa hokʋt im anukfila nosilhhʋt kʋnia, nishkin nan isht pisa he keyu, micha haksobish nan isht hakla he keyu puta aiena ho̱ ihi̱ma hatok; ahanchi hatok ash o̱ ihi̱ma na himak a nitak a̱ ai ʋlʋshke.

⁹ Mihma Lewi ʋt achi kʋt, Ai impa yʋt isht ai ibetʋbla he, micha isht ai itula he, micha isht ai okpula he, micha isht ai im ʋlhtoba he aiena isht ai in tobashke.

¹⁰ Micha nishkin ʋt im okhlili cha, isht ik peso hosh hlipkʋchit ma̱ya na biliashke, achishke.

¹¹ Yakohmi hoka ibetʋbli hatuk ak osh isht ai itulʋt kʋnia ho̱? Ik yʋmohmo pullashke: amba isht ai itula hatuk pulla kak o̱ isht ai okcha̱ya yʋt Chentail a̱ im ʋla ho̱ isht a nukta̱hlahancha chi̱ hatok oke, achishke.

¹² Yohmi ka yʋmmʋt isht ai itulʋt kʋnia kak o̱ yakni moyuma kʋt isht ai yukpa laua kʋt im ʋla hokma, micha isht ik a lauwot taiyaha kak o̱ Chentail ʋhleha ha̱ isht ai yukpa la̱wa kʋt im ʋla hokma; isht ai alotowa hokak heno isht i̱ shahli fehna hi o̱ keyu̱?

¹³ Yohmi ka Chentail hʋchia ha̱ hʋch im anumpohonli il kʋt, Chentail im apostel sia hatuk okʋt, nan isht ai ʋtta li ya̱ holitobli lishke.

¹⁴ Yohmi hosh kaniohmit isht a nukta̱hlachit sa haknip ai achʋfa kash kanimi kʋno okchalinchi la hinla hokmʋt,

¹⁵ Yohmi ka yʋmma kaiyanchi kak o̱ yakni moyuma kʋt isht ai it i̱ nanaiya hokma, yʋmmak ash i̱ kanʋt falaminchit ishi hokak heno nanta ha hi o̱? amba illi tuk ʋt falamʋt isht ai okcha̱ya kak a hi o̱?

¹⁶ Yohmi ka ʋnit waya ʋmmona kʋt holitopa hokma, a moyuma kʋt holitopa ak inli hoke: micha hakshish ʋt holitopa hokma, naksish puta kak kia yohmi ak inli hoke.

¹⁷ Mihma naksish kaniohmi kʋto atʋptoʋt kʋnia hokma, alif haiaka ai offo chia hash osh ish ibafohka hatuk; micha yʋmmak ash ibafo̱ka hosh alif okchi, micha hakshish aiena ka ish ibai ishi hatuk okmʋt;

¹⁸ Naksish puta ka ik ahobalot chik im ilauato kashke; amba ish ilauata hok mak osh chishno yak osh hakshish ish il ai i̱shi keyu, amba hakshish ak osh chi̱shi hoke.

¹⁹ Yʋmohmi ka, Naksish kaniohmi kʋt kobahlit kʋnihi̱ya kʋt, ʋno yak osh iba fohka la he yak o̱ yohmi hatok, ish acha chi̱ hoke.

²⁰ A̱hli; ik yimmo kak osh kobahlit kʋnihi̱ya hatok; amba chishno ʋto na yimmi kak osh isht ish a hikia hoke. Chik ilefehnacho kashke, amba ish il akanlosechashke:

²¹ Yohmi ka Chihowa hʋt naksish fehna yash kanchi nukwiya tok keyu hokmʋt, chishno yak kia chi kancha he yoba ká, ahah! ish ahnashke.

²² Yʋmohmi ka Chihowa hʋt isht i̱ kana, micha isht palʋmminchi ya̱ ho pesá: aka itula tok ash isht palʋmminchi; amba chishno yokʋno isht chi̱ kana, ilap isht i̱ kana yash o̱ ish a ma̱ha̱ya hokmʋt; yʋmmak keyu hokmʋno chishno yak kia cha̱yʋt chi tʋpa he ak inli hoke.

²³ Yʋmmak ash kia ik yimmo kak o̱ keyu hokmʋt, iba foho̱ka he; Chihowa hak osh yʋmmak ash falaminchit iba foho̱ka hi ʋt im ai a̱hli hoka.

²⁴ Yohmi ka chishno yʋt alif haiaka ai offo yo̱ a tʋpa hosh alif achukma yash, ai yʋmohmi chatuk keyu kia, ish ibafohka hatok okma; naksish fehna yatok ilʋppak heto isht i̱ shahli fehnʋt ilap immi yatuk ash inli ka ibafoho̱ka hinla keyu ho̱?

²⁵ Yohmi ka itibapishi li ʋhleha ma! Islael a kashapa hokʋt im anukfila hʋt kahanlo na Chentail ʋhleha isht ai alotowa yʋt ʋla he yak atok, anumpa ai a̱hli ik otano chatuk ilʋppa hʋch ik ithaiyano hosh, hʋchishno ash inli hosh ile yimmit hʋsh ai asha hi a̱ ak hʋchim ai ahnoshke.

²⁶ Yakohmikmʋno Islael ʋhleha hʋt moyumʋt okcha̱ya hi oke; holihi̱so kʋt, Nahlakofichi yʋt Saion ak o̱ a mintit kohcha hosh ai ashʋchika ya̱ Chekob a̱ ai isht i̱ kahancha hi oke, achi hatok oka.

²⁷ Micha ai ashʋchika yash ai isht i̱ kanchi likmʋt, ilʋppak o̱ nan it im apesa la he tok mak oke.

²⁸ Ʋbanumpa hash imma hokʋno, hʋchishno yak atuk pulla kak o̱ yʋmmak ash ot tʋnʋp ʋhleha hoke; amba ʋlhtoka yash imma hokʋno i̱ki ʋhleha yash ak atuk pulla kak o̱ i̱ holitopa ʋhleha hoke.

²⁹ Yohmi ka Chihowa hʋt na habenahanchi, micha atokohonli aiena kʋt inlʋchit im anukfila he keyu hoke.

³⁰ Yohmi ka hʋchishno yokʋto tikba pilla kash Chihowa ya̱ hʋsh i̱ yimmi hatok keyu; yohmi kia yʋmmak ash ot isht ik a yimmo pulla kak o̱ isht i̱ nukha̱klo yash hʋsh ishi hatok ash o̱;

³¹ Chiyuhmit ilʋppak ash ot himonasi ka ik yimmo ak inli hatuk kia, isht hʋsh i̱ nukha̱klo yak atuk pulla kak o̱ ilʋppak ash kia isht i̱ nukha̱klo ya̱ ishi mak inla hi atok.

³² Yohmi ka Chihowa hʋt yʋmmak ash moyuma kʋt ik yimmo ka he im ai ahni hosh moyuma ka i̱ nukha̱kla he ak atok.

³³ Yakeh! Chihowa hʋt hopoyuksa fehna, micha nan ithana aiena kʋt ataha hi ʋt ik im iiksho; nana apihi̱sa ka akostininchit nana a kaniohmi puta ka silhhit ahayucha he keyu hoke.

³⁴ Yohmi ka kʋta hak osh Chitokaka im anukfila ha̱ ithaiyana tok o̱? keyukmʋt kʋta hak osh nan i̱ miha yatok o̱?

³⁵ Keyukmʋt kʋta hak osh ti̱kba ima hatok osh, anonti falamʋt im ʋlhtoba hi atok o̱?

³⁶ Yohmi ka nan oklu̱ha kʋt yʋmmak o̱ a mihinti, micha yʋmmak o̱ isht a toba, micha yʋmmak o̱ immi mak osh tohomba tok; isht a holitopa yʋt yʋmmak o̱ immit peh biliashke. Amen.