Lefitikʋs 8 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Alon micha ushi ʋhleha aieninchit, micha nafohka ya̱ micha isht ahama bila aieninchit, micha nanashʋchi im issa mak o̱ wak hobʋk, micha chukfi nakni tuklo, micha pʋska ik shatʋmmo kishi achʋfa aiena ho̱ ish ishashke.

³ Micha okla moma hoyot okla moma im ʋlhtipo okhissa ya̱ ish ai itʋnahlashke, im achi tok.

⁴ Mihma Chihowah yʋt ai i̱ miha tuk mak o̱, Moses ʋt yʋmihchi tok; mihma okla hʋt okla moma im ʋlhtipo okhissa ya̱ ai itʋnaha tok.

⁵ Mihma Moses ʋt okla moma ka̱, Ilʋppak osh yʋmohma chi̱ ho̱ Chihowah yʋt miha tok oke, im achi tok.

⁶ Mihmʋt Moses ʋt Alon micha ushi ʋhleha isht ʋla cha oka isht achifa tok.

⁷ Micha nafohka ya̱ fohkachechi mʋt ʋskofʋchi ya̱ ʋskofachechi cha nafohka holitompa fohkachechi mʋt efot a̱ fohkachechi tok; micha ʋskofʋchi inla fehna efot atakali yash isht ʋskofʋchechi tok.

⁸ Mihmʋt ikkishi alata yash i̱ nuchechi tok, micha ikkishi alata yash Ulim micha Hlʋmmim aiena ka̱ lapalichi tok.

⁹ Micha iahlipa hash noshkobo ha̱ on talali tok, micha iahlipa ha̱ ibitakla fehna ka̱ tʋli lakna patʋssa bitah holitopa yo̱ lapalichi tok. Chihowah yʋt Moses a̱ i̱ miha tuk mak o̱ yohmi tok.

¹⁰ Micha Moses ʋt isht ahama bila ya̱ eshi cha, ʋlhtipo micha nana anu̱kaka a̱sha tuk moma ka̱ ahʋmmi cha hullochi tok.

¹¹ Micha alta ya̱ untuklo ha isht o̱ fimmi tok, micha alta, mikma nan im ai ʋlhto moma, ampo mahaia chito, iyi aiena ka̱ hullocha chi̱ hosh ahʋmmi tok.

¹² Micha Moses ʋt hullocha chi̱ hosh isht ahama bila ya̱ Alon noshkobo ha̱ on hlatʋbli tok.

¹³ Micha Chihowah yʋt Moses a̱ i̱ miha tuk mak o̱ Moses ʋt Alon ushi ʋhleha ha̱ isht ʋla cha nafohka fohkʋchechi mʋt, ʋskofʋchi ya̱ ʋskofʋchechi cha shapo ya̱ shapolechi tok.

¹⁴ Micha nanashʋchi im issa mak o̱ wak hobʋk a̱ isht ʋla tok; mihma Alon micha ushi ʋhleha hʋt nan ashʋchi im issa mak o̱ wak hobʋk noshkobo ha̱ ibbak isht umbitepa tok.

¹⁵ Mihma ʋbi tok; mihma Moses ʋt issish a̱ eshi cha iti̱n nanaiyʋcha chi̱ mak osh alta lapish a̱ ibbak ushi isht o̱ fimmit fullohlechi cha, alta ya̱ kashoffi mʋt, hullochit issish ash alta akishtʋla ya̱ a hlatʋbli tok.

¹⁶ Micha ikfoka nia yʋt on a̱sha tuk moma, micha sʋlakha paknaka ya̱ i̱ hlapa, micha haiyihchi tuklo, micha i̱ nia moma ka̱ eshi cha Moses ʋt alta onochit hukmi tok.

¹⁷ Amba wak hobʋk ash, micha hakshup, micha nipi micha i̱ yʋlhki aiena kʋno, Chihowah yʋt Moses a̱ i̱ miha tuk mak o̱ binah ha̱ kocha ya̱ luak ishit a hukmi tok.

¹⁸ Micha hukmit im issa mak o̱ chukfi nakni a̱ isht ʋla tok; mihma Alon micha ushi ʋhleha hʋt chukfi nakni yash noshkobo ha̱ ibbak isht umbitepa tok.

¹⁹ Mihma ʋbi tok: mihma Moses ʋt issish a̱ alta ya̱ isht o̱ fimmit fullohlechi tok.

²⁰ Micha chukfi nakni yash bʋshlit tahli tok; micha Moses ʋt noshkobo, micha tushahli, micha nia aiena ka̱ hukmi tok.

²¹ Micha takoba, micha iyi aiena ka̱ oka isht achifa tok; micha Moses ʋt chukfi nakni yash mominchit alta onochit hukmi tok, na balama achukma mak o̱ ʋbit im issʋt hukmi, micha luak ishit hukmit Chihowah im issa tok; Chihowah yʋt Moses a̱ i̱ miha tuk mak o̱ yʋmohmi tok.

²² Micha chukfi nakni achʋfa, hullochi chukfi nakni ya̱ isht ʋla tok; micha Alon micha ushi ʋhleha hʋt chukfi nakni noshkobo ha̱ ibbak isht umbitepa tok.

²³ Mihma ʋbi tok; micha Moses ʋt issish a̱ eshi cha Alon haksobish wishakchi, micha isht impakimma ibbak ishki, micha isht impakimma iyi ishki aiena ka̱ o̱ lapalichi tok.

²⁴ Micha Alon ushi ʋhleha ha̱ isht ʋla cha Moses ʋt issish ash isht impakimma haksobish wishakchi, micha isht impakimma ibbak ishki, micha isht impakimma iyi ishki aiena ka̱ o̱ lapalichi tok; micha Moses ʋt issish ash alta ya̱ isht o̱ fimmit fullohlechi tok.

²⁵ Micha nia, micha hasimbish, micha anu̱kaka nia a̱sha tuk a̱, micha sʋlakha paknaka i̱ hlapa micha haiyihchi tuklo, micha i̱ nia, micha fulup isht impakimma aiena ka̱ ishi tok.

²⁶ Micha pʋska ik shatʋmmo kishi ʋlhto, Chihowah itikba talaia tuk a̱ pʋska ik shatʋmmo achʋfa ai ishit, micha pʋska bila yʋmmi, micha pʋska tapʋski achʋfa aiena ka̱ eshi cha, nia yash onochi mʋt, fulup isht impakimma ya̱ onochi tok.

²⁷ Mihmʋt moma ka̱ Alon ibbak a̱ fohki cha, ushi ʋhleha ibbak fohki mʋt, fahfulit im issa mak o̱ Chihowah itikba fahfuli tok.

²⁸ Mihma Moses ʋt ibbak a̱ akohchit im eshi cha ai o̱ hukmi alta ya̱ onochit hukmi tok, na balama achukma hullochi ya tok; luak ishit hukmit Chihowah im issa yoke.

²⁹ Micha Moses ʋt ikkishi ha̱ eshi cha fahfulit im issa mak o̱ Chihowah itikba fahfuli tok, yʋmmʋt hullochi chukfi nakni ya̱ Moses ak o̱ immi hatuk oka, Chihowah yʋt Moses a̱ i̱ miha tuk mak o̱ yʋmohmi tok.

³⁰ Micha Moses ʋt isht ahama bila ya̱ micha issish ʋt alta on a̱sha tuk a̱ eshi cha, Alon micha i̱ nafohka ya̱ o̱ fimmi mʋt, micha ushi ʋhleha, micha ushi ʋhleha i̱ nafohka ya̱ o̱ fimmi tok; micha Alon micha i̱ nafohka, micha ushi ʋhleha micha ushi ʋhleha i̱ nafohka ya̱ aieninchit hullochi tok.

³¹ Micha Moses ʋt Alon a̱ micha ushi ʋhleha ha̱ Okla moma im ʋlhtipo okhissa yak o̱ nipi ya̱ hʋsh a honashke, micha yʋmmak o̱, Alon micha ushi ʋhleha aienʋt ai ʋpashke, achi li tok mak o̱, yʋmmak o̱ hullochi pʋska kishi a̱lhto aieninchit hʋshpashke.

³² Micha nipi, micha pʋska aiena kʋt a̱sha moma ka̱ luak ishit hʋsh hukmashke.

³³ Micha okla moma im ʋlhtipo okhissa ya̱ nitak untuklo itin takla ka̱ hʋchi hullochi nitak ʋt ont ik taho ki̱sha ka̱, hʋchik kohcho kashke nitak untuklo ho̱ hʋchi hullocha chi̱ hoke.

³⁴ Hʋchi kashoffa chi̱ hosh himak nitak a̱ yʋmihchi tuk ʋt yohma chi̱ Chihowah yʋt miha tuk oke.

³⁵ Yʋmohmi hoka nitak micha ninak moma ka̱ okla moma im ʋlhtipo anu̱kaka hʋsh a̱sha na nitak untuklashke, micha Chihowah yʋt atokolit miha tuk a̱ hʋsh holitoblashke; yohmi hosh ik hʋchillo kashke; yʋmmak o̱ a̱ miha tuk oka; im achi tok.

³⁶ Yʋmohmi ma Chihowah yʋt Moses a̱ tohnot i̱ miha tuk mak o̱, Alon micha ushi ʋhleha aiena kʋt nana moma ka̱ yʋmihchi tok.