Lefitikʋs 7 - Chahta Holisso Holitopa 1886

¹ Micha ilʋppak osh yoshoba im issa nan ʋlhpisa hoke: holitopa i̱ shahli hoke.

² Hukmit im issa ai ʋbi ak o̱ yoshoba im issa ya̱ ai ʋba hi oke; mikma issish a̱ alta o̱ fimmit apakfobla hi oke.

³ Micha nia moma ka̱ im issa hi oke: hasimbish micha nia yʋt ikfoka ompoholmo aiena.

⁴ Micha haiyihchi tuklo, micha nia on a̱sha yʋmmʋt ikeksa bili̱ka a̱sha, micha i̱ hlapa yʋmmʋt sʋlakha paknaka a̱sha haiyihchi aiena ka̱ ishashke.

⁵ Micha na holitompa isht ʋtta yʋt luak ishit hukmit Chihowah im issa mak o̱ alta onochit hukma hi oke; yoshoba im issa hoke.

⁶ Naholitompa isht ʋtta nakni moma kʋt ʋpashke; a holitopa ak o̱ ai ʋpashke, holitopa i̱ shahli hoke.

⁷ Nanashʋchi im issa yʋt kaniohmi hatuk a̱ yoshoba im issa yʋt yohmi akinli hoke, nan ʋlhpisa im achʋfa hoke: isht atobbichi tuk naholitompa isht ʋtta yak osh isha hi oke.

⁸ Hatak kʋna hosh hukmit im issa ya̱ naholitompa isht ʋtta yʋt hukmit im issa ya̱ im issa tuk naholitompa isht ʋtta fehna kak osh hakshup a̱ il ai i̱shashke.

⁹ Apalʋska ya̱ apalʋska tuk ilhpak im issa moma, micha ai ʋlwʋsha, micha ampo mahaia ya̱ a nunanchi tuk moma aiena kʋt naholitompa isht ʋtta yʋt im issa tuk mih fehna kak o̱ immi hashke.

¹⁰ Micha bila aiyoma tuk micha shila, ilhpak im issa moma ka̱ Alon ushi ʋhleha moma kʋt itilaui bieka hosh ishashke.

¹¹ Micha ilʋppak osh itin nanaiyʋchit im issa, ʋbit im issa Chihowah im issa hi ya̱ nan ʋlhpisa hoke.

¹² Yakoke, ahnit isht aiokpʋchi yo̱ im issakmʋt, yak oke ahnit isht aiokpʋchi ya̱ pʋska ik shatʋmmo bila aiyoma yo̱, micha pʋska lapushki bila ahama, micha bota tohbi lipehbi pʋska bila aiyoma aienʋt ʋlwʋsha ho̱ im issashke.

¹³ Pʋska yʋmma im issakmʋt nan im issa ya̱ pʋska shatʋmmi, micha yakoke ahnit ʋbit im issa, itin nanaiyʋchit im issa aieninchit im issashke.

¹⁴ Micha isht aiokpʋchi ya̱ moma kash achʋfa ka̱ Chihowah i̱ weli yo̱ im issa hi oke; mikma itin nanaiyʋchit im issa issish a̱ fimmi tuk naholitompa isht ʋtta kak o̱ immi ha chi̱ hoke.

¹⁵ Mikma yakoke, ahnit isht aiokpʋchi ʋbit im issa itin nanaiyʋchit im issa yash nipi ya̱ im issa nitak mihmakinli ho̱ ʋpashke; a̱sha na onna he keyu hoke.

¹⁶ Amba anumpa il onochi tok ash im issa, keyukmʋt ilap ahnit im issa yokmʋno, ʋbit im issa yʋt im issa mih nitak akinli ka̱ ʋpashke, atukmʋt onna yak kia a̱sha tuk a̱ ʋpashke.

¹⁷ Amba ʋbit im issa nipi ʋt a̱sha na nitak ont atuchina tuk ʋt, luak ishit lua hi oke.

¹⁸ Micha ʋbit im issa itin nanaiyʋchi im issa nipi yash nitak ont atuchina ka̱ ikpa nana kia im aiokpʋcha he keyu, micha im issa tuk ʋt isht im ʋlhpisa he keyu hoke; nan ishit yuwala hi oke; shilombish kʋna hosh ʋpakmʋt ilap nan ashʋchi onʋtonla hi oke.

¹⁹ Micha nipi yosh nana liteha ya̱ haleli tuk a̱, ʋpa he keyu, luak ishit hukma hi oke, micha nipi yokʋno, kashofa moma kʋt ʋpa hi oke.

²⁰ Amba shilombish nana hosh im a liteha yʋt onʋtonla hosh, ʋbit im issa itin nanaiyʋchi im issa Chihowah immi ho̱ ʋpakmʋt, shilombish yʋmmak kia im okla ha̱ ai i̱ filʋmmit fiopa tʋpa hi oke.

²¹ Micha shilombish kʋna hosh nana liteha, hatak liteha, keyukmʋt nampoa liteha, keyukmʋt nan isht yuwala liteha nana kia potoli cha, ʋbit im issa itin nanaiyʋchi im issa Chihowah immi ha ʋpakmʋt, shilombish yʋmma fehna kʋt im okla im ai itin takla ya̱ i̱ filʋmmit fiopa tʋpa hi oke; ish im achashke, im achi tok.

²² Mihma Chihowah yʋt Moses a̱ im anumpulit,

²³ Islael im ʋlla ʋhleha ha̱ im anumpulit, Wak nia, keyukmʋt chukfi, keyukmʋt issi kosoma nia nana kia hʋshpa he keyu hoke.

²⁴ Micha nampoa ilap inlit illi tuk nia, micha nampoa nana hosh niblit ʋbi tuk nia ya̱, nana kaniohmicha hinla, yohmi kia ik kaniohmi nana kia hʋshpa he keyu hoke.

²⁵ Kʋna hoh kia nampoa nia, yʋmmak oka hatak ʋt luak ishit hukmit Chihowah im issa chatuk a̱ ʋpakmʋt, ʋpa tuk shilombish fehna kʋt im okla im ai itin takla i̱ filʋmmit fiopa tʋpa hi oke.

²⁶ Micha hʋsh aiasha ya̱ kanima kia hushi okma keyukmʋt nampoa issish nana kia hʋshpa he keyu hoke.

²⁷ Shilombish kʋna hosh issish kaniohmi kia ʋpakmʋt shilombish yʋmma fehna kʋt im okla im ai itin takla i̱ filʋmmit fiopa tʋpa hi oke, ish im achashke, im achi tok.

²⁸ Mihma Chihowah yʋt Moses a̱ im anumpulit,

²⁹ Islael im ʋlla ʋhleha ha̱ im anumpulit, Kʋna hosh ʋbit im issa, micha itin nanaiyʋchi im issa ya̱ Chihowah im issakmʋt ʋbit im issa, micha itin nanaiyʋchi im issa ya̱ Chihowah hak o̱ isht im onashke.

³⁰ Luak ishit hukmit Chihowah im issa ya̱ ilap ibbak akinli hosh isht ona hi oke, nia micha ikkishi aieninchit isht ʋlashke; yohmi na Chihowah itikba fahfuli mak o̱ fahfulashke.

³¹ Mikma nia ya̱ naholitompa isht ʋtta yʋt alta onochit hukmashke; amba ikkishi hʋto Alon micha ushi ʋhleha hak o̱ immi hashke.

³² Micha ʋbit im issa itin nanaiyʋchi im issa ya̱ wahlit im issa mak o̱ fulup isht impak imma ya̱ naholitompa isht ʋtta yak o̱ ish imashke.

³³ Alon ushi ʋhleha ha̱ kanima hosh itin nanaiyʋchi im issa issish micha nia aiena ka̱ im issa hokʋt mihi yosh fulup isht impak imma ya̱ immi mak osh ishashke.

³⁴ Islael im ʋlla ʋhleha im ai itin takla ya̱ nan ʋlhpisa bilia mak o̱ ʋbit im issa, micha itin nanaiyʋchi im issa ya̱ ai ishit fahfuli ikkishi micha wahli fulup a̱ Islael im ʋlla ʋhleha im ai ishit naholitompa isht ʋtta, Alon micha ushi ʋhleha ha̱ ima li tuk oke, ish im achashke, im achi tok.

³⁵ Ilʋppak osh Alon nan ahama tuk ʋt, micha ushi ʋhleha nan ahama tuk ʋt, luak ishit hukmit Chihowah im issa yʋt naholitompa isht ʋtta ya̱ Chihowah nan isht im ʋtta chi̱ ho̱ atokoli nitak ma immi toba tok oke.

³⁶ Yʋmmak oka im ai unchuloli hlopulli ka̱ nan ʋlhpisa bilia mak o̱ Chihowah yʋt nan ahʋmmi nitak mʋt Islael im ʋlla ʋhleha hʋt ima he im apesa tok oke.

³⁷ Ilʋppak osh hukmit im issa, micha ilhpak im issa, micha nanashʋchi im issa, micha yoshoba im issa, micha hullochi im issa, micha ʋbit im issa itin nanaiyʋchi im issa aiena nan ʋlhpisa mak o̱;

³⁸ Chihowah yʋt Moses a̱ Sainai nʋnih ha̱, Islael im ʋlla ʋhleha hʋt Chihowah ya̱ nan im issa chi̱ ho̱ i̱ miha nitak mʋt Sainai yakni haiaka ya̱ ai im apesa tok mak oke.