Lefitikʋs 5 - Chahta Holisso Holitopa 1886

¹ Micha shilombish nan ashʋchikmʋt anumpa kʋllo anumpuli ka̱ haklo, na pi̱sa yosh pi̱sakmá, keyukmʋt akostininchikma akaniohmikia, ik anolokmʋt nan ashʋchi ʋt onʋtonlashke.

² Keyukmʋt shilombish osh nana liteha yo̱ potoli, poa liteha illi okmá keyukmʋt ʋlhpoa liteha illi okmá, keyukma na balahanli liteha yokmá nana hatuk oh kia, atuk osh ik ithano hatukmʋt, yʋmmak kia liteha cha nan ashʋchi ʋt onʋtonla hi oke.

³ Keyukmʋt hatak liteha yo̱ haleli tukma, liteha nana ho̱ isht litehʋt liteha hatukma, atuk osh ik ithano tukmʋt ithanakmʋt nanashʋchi ʋt onʋtonla hi oke.

⁴ Keyukmʋt shilombish osh nana ik achukmo micha nana achukma nana hoh kia, anumpa kʋllo il onochit ila piti ʋlbi o achit yʋmihcha chi̱ ikithano hosh miha hokmʋt, atuk osh akostininchikmʋt anumpa yʋmmak ash achʋfa kanima ka̱ nan ashʋchi im aia̱hla hi oke.

⁵ Atukma yakohma hi oke: ilʋppa achʋfa kanima ka̱ nan ashʋchi tuk ʋt im ai a̱hlikmʋt, nana yʋmma ashʋchi tuk ʋt il ai anolashke.

⁶ Mikmʋt nan ashʋchi ya̱ ashʋchi tuk ʋt yoshobʋt nan im issa ya̱ ʋlhpoa shipunta tek o̱ ai ishit chukfushi, keyukmʋt issi kosomushi yo̱ issi kosoma ai ishit nan ashʋchi im issa ya chi̱ ho̱ Chihowah isht im onashke: mikma nanashʋchi tuk a̱ naholitompa isht ʋtta yʋt i̱ kashofashke.

⁷ Atuk o̱ yoshuba yʋmohmi tuk ʋt chukfushi ʋt ik im iksho mʋt, pʋchi yoshoba tuklo, keyukmʋt pʋchushi tuklo ho̱ Chihowah isht im onashke: achʋfa hʋt nan ashʋchi im issa yokma, achʋfa kʋt hukmit im issa yashke.

⁸ Micha na holitompa isht ʋtta ya̱ isht im onashke; mikma yʋmmak osh ti̱kba nan ashʋchi im issa yak o̱ im issʋt noshkobo ha̱ shʋnnit tʋblashke; yohmi kia ita pahlʋlla he keyu hoke.

⁹ Micha nan ashʋchi im issa issish a̱ alta lapalika o̱ fimmi cha, issish ʋt a̱sha moma ka̱ alta akishtʋla ya̱ shʋnnit hlatʋblashke; nan ashʋchi im issa yoke.

¹⁰ Micha atukla ka̱ ayʋmihchi chatuk a̱ yʋmihchit hukmit im issa yo̱ im issashke: nan ashʋchi ya̱ ashʋchi tuk a̱ na holitompa isht ʋtta yʋt i̱ kashoffikma i̱ kashofashke.

¹¹ Amba pʋchi yoshaba tuklo, keyukmʋt pʋchushi tuklo kʋt ik im ikshokmʋt, nan ashʋchi tuk ʋt nan ashʋchi im issa im issa kʋt bota tohbi lipehbi efah kʋshkoa isht pokoli ho̱ isht onashke; bila yʋmmicha he keyu, micha fila̱kinsen onocha he keyu hoke; nan ashʋchi im issa yoka.

¹² Yohmikmʋt na holitompa isht ʋtta isht im ona hi oke, mikma na holitompa isht ʋtta yʋt ibbak alota achʋfa ho̱ ishi cha isht ithaiyana mak o̱ alta onochit hukma hi oke; luak ishit hukmit im issa yʋt ayʋmihchit Chihowah im issa chatuk mak o̱ yʋmihcha hi oke: nan ashʋchi im issa yoke.

¹³ Mikma nanashʋchi achʋfa ilʋppa kanima ho̱ ashʋchi tukma naholitompa isht ʋtta yʋt i̱ kashoffikma i̱ kashofashke; mikma atampa kʋt ilhpak im issa chohmi naholitompa isht ʋtta immi hashke, ish im achashke, im achi tok.

¹⁴ Micha Chihowah yʋt Moses a̱ im anumpulit,

¹⁵ Shilombish osh na yoshoba yʋmihchi, micha ik ithano hosh Chihowah i̱ naholitopa ya̱ im ashʋchi tuk, yohmikmʋt nayoshuba tuk ʋt na yoshoba im issa yo̱ chukfushi nakni ai okpuloka iksho ho̱, ish hotihna ho̱ tʋli hʋta shekel kanohmi, aholitopa shekel ʋlhpisa mak o̱ Chihowah isht im onashke.

¹⁶ Micha na holitopa okpʋni tuk ʋt achukmalashke, micha kʋshkoa ishit tahlapi ho̱ apotali cha naholitompa isht ʋtta ya̱ imashke; mikma naholitompa isht ʋtta yʋt nanashʋchi im issa yash chukfi nakni yash isht i̱ kashoffikma i̱ kashofashke.

¹⁷ Micha shilombish osh nan ashʋchit Chihowah i̱ nan ʋlhpisa hʋt olʋbi tuk ilʋppa kanima kia yʋmihchikmʋt ik ithano hatuk oh kia nan ashʋchi ʋt im ai a̱hli cha nanashʋchi ʋt onʋtuyula hi oke.

¹⁸ Na yoshoba im issa ya̱ ʋlhpoa chipunta ai ishit chukfi nakni ai okpuloka iksho ho̱ ish i̱ hotehna tuk a̱ aieninchit na holitompa isht ʋtta isht im onashke, mikma naholitompa isht ʋtta yʋt nan ik ithano hosh ashʋchi tuk a̱ na yoshoba im issa yash isht i̱ kashoffikma i̱ kashofashke.

¹⁹ Na yoshoba im issa yoke; Chihowah i̱ yoshoba tuk o̱ a̱hli hoke, im achi tok.