Loman 10 - Chahta Holisso Holitopa 1886

¹ Itibapishi li ʋhleha ma! sa chu̱kʋsh nan aiahni, micha Islael oka anumpa ilbʋsha Chihowa ha̱ isht im anumpohonli li kʋt, okla okcha̱ya he ak o̱ ai ahni lishke.

² Yohmi ka Chihowa ya̱ ai yiminta fehna kia, ai a̱hli ithana keyu ka atokowa im ithaiyana lishke.

³ Yohmi kʋt Chihowa hʋt nan isht ai ʋlhpiesa ya̱ ataiyahli tok a̱ ithana keyu hatuk osh, ilap inli i̱ nan isht ai ʋlhpiesa yo̱ ai a̱hlichi bʋnna kʋt, Chihowa hʋt nan isht ai ʋlhpiesa ataiyahli hatok okʋno ik im antio hatuk oke.

⁴ Yohmi ka na yimmi puta hokʋto isht ai ʋlhpiesa he mak o̱, Klaist ak osh ʋba nan ʋlhpisa nan ai ahni ka ai a̱hlichi yoke.

⁵ Yohmi ka Moses okʋt ʋba nan ʋlhpisa isht ai ʋlhpiesa ka isht anumpuli mʋt, Hatak ʋt yʋmma puta ka yʋmihinchik mʋt, isht ai okcha̱ya hi oke, achi tok oke.

⁶ Amba na yimmi isht ai ʋlhpiesa hokʋto yakohmichit anumpulishke: Chi chu̱kʋsh oka isht anumpulit, Kʋta hak osh ʋba yakni yoka ont chukowa hi o̱? achi kʋt, Klaist a̱ ont ilauelit aka isht ʋla chi̱ ho̱? achi ka, chik acho kashke.

⁷ Keyukmʋt, Kʋta hak osh ahofobi fehna ka ont chukowa hi o̱? achi kʋt, Klaist a̱ falaminchít tanichi cha, isht ʋla chi̱ ho̱? achi ka, chik acho kashke.

⁸ Amba yʋmmak ash ot nantuk achi̱? Anumpa hokʋt chi̱ bili̱kasi, chitakha anu̱kaka yak fehna, micha chi chu̱kʋsh anu̱kaka fo̱ka hoke; achi kʋt isht ai yimmi anumpa isht il anumpuli kak oke.

⁹ Chishno yokʋt chitih fehna ka Chitokaka Chisʋs oka isht otʋninchit ish anumpuli, micha illi tuk a̱ falaminchit Chihowa hak osh tanichi tok a̱ chi chu̱kʋsh oka isht chi yimmi hokmʋt, chi okcha̱ya hi oke, yʋmmʋt achi hoke.

¹⁰ Yohmi ka hatak ʋt chu̱kʋsh ak o̱ isht ai yimmi kak osh isht ai ʋlhpiesa hoke; micha itih hak o̱ Klaist a̱ isht otʋninchit anumpohonli kak osh isht ai okcha̱ya hoke.

¹¹ Yomohmi ka Holisso Holitopa yʋt, Kʋna fehna hoh kia i̱ yimmikmʋt, hofahya he keyu mak oke, ahanchishke.

¹² Yohmi ka Chu, micha Klik ita tuklo ka nana kʋt ai it im inla keyu hoke: yohmi ka Chitokaka moyuma i̱ shaiyahli miash inli hosh ilapa̱ i̱ pa̱ha̱ya moyuma ka i̱ nukha̱klo kʋt a chinto fehna hoke.

¹³ Yohmi ka kʋna hoh kia Chitokaka hohchifo ha̱ i̱ pa̱ha̱yakmʋt, okcha̱ya hi oke.

¹⁴ Yohmi ka katiohmit yʋmma i̱ yimmi hatuk keyu kʋt i̱ pa̱ha̱ya hinla ho̱? micha katiohmit yʋmma haklo hatuk keyu kʋt i̱ yimma hinla ho̱? micha katiohmit ʋbanumpa isht anumpuli yʋt iksho ka, hakla hinla ho̱?

¹⁵ Micha ʋlhtoka keyu kʋt katiohmit ʋbanumpa ha̱ isht anumpula hinla ho̱? holihi̱so kʋt, Isht it i̱ nanaiyʋchi ʋbanumpa isht anumpohonli, micha na hochukma isht anoho̱wa isht ai yukpa puta isht a̱ya ka iyi yʋt yakeh! aiokli fehnʋshke, ahanchishke.

¹⁶ Yohmi kia moyumʋt ʋbanumpa ha̱ im antia hatuk keyu. Yohmi ka Esaias ʋt, Chitokaka ma! kʋta hak osh pim anumpa ha̱ yimmi hatuk o̱? achishke.

¹⁷ Yakohmi hoka haklo kak osh isht a yimmi hoke: Chihowa im anumpa hʋt isht anuhumpa pulla kak o̱ a haklo hoke.

¹⁸ Yohmi kia haklo tuk keyu ho̱? I̱h! ai a̱hli fehna; yakni moyuma ka itih ola kʋt im oho̱na tok; micha anumpa puyuta kʋt yakni hatak ai ahanta moyuma ka im oho̱na tok oke, ʋno ʋto achi lishke.

¹⁹ Amba Islael ʋt ithana hatuk keyu ho̱? ʋno ʋto achi lishke. Ʋmmona ka Moses ʋt okla ho̱ keyu kia isht a chi nukta̱hlachi la hi oke, micha oklushi ik hopoyukso yo̱ isht a chi nokowʋchi la hi oke, achishke.

²⁰ Anonti Esaias ʋt nukwa̱ya iksho hosh, Sa hoho̱yo hatok keyu kʋt si ahayuchi tok; si a ponaha̱klo hatok keyu ka im otaiyani li hatok, achishke.

²¹ Amba ʋm antia he keyu, micha a̱ sanalit anumpuli okla hoka sabbak a̱ pit i̱ wiyeli li̱ shohombishke, Islael okʋno im ahanchishke.