Lefitikʋs 3 - Chahta Holisso Holitopa 1886

¹ Micha nan im issa yʋt itin nanaiyʋchit im issa yokmʋt, ʋlhpoa hochito ai ishit nakni yokma, tek okmá, nana ho̱ im issakmʋt, ai okpuloka iksho ho̱ Chihowah itikba ai im issashke.

² Nan im issa noshkoba ha̱ ibbak isht ombitepa cha okla moma im ʋlhtipo im okhissa yak o̱ ai ʋbashke: mikma na holitompa isht a̱sha Alon ushi ʋhleha hʋt issish a̱ alta o̱ fimmit fullohlechashke.

³ Micha itin nanaiyʋchit im issa illichit im issa yo̱ luak ishit hukmit Chihowah im issa yo̱ i̱m issashke: ikfoka ompohomo nia, micha ikfoka ompoholmo nia momashke.

⁴ Micha haiyihchi tuklo micha nia yʋt on a̱sha yʋmmʋt ikfeksa bili̱ka a̱sha micha sʋlakha i̱ hlapa, micha haiyihchi aiena ka̱ ishashke.

⁵ Micha Alon ushi ʋhleha hʋt yʋmma alta onochit hukmit isht aiokpʋchi ʋt iti luak on a̱sha pakna on a̱sha ka̱ a luacha hi oke, luak isht hukmit nan im issa yʋt Chihowah i̱ balama achukma yoke.

⁶ Micha nan im issa yʋt itin nanaiyʋchit im issa illichit im issa yʋt ʋlhpoba hochito ai ishit nakni, keyukmʋt tek okmá nana hokma, aiokpuloka iksho ho̱ im issashke.

⁷ Chukfushi yo̱ im issa hokmʋt Chihowah itikba ai im issashke.

⁸ Micha nan im issa tuk ʋt noshkobo ha̱ ibbak isht ombitepa cha okla moma im ʋlhtipo itikba ai ʋbashke: mikma Alon ushi ʋhleha hʋt issish a̱ alta o̱ fimmit apakfoyublashke.

⁹ Micha illichit im issa itin nanaiyʋchit im issa luak ishit hukmit Chihowah im issa yo̱ im issashke: i̱ nia micha hasimbish ʋt moma, nʋli foni ya̱ ont tikelichit tʋblashke: micha ikfoka ompohomo nia micha ikfoka nia moma,

¹⁰ Micha haiyihchi tuklo, micha nia yʋmmʋt ikfeksa bili̱ka a̱sha ka̱, micha sʋlakha ya̱ paknaka i̱ hlapa haiyihchi aiena ka̱ ishashke.

¹¹ Mikma na holitompa isht ʋtta yʋt alta onochit hukmashke: ilhpak im issa im ilhpak o̱ luak ishit hukmit Chihowah im issa yoke.

¹² Micha nan im issa yʋt issi kosoma yokma, Chihowah itikba ai im issashke.

¹³ Micha noshkobo ha̱ ibbak isht ombitepa cha okla moma im ʋlhtipo itikba ai ʋbashke: mikma Alon ushi ʋhleha hʋt issish a̱ alta o̱ fimmit apakfoyublashke.

¹⁴ Micha nan im issa yʋt luak ishit hukmit Chihowah im issa yo̱ im issashke: ikfoka ompoholmo nia micha ikfoka nia moma a̱shaka̱.

¹⁵ Micha haiyihchi tuklo, micha nia yʋmmʋt ikfeksa bili̱ka a̱sha ka̱, micha sʋlakha paknaka i̱ hlapa micha haiyihchi aiena ka̱ ishashke.

¹⁶ Mikma na holitompa isht ʋtta yʋt alta onochit hukmashke; ilhpak luak ishit hukmit im issa na balama achukma yoke; nia moma kʋt Chihowah immi hoke.

¹⁷ Nia micha issish aiena ka̱ hʋchik po ka he ʋt, hʋchim ai unchuloli fullota ka̱ nan ʋlhpisa bilia yosh itoyula hi oke, im achi tok.