Lefitikʋs 6 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Shilombish osh nan ashʋchit Chihowah i̱ yoshoba ya̱ yʋmihchit i̱sha chi̱ ho̱ nana ibbak fohki tuk, keyukmʋt itapela yatuk o̱ in chuka a bili̱ka hatak o̱ i̱ holabi, keyukmʋt nana ho̱ afoa hosh im eshi, keyukmʋt in chuka a bili̱ka hatak o̱ haksichi tuk;

³ Keyukmʋt nana kʋnia tuk o̱ ahayuchi tuk osh yʋmma holabi, micha holabi hosh anumpa kʋllo anumpuli, ilʋppa moma kanima ho̱ hatak ʋt yʋmihchi cha ai ashʋchikmʋt,

⁴ Yohmikmʋt yakohma hi oke, nan ashʋchi tuk osh nan ashʋchi kʋt im ai̱ahli hokʋt, nana im afoa hosh im eshi tuk ʋt i̱ falʋmminchashke; keyukmʋt haksichi hosh ishi tuk, keyukmʋt im i̱sha chi̱ ho̱ ibbak fohki tuk, keyukmʋt nana kʋnia ahayuchi tuk,

⁵ Keyukmʋt nana moma holabi hosh anumpa kʋllo anumpuli tuk osh yoshoba tuk ʋt nan im issa nita kmʋt nana ka̱ i̱ falʋmminchashke; micha kʋshkoa ishit tahlapi ho̱ im a lapalichi cha kʋna ho̱ immi hatuk a̱ imashke.

⁶ Micha na yoshoba im issa chi̱ ho̱ nan ʋlhpoa chipunta ai ishit, chukfi nakni ai okpuloka iksho ho̱ ish i̱ hotehna tuk a̱ aieninchit, nayoshoba tuk ʋt im issa Chihowah isht im onʋt naholitompa isht ʋtta ya̱ isht im onashke.

⁷ Mikma naholitompa isht ʋtta yʋt Chihowah itikba ai i̱ kashoffa hi oke; micha yoshobʋt nana moma yʋmihchi tuk ʋt i̱ kashofashke, achi tok.

⁸ Mihma Chihowah yʋt Moses a̱ im anumpulit,

⁹ Alon micha ushi ʋhleha ha̱ ish i̱ mihʋt, Ilʋppʋt hukmit im issa i̱ nan ʋlhpisa hoke. Alta ya̱ onʋtuyulʋt luhu̱wa na, ninak ʋt ont hlopullit onna, micha alta ya̱ luak ʋt a chieyʋt luhu̱wa yoka, hukmit im issa yoke.

¹⁰ Micha na holitompa isht ʋtta yʋt i̱ linen na fohka ya̱ ishit fohkashke, micha i̱ linen obala fohka ya̱ nipi ya̱ ishit fohkashke; micha luak ʋt hukmit tahli tuk hituk chubbi, micha hukmit im issa aiena alta on a̱sha ka̱ eshi cha alta apotoa kak o̱ ashachashke.

¹¹ Mikmʋt i̱ nafohka ya̱ shu̱fi cha nafohka inla ho̱ ishit fohka cha, hituk chubbi bina kocha akashofa ho̱ isht onashke.

¹² Mikma alta ya̱ luak on a̱sha kʋt a luhu̱wa hi oke; mosholicha he keyu hoke; mikma na holitompa isht ʋtta yʋt onnahinli momakma iti onochit hukmi cha hukmit im issa ya̱ achukmalit onochi beka hi oke; micha itin nanaiyʋchit im issa nia ya̱ hukma hi oke.

¹³ Luak ʋt alta on chieyʋt luhu̱wa na bilia hi oke, moshola he keyu hoke.

¹⁴ Micha ilʋppak osh hukmit im issa nan ʋlhpisa hoke; Alon ushi ʋhleha hak osh Chihowah itikba alta aiasha ya ai im issa hi oke.

¹⁵ Micha ilhpak im issa bota tohbi, micha bila on a̱sha tuk aiena, micha fila̱kinsen ilhpak im issa on a̱sha tuk moma aiena ka̱ ibbak alota achʋfa ho̱ eshi cha na balama achukma ka̱ isht ithaiyana mak o̱ alta onochit Chihowah ya̱ i̱ hukma hi oke.

¹⁶ Micha atampa yano Alon micha ushi ʋhleha aiena hosh ʋpa hi oke; pʋska ik shatʋmmo aiena ho̱ aholitopa ak o̱ ai ʋpa hi oke; okla moma im ʋlhtipo i̱ wanuta ya̱ ai ʋpa hi oke.

¹⁷ Isht shatʋmmi aienʋt pʋska he keyu hoke. Luak ishit hukmit im issa ya̱ i̱ kashapa mak o̱ ima li tuk oke. Yʋmmʋt nanashʋchi im issa, micha nayoshoba im issa chihyuhmit holitopa kʋt moma i̱ shahli hoke.

¹⁸ Alon im ʋlla ʋhleha ibafo̱ka nakni moma kʋt ai ʋpa hi oke. Luak ishit hukmit Chihowah im issa yʋt hʋchim ai unchuloli ha̱ nan ʋlhpisa bilia ya̱ chi̱ hoke; potoli aiyukali kʋt holitopa hi oke, im achi tok.

¹⁹ Micha Chihowah yʋt Moses a̱ im anumpulit,

²⁰ Ilʋppak osh Alon micha ushi ʋhleha im issa yosh nan ahama nitak fehnakmʋt Chihowah im issa hi oke; ilhpak im issa bilia mak osh bota tohbi lipehbi efah kʋshkoa ont ishit pokoli ho iklʋnna ka̱ onnahinlikma im issa hokmʋt, opiakma iklʋnna ka̱ im issashke.

²¹ Ampo mahaia ʋlhto ho̱ bila ishit yʋmmicha hi oke; atuk osh palʋskakma isht ish chukowa hi oke; micha ilhpak im issa palʋskʋt tushahli ya̱ na balama achukma mak o̱ Chihowah ish im issa hi oke.

²² Mikma ushi ʋhleha naholitompa isht ʋtta yʋt ʋlhtobʋt nan ahama tuk ʋt im issa hi oke. Chihowah i̱ nan ʋlhpisa bilia hoke: momʋt lua hi oke.

²³ Ilhpak im issa na holitompa isht ʋtta ilap aiyuka hokʋt momʋt lua hi oke; ʋpa he keyu hoke, im achi tok.

²⁴ Mihma Chihowah yʋt Moses a̱ im anumpulit,

²⁵ Alon micha ushi ʋhleha im anumpulit, Ilʋppak osh nanashʋchi im issa nan ʋlhpisa yoke; hukmit im issa ai ʋbi ak o̱ nan ashʋchi im issa ya̱ Chihowah itikba ai ʋbashke; holitopa i̱ shahli hoke.

²⁶ Nan ashʋchi ho̱ im issa tuk, naholitompa isht ʋtta ak osh ʋpashke. Okla moma im ʋlhtipo i̱ wanuta aholitopa ak o̱ ai ʋpa hi oke.

²⁷ Nana hosh nipi yash halelikmʋt holitopa hi oke; micha yʋmma issish ʋt nafohka nana ho̱ ai o̱ fimimpa tuk ma, ai o̱ fimimpa tuk a̱ aholitopa yak o̱ ish ai achifashke.

²⁸ Amba lukfi shuti ahonni tuk ano kola hi oke, micha asonak lakna yo̱ ahonni tuk mʋno, kasholichi cha, oka isht achifa hi oke.

²⁹ Naholitompa isht a̱sha nakni moma kak osh ʋpa hi oke; holitopa i̱ shahli hoke.

³⁰ Mikma nan ashʋchi im issa nana kia itin nanaiyʋcha chi̱ hosh issish a̱ okla moma im ʋlhtipo aholitopa ya̱ isht chukowa tuk a̱ ʋpa he keyu hoke; luak ishit lua hi oke.