Lefitikʋs 4 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Islael im ʋlla ʋhleha ha̱ im anumpulit, Hatak osh ik ithano hosh nana ashʋchit Chihowah i̱ nan ʋlhpisa, yʋmmak oka yʋmihcha he ʋlhpesa tuk keyu hosh yʋmma kanima kia kobʋffikmʋt.

³ Na holitompa isht ʋtta nan ahama tuk osh okla nan ashʋchi ya̱ yʋmihchit ashʋchikmʋt, yohmikmʋt nan ashʋchi ya̱ ashʋchi tuk ʋt nan ashʋchi im issa ya̱ wak hobʋk himita ai okpuloka iksho ho̱ Chihowah isht im onashke.

⁴ Micha wak himita ya̱ Chihowah itikba okla moma im ʋlhtipo okhissa ya̱ isht onashke; micha wak hobʋk noshkobo ya̱ ibbak isht ombitepashke: micha Chihowah itikba ya̱ wak hobʋk ash ai ʋbashke.

⁵ Mikma na holitompa isht ʋtta nan ahama tuk ʋt wak hobʋk ash im issish a̱ ai eshi cha okla moma im ʋlhtipo ya̱ isht onashke.

⁶ Micha na holitompa isht ʋtta yʋt ibbak ushi ya̱ issish ash oka hilechi cha Chihowah itikba a holitopa natakali itikba ya̱ issish a̱ untuklo ha fimmashke.

⁷ Micha na holitompa isht ʋtta yʋt issish kanohmi na balama achukma a hukmi alta Chihowah itikba okla moma im ʋlhtipo anu̱kaka hikia ka̱ lapish a̱ on lapalichashke; micha wak hobʋk im issish moma ka̱ ai onochit hukmit im issa alta, yʋmmʋt okla moma im ʋlhtipo okhissa hikia ka̱ akishtʋla ya̱ pit hlatʋblashke.

⁸ Micha nan ashʋchi im issa ya chi̱ ka̱, wak hobʋk ash i̱ nia ya̱ moma ishashke; ikfoka ya̱ nia yʋt ompoholmo ka̱, micha nia moma ikfoka ai asha ka̱,

⁹ Micha haiyihchi tuklo, micha nia yʋmmʋt ikfeksa bili̱ka a̱sha ka̱, micha sʋlakha paknaka i̱ hlapa, haiyihchi aiena ka̱ ishashke.

¹⁰ Itin nanaiyʋchit im issa illichit im issa wak hobʋk a̱ ai ishi tuk a̱ chohmichit ishashke; micha na holitompa isht ʋtta yʋt ai onochit hukmit im issa alta ya̱ onochit hukmashke.

¹¹ Micha wak hobʋk ash hakshup, micha nipi moma noshkobo aiena, micha iyi aiena, micha ikfoka micha yʋlhki aiena.

¹² Wak hobʋk ash mominchit bina kocha a kashofa, hituk chubbi ahlatapa ya̱ isht ona cha iti onochit luak ishit hukmashke; hituk chubbi a hlatapa yak o̱ a luashke.

¹³ Micha Islael okla moma kʋt ik ithano hosh nana ashʋchi hokma, mihma okla moma kʋt in luma tuk, mihmʋt Chihowah i̱ nan ʋlhpisa ya̱ yoshubit, nana kanohmi yʋmmak oka yʋmohma he ʋlhpesa tuk keyu hosh yʋmohmi tuk;

¹⁴ Nan ashʋchi ya̱ ashʋchi tuk ʋt akostininchikmʋt okla hʋt nan ashʋchi tuk ʋt wak hobʋk himita yo̱ im issa cha okla moma im ʋlhtipo itikba isht onashke.

¹⁵ Mikma okla moma im asʋnonchi ʋhleha hʋt wak hobʋk ash Chihowah itikba ya̱ ibbak isht ombitepashke: mikma wak hobʋk ʋt Chihowah itikba ai illashke.

¹⁶ Mikma na holitompa isht ʋtta nan ahama tuk ʋt wak hobʋk ash im issish a̱ okla moma im ʋlhtipo ya̱ isht onashke.

¹⁷ Micha na holitompa isht ʋtta yʋt issish kaniohmi ka̱ ibbak ushi oka hilechi cha Chihowah itikba a holitopa natakali itikba fehna ka̱ untuklo ha fimmashke.

¹⁸ Micha issish ash kaniohmi ka̱ alta yʋmmʋt Chihowah itikba okla moma im ʋlhtipo anu̱kaka hikia lapish a̱ isht o̱ fimmashke: Micha issish ash mominchit ai onochit hukmit im issa alta yʋmmʋt okla moma im ʋlhtipo okhissa hikia akishtʋla ya̱ pit hlatʋblashke.

¹⁹ Micha i̱ nia moma ka̱ im aieshit alta onochit hukmashke.

²⁰ Micha wak hobʋk a̱ nanashʋchi im issa wak hobʋk a̱ yʋmihchi tuk a̱ chohmichit ilʋppak kia yʋmihchashke, mikma na holitompa isht ʋtta yʋt i̱ kashofikma i̱ kashofashke.

²¹ Mikma wak hobʋk ash bina kocha isht ona cha wak ʋmmona hukmi tuk ʋt chohmichit hukmashke; okla moma nan ashʋchi im issa yoke.

²² Hatak pehlichi yosh nan ashʋchi, ik ithano hosh Chitokaka in Chihowah i̱ nan ʋlhpisa achʋfona ya̱ kobʋffit nana ka̱ a yʋmihcha he ʋlhpesa keyu yʋmihchi tuk ash nan ashʋchikma;

²³ Nan ashʋchi ya̱ ashʋchi tuk ʋt ont nukfoyukakmʋt nan im issa yʋt issi kosoma ushi nakni yosh ai okpuloka iksho ho̱ isht ʋlashke.

²⁴ Micha issi kosoma noshkobo ha̱ ibbak isht umbitepa cha Chihowah itikba hukmit im issa ai ʋbi ak o̱ ai ʋbashke: nan ashʋchi im issa yoke.

²⁵ Mikma na holitompa isht ʋtta yʋt nan ashʋchi im issa issish a̱ ibbak ushi isht eshi cha aionochit hukmit im issa alta lapish a̱ o̱ lapalichashke: micha im issish a̱ aionochit hukmit im issa alta akisht ʋla ya̱ ahlatʋblashke.

²⁶ Micha itin nanaiyʋchit im issa illichit im issa nia ya̱ chohmichit nia moma ka̱ alta onochit hukmashke: nan ashʋchi tuk a̱ na holitompa isht ʋtta yʋt i̱ kashoffikma i̱ kashofashke.

²⁷ Micha okla hʋt kanima hosh nana ka̱ ikithano hosh nan ashʋchi tuk nana ka̱ ayʋmihcha he ʋlhpesa keyu ho̱ yʋmihchi cha Chihowah i̱ nan ʋlhpisa ha̱ kobʋffi tuk ash im ai a̱hlikmʋt;

²⁸ Keyukmʋt nan ashʋchi ashʋchi tuk ʋt ithaiyanakmʋt, nanashʋchi ya̱ ashʋchi tuk ʋt issi kosoma ushi tek ash ai okpuloka iksho ho̱ nan im issa isht onashke.

²⁹ Micha nan ashʋchi im issa noshkoba ha̱ ibbak isht umbitepa cha hukmit ai im issa ak o̱ nan ashʋchi im issa yo̱ ai ʋbashke.

³⁰ Mikma na holitompa isht ʋtta yʋt issish a̱ ibbak ushi isht eshi cha ai onochit hukmit im issa alta lapish a̱ o̱ lapalichashke: micha issish a̱ mominchit alta akishtʋla ya̱ a hlatʋblashke.

³¹ Micha itin nanaiyʋchit im issa illichit im issa nia ishi chatuk a̱ chohmichit nia moma ka̱ ishashke: micha Chihowah i̱ balama achukma ya chi̱ ka̱ na holitompa isht ʋtta yʋt alta onochit hukmashke: micha na holitompa isht ʋtta yʋt i̱ kashoffikma i̱ kashofashke.

³² Micha nan ashʋchi im issa yo̱ chukfushi isht onakmʋt tek ash ai okpuloka iksho ho̱ isht onashke.

³³ Micha nan ashʋchi im issa noshkobo ha̱ ibbak isht umbitepa cha nan ashʋchi im issa mak o̱ hukmit im issa ai ʋbi ya̱ ai ʋbashke.

³⁴ Mikma naholitompa isht ʋtta yʋt nan ashʋchi im issa issish a̱ ibbak ushi isht eshi cha ai o̱ hukmit im issa alta lapish a̱ o̱ lapalichashke: micha issish a̱ mominchit alta akishtʋla ya̱ ahlatʋblashke.

³⁵ Micha itin nanaiyʋchit im issa illichit im issa chukfushi nia ishi tuk a̱ chohmichit nia moma ka̱ ishashke: micha na holitompa isht ʋtta yʋt luak ishit hukmit Chihowah im issa mak o̱ yʋmihchit alta onochit hukmashke: micha nanashʋchi yʋmihchi tuk a̱ na holitompa isht ʋtta yʋt i̱ kashoffikma i̱ kashofashke.