Lefitikʋs 9 - Chahta Holisso Holitopa 1886

¹ Yʋmohmi ma nitak ont isht untuchina ma, yakohmi tok; Moses ʋt Alon micha ushi ʋhleha, micha Islael asʋnonchi ʋhleha aiena ka̱ pit hoyo tok.

² Mihmʋt Alon a̱, Nan ashʋchi im issa chi̱ mak o̱ wak ushi himita ya̱, micha nahukmit im issa chi̱ ho̱, chukfi nakni aiokpulo iksho ho̱ ish ieshi cha Chihowah itikba ya̱ ish im issashke.

³ Mikmʋt Islael im ʋlla ʋhleha ha̱ im anumpulit, nan ashʋchi im issa chi̱ mak o̱, issi kosomushi ya̱ hʋsh ishashke; micha nahukmit aiokpʋcha chi̱ ho̱, micha wak ushi, micha chukfʋlhpoa ushi aiokpulo iksho ho̱ afʋmmi ʋmmona bi̱ka ya̱ hʋsh ieshashke.

⁴ Yʋmohmikmʋt itin nanaiyʋchi im issa ya̱ Chihowah itikba ya̱ ʋbit isht ai okpʋchi ya̱ wak hobʋk, micha chukfi nakni a̱ nan ilhpak im issa bila itaiyuma ka̱ aieninchashke; himak nitak a̱ Chihowah yʋt auet hʋchim otʋna chi̱ hoka, ish achashke, achi tok.

⁵ Mikma Moses ʋt nana im apesa tuk ak o̱ okla moma in tabanekel itikba ya̱ isht aiʋla tok; mihma okla moma kʋt bili̱ka ʋla cha Chihowah itikba ya̱ ita hieli tok.

⁶ Yohmi ma Moses ʋt nana hʋsh yʋmihcha he Chihowah yʋt hʋchim apesa tok a̱ ilʋppak oke; yohmikma Chihowah nan isht im a holitopa yʋt hʋchim a haiaka hi oke, achi tok.

⁷ Mihmʋt Moses ʋt Alon a̱, Alta ya̱ ish ona cha, nan chim ashʋchi im issa, micha chin nahukmit im issa mak o̱ ish im issa hi oke; yohmi cha chishno inli, micha okla aiena pulla tuk mak o̱, nan isht a kashofa ish im ikba hi oke; yʋmohmi cha okla puta nan im issa ya̱ ish ema cha, Chihowah yʋt achi tuk mak o̱, nan isht i̱ kashofa ka̱ ish im ikba hi oke, im achi tok.

⁸ Yohmi ka̱ Alon ʋt alta ya̱ ona cha nan ashʋchi im issa wak ushi ilap immi atuk mak o̱ ʋbi tok.

⁹ Mihma Alon ushi ʋhleha hʋt issish atuk a̱ isht im ona tok; mihma yʋmmʋt ibbak ushi a̱ issish ash a̱ oklubichi tuk osh alta lʋpish puta ka̱ on lapalichi cha, alta akishtʋla ya̱ issish a̱ ʋhlatʋbli tok.

¹⁰ Amba nia, micha haiyihchi, micha nanashʋchi im issa sʋlakha paknaka onhlepa, yʋmma Chihowah yʋt Moses a̱ im apesa tuk mak o̱, alta paknaka ya a hukmi tok.

¹¹ Micha nipi, hakshup aiena ka̱ ʋlbina akohcha ka̱ hukmi tok.

¹² Micha na hukmit im issa ya̱ ʋbi tok; mihma Alon ushi ʋhleha hʋt issish atuk a̱ ima tok, mihma yʋmmʋt alta ai apakfopa ai o̱ fimmi tok.

¹³ Yʋmohmi cha na hukmit im issa im ita kʋshkoa, micha noshkobo aiena ka̱ ima tok; mihma alta paknaka ya̱ ai o̱ hukmi tok.

¹⁴ Micha takba fo̱ka, iyi puta aiena ka̱ achefʋt tahli cha nahukmit im issa alta ai onochi cha hukmi tok.

¹⁵ Micha okla puta nan im issa ya̱ isht ʋla cha issi kosoma, yʋmmʋt okla puta nan ashʋchi im issa yoka ʋbi cha ʋmmona chohmi tuk o̱, nan ashʋchi im issa atukmak o̱ chohmichit im issa tok oke.

¹⁶ Micha na hukmit im issa isht ʋla cha ayohmi chatuk ʋlhpesa ho̱ im issa tok.

¹⁷ Yʋmohmi cha nan ilhpak im issa ya̱ isht ʋla cha ibbak alota achʋfa ho̱ ishit alta paknaka onochit onnahinli nahukmit im issa ya̱ aieninchit hukmi tok.

¹⁸ Okla moma nan im itin nanaiyʋchi ʋbit isht aiokpʋcha he a̱ wak hobʋk, chukfi nakni aiena ka̱ ʋbi tok; mihma Alon ushi ʋhleha hʋt issish a̱ ishit ema na, alta paknaka aiapakfoblit o̱ fimmi tok.

¹⁹ Wak hobʋk micha chukfi nakni nia, hasimbish, haiyihchi, takba fo̱ka isht ompoholmo, sʋlakha on hlepa ya̱ ima tok.

²⁰ Mihma nia ya̱ ikkishi onochi tok; mihma nia yash alta paknaka ya̱ ai o̱ hukmi tok.

²¹ Mihma Alon ʋt ikkishi micha fulup isht impakimma ita tuklo na wali im issa chi̱ mak o̱, Moses ʋt apesa tuk mak o̱, Chihowah itikba ya̱ wali tok.

²² Mikmʋt Alon ʋt ilap ibbak a̱ okla ha̱ ʋba pit i̱ weli cha yukpali tok; nan ashʋchi im issa, na hukmit im issa, micha itin nanaiya im issa imi̱hi̱sʋt tahli mʋt ai i̱ filʋmmit akowa tok.

²³ Yohmi ma Moses micha Alon ita tuklot okla moma in tabanekel a̱ iba chukowa tuk osh kohcha mʋt, okla hash yukpali tok.

²⁴ Yʋmohmi ma luak osh Chihowah itikba ya̱ ʋttʋt kucha cha nahukmi im issa micha nia ʋt alta onʋtoyula ka̱ hukmi tok; yʋmmak o̱ okla hʋt pisa mʋt shakapa cha nashuka ya̱ aka isht hlipkaiyachi tok.