Loman 1 - Chahta Holisso Holitopa 1886

Ʋbanumpa yimmi Lom aiasha ka Pal ʋt pit aiokpʋchi, 1; 16 Ʋbanumpa hʋt nana, micha nan ʋlhpiesa nana ho̱ isht otaiyani; 18 nanashʋchi moma ka Chihowa yʋt i̱ nukkilli; 21 nan ik ithano okla nan im ai ashʋchika yʋt nana hatuk okma anoli.

¹ Pal, Chisʋs Klaist in tishu, apostel toba kʋt, Chihowa im ʋbanumpa isht ʋtta hi osh ʋlhtoka tok ʋt,

² Yʋmma tikba pilla kash o̱ Chihowa hʋt Holisso Holitopa yak o̱ i̱ hopaii ʋhleha ha̱ isht ai anohonli kʋt,

³ Ilap Ushi Chisʋs Klaist hʋpin Chitokaka, yʋmmʋt haknip imma hokʋno Lewi isht atiaka yo̱ isht atoba kak atok;

⁴ Micha shilombish holitopa hokʋno illi tuk osh falamʋt tani kak osh Chihowa Ushi nan im ai a̱hli fehna kʋt isht otaiyani ai oklu̱ha tok:

⁵ Yʋmmak atuk pulla mak o̱ isht ai i̱ kana, micha ʋbanumpa isht‐ai ʋtta ʋlhtoka aiena ka il ai eshi ka, oklushi moyuma kʋt ʋbanumpa ha̱ im antia na ilap hohchifo hʋt isht a holitopa hi atok:

⁶ Yʋmmak o̱ ibai achʋfʋt Chisʋs Klaist a̱ im a hʋchi ʋlhtoho̱ka tok:

⁷ Lom aiasha moyuma Chihowa i̱ holitopa, ʋbanumpuli tohomba tok moyuma ka Pi̱ki Chihowa, micha Chitokaka Chisʋs Klaist ita tuklo nan isht i̱ kana, micha nan isht it i̱ nanaiya ita tuklo kʋt hʋchi anukfoyukashke.

⁸ Ʋmmona ka Chisʋs Klaist ak atuk mak o̱ hʋsh moyuma ka hʋch ithaiyanʋt, na hʋchi yimmi hoka annoho̱wʋt yakm moyuma ka a hlopulli kak o̱, an Chihowa ya̱ yak oke, pit im ai ahni li hoke.

⁹ Yohmi ka yʋmmak oka ilap Ushi im ʋbanumpa hak o̱ ai isht sa shilombish oka isht in toksahanli li kʋt, anumpa ilbʋsha anumpuli li puta kʋt pit hʋch ithaiyana bieka hosh, isht hʋchi anumpohonli li kʋt ak isso kamohmi hoka, Chihowa yak osh nan atokowa si anoli yoke.

¹⁰ Himak a̱ yohma he yoba tuk o̱ nitak ʋt ik hopako kia achukma biekʋt a̱yʋt, Chihowa yak osh ai ahni pulla na hʋchim ona la he ak osh asihi̱hla lishke.

¹¹ Yohmi ka hʋchi pisa sa bʋnna fehna kʋt, shilombish isht im achukma he yak o̱ hʋchi̱ hopela li̱, nana ka isht hʋchi hlampka hi atok.

¹² Ilʋppʋt nana ka hʋch ibai yukpa li hokbano, na yimmi bi̱ka pia hatuk oka, achi li hoke.

¹³ Yohmi ka itibapishi li ʋhleha ma! hʋch im ona la hi okʋt himonna̱ ʋm anukfihinla kʋt, nan‐ʋni kaniohmi ka hʋch itintakla ya̱ ai ishi li kʋt, Chentail inla ʋhleha ha̱ ai ihi̱shi li tok a̱ chiyuhmi ak inlikbano ahni li tuk kia, si ataklama na himak a̱ hʋch ik ithano ka he ai ahni li keyu hoke.

¹⁴ Klik, micha Bʋlbaha ʋhleha, nan ithana, nan ik ithano aiena ka ʋbanumpa ha̱ isht im anumpohonli la he ʋm ʋlhpisa hoke.

¹⁵ Yohmi hoka, ʋno yokʋto Lom hʋsh ai asha kak kia, ʋbanumpa isht hʋchim anumpohonli la chi̱ kʋt ʋm ʋlhtaha hoke.

¹⁶ Yohmi ka Klaist im ʋbanumpa ha̱ i̱ sa hofahya he keyu hoke: yohmi ka yʋmmak okʋt Chihowa nan im ai a̱hli pulla hatuk ak o̱ kʋna hosh yimmi puta hokʋto isht ai okcha̱ya hoke; ʋmmona ka Chu hak osh ai yʋmohmi ho̱, anonti Klik ʋt ai yʋmohmi ak inlishke.

¹⁷ Yohmi ka yʋmmak o̱ na yimmi ak atuk pulla kak o̱ Chihowa i̱ nan isht okchalinchi yʋt na yimmi ʋhleha ha̱ im otaiyani hoke; holihi̱so kʋt, Ai‐ʋlhpiesa yokʋto na yimmi pulla kak osh isht okcha̱ya hi oke, achi hoka.

¹⁸ Yohmi ka Chihowa ʋba yakni binili nan isht i̱ nukkilli yʋt hatak ʋt Chihowa ik holitoblo, micha nan ai ʋlhpiesa keyu yʋmohmi puta kʋt anumpa ai a̱hli ka ataklʋmmi kak o̱ onʋtuyula hosh otaiyani hoka.

¹⁹ Yohmi ka Chihowa imma ka isht ithʋna hinla ka ilap inli kʋt isht otaiyani hoka, Chihowa yak osh i̱ haiakʋchi hatuk oka.

²⁰ Yohmi ka yakni, micha nan oklu̱ha ʋba ai asha kʋt toba tok takla ka nana nishkin isht pisa he keyu Chihowa immi puta ka akostininchi fehna kʋt nan oklu̱ha tohomba tok a̱ Chihowa nan okluha im ai a̱hli, micha okcha̱yʋt bilia yoka isht akostininchi hatuk osh nan isht a miha hi ʋt ik im ikshoshke.

²¹ Yohmi ka Chihowa yoka ithana ha yokʋt, Chihowa chohmichit ik holitoblo kish, yak oke ik im ai ahno, amba im anukfila kʋt nan isht ik ahobo tobʋt, chu̱kʋsh anukfila iksho yʋt okhlilit kʋnia tok.

²² Yʋmmʋt hopoyuksa ilahobi hosh ik hopoyukso toba tok.

²³ Micha Chihowa illa he keyu isht a holitopa ya̱ kanchit na holbʋt toba hatak illa he, micha hushi, micha nampoa iyi ushta, micha nana balali puta aiena ka holbʋt toba ho̱ holitobli tok.

²⁴ Yʋmohmi hatuk ak o̱ Chihowa hokʋt ilap inli chu̱kʋsh okpulo nan ai ahni puta kak atuk mak o̱ na liteha ya̱ a yʋmohmit, ilap haknip puta kash inli isht ik iti hofahyali, im ai ahni tok ak inlishke:

²⁵ Yohmi ka yʋmmʋt Chihowa i̱ nan ai a̱hli yoka holabi yo̱ isht ai ikbi cha, natoba yak o̱ aiokpʋchit, in toksahanli kʋt Nan ikbi ya̱ i̱ shahlichi tok: yʋmmak okʋto holitopʋt bilia yoke. Amen.

²⁶ Ilʋppak atuk pulla kak o̱ Chihowa hʋt ant ik yʋmohmi ai ahni ho̱, haui isht ile hofahyali ilaiyuka ka ai yʋmohmi tok. Yohmi kʋt ohoyo hak kia nana ka ai yʋmohma he atuk ash o̱ ai inlʋchit, ohoyo hʋt ai yʋmohma he atuk keyu ka yʋmohmi tok.

²⁷ Mihma nakni yak kia ohoyo hak o̱ ai yʋmohma he atuk ʋt issa cha, it i̱ haui anukfilli kʋt luhu̱wa fehna mʋt, nakni ʋt nakni bi̱ka ka isht a hofahya yak o̱ it i̱ yʋmihinchi hosh, ilap nan ai ashʋchika isht ʋlhtoba ai ʋlhpiesa mak o̱ ilap ash inli hosh ihi̱shi tok.

²⁸ Micha Chihowa hoka ithaiyana ka ik bʋnno hatuk oka, Chihowa hʋt ant ik yʋmohmi ai ahni ho̱, im anukfila okpulo yoka nan isht ai ahni hosh, nan isht a hofahya he puta ka yʋmihinchi tok.

²⁹ Yohmi hosh nan ai ʋlhpiesa keyu, itin luma̱ka, nan okpulo anukfilli, nan anushkunna, inla chu̱kʋsh hotopali bʋnna, nan it i̱ potʋnno, hatak bi̱ka ʋbi, itachowa, it i haksichi, nan isht i̱ nukkilli, inla lumʋt na mihachi aiena ka isht ai alotowʋt kʋnia hatuk osh,

³⁰ Inla ya̱ ashakachit na mihachi puta, Chihowa i̱ nukkilli ʋhleha, na hofahyalit isht anumpuli, ilefehnʋchi, ilauata, nan isht ik achukmo puta ihi̱kbi, i̱ki, ishki ita tuklo ik im antio,

³¹ Nan im anukfila iksho, nan it im ʋlhpisa kobʋffit shahli, im ʋlla i̱ hullo ik im iksho, it i̱ hopohla himma keyu, it i̱ nukha̱klo ik im iksho:

³² Yʋmmak okʋt Chihowa i̱ nan ʋlhpisa yʋt, kʋna hosh nana yʋmma chiyuhmi ka yʋmihinchi hokʋt isht ai illa he ʋlhpiesa achi ka ithana kia; yʋmma yʋmihinchi kak bano keyu, amba kʋna hosh yʋmihinchik mak o̱ isht im ai achukma hoke.