Lefitikʋs 26 - Chahta Holisso Holitopa 1886

¹ Na holbʋt toba, micha na holbʋt toba in chu̱wa hʋsh ikba he keyu, micha na holbʋt toba ikbit hʋsh hilecha he keyu, micha tʋli na holbʋt toba nana kia hʋsh im aka chunola chi̱ kʋt chi̱ yakni a̱ hʋsh hilecha he keyu hoke, hʋchin Chitokaka Chihowah sia hoka.

² A̱ nitak hollo ya̱ hʋsh holitobli cha ʋm aboha holitompa ya̱ hʋsh holitobla hi oke, Chihowah sia hoke.

³ A̱ nan ʋlhpisa hʋsh ai itʋnowa cha ʋm anumpa ʋlhpisa ya̱ ieshit hʋsh yʋmihchikma,

⁴ Yohmikma ont aiʋlhpiesakma, umba ka̱ hʋch i̱hi̱ma la hi oke, mikma yakni ʋt na waya ha̱ hʋchi̱ waya hi oke; mikma kowi iti hikia kʋt ʋnit hʋchi̱ waya hi oke.

⁵ Mikma hʋsh nihechi kʋt pa̱ki ʋmo ya̱ ona he, micha pa̱ki ʋmo yʋt hokcha he ʋlhpesa ona hi oke; mikma pʋska ʋpʋt hʋchi kaiya cha, achukma hosh hʋchi̱ yakni ya̱ hʋsh aiasha hi oke.

⁶ Mikma yakni ya̱ iti̱ nanaiya ima la hi oke, yohmikma hʋsh tʋshkikma nana hosh hʋchi nukshobla he keyu, amba nampoa okpulo ya̱ yakni ya̱ kohchit ishit kanchi la hi oke; mikma bʋshpo falaia yʋt hʋchi̱ yakni ya̱ hlopulla he keyu hoke.

⁷ Mikma hʋchin tʋnʋp a̱ hʋsh tihleli na, yʋmmak osh hʋchi tikba ya̱ bʋshpo falaia ishit akakoha hi oke.

⁸ Mikma hʋsh tahlapikmʋt tahlepa achʋfa kia hʋsh tihlela he, micha tahlepa hʋsh achʋfakmʋt tahlepa sipokni pokoli kia hʋsh tihlela hi oke, mikma hʋchin tʋnʋp ʋt hʋchi tikba ya̱ bʋshpo falaia ishit akakoha hi oke.

⁹ Hʋch ithaiyana lish hʋchi wayachit hʋchi apaknʋchi la hi oke, micha ʋm anumpa kʋllochit na hʋchitim apesa la hi oke.

¹⁰ Mikma ilhpak sipokni ak o̱ hʋshpa tuk osh himona ak atuk pulla kak o̱ isht hʋsh kohcha hi oke.

¹¹ Mikma an tabenakel a̱ hʋchim ai itin takla ya̱ hilechi la hi oke micha ʋm ishilombish ʋt hʋchi̱ yuwala he keyu hoke.

¹² Micha hʋch im ai itin takla ya̱ a nowa la hi oke, micha hʋchin Chihowah sia hokma, ʋm okla hʋchia ha hi oke.

¹³ Hʋchin Chitokaka Chihowah sia hosh yʋmma i̱ yuka hatak hʋchia ha he keyu mak o̱, Echip yakni ya̱ pehlichit hʋchi kohchi li tuk oke, micha ikonla abana ishit talakchi puta ka tʋptulit apissʋlechit hʋchi nowʋchi li hatuk oke.

¹⁴ Yohmi kia hʋs sa̱ haponakla he keyukma, micha ʋm anumpa ilʋppa moma hʋsh yʋmihcha he keyukma,

¹⁵ Micha a̱ nan ʋlhpisa ha̱ hʋsh shitelemakma, keyukmʋt hʋchimi shilombish ʋt ʋm aiʋlhpesa yʋmihchi ya̱ yuwala cha a̱ nan ʋlhpisa moma ka̱ hʋsh yʋmihcha he keyukma, amba na hʋch itim apesa li ya̱ hʋsh kobʋffikma,

¹⁶ Ʋno ak kia ilʋppa hʋchi̱ yʋmihchi la hi oke; ʋno fehna kʋt komonta, tahʋt isht ia, yʋnha mikma niskin elli yo̱ micha chu̱kʋsh nukha̱klochi yo̱ onochit hʋchim apesa la hi oke, mikma peh pilla ho̱ hʋchi̱ napehna ya̱ hʋsh hokcha hi oke; hʋchin tʋnʋp ak osh ʋpa hi oka.

¹⁷ Mikma sa nashuka ya̱ isht hʋchi̱ sanalichi likma, hʋchin tʋnʋp itikba ya̱ hʋch illa hi oke; hʋchi̱ nukkilli puta kʋt hʋchi pehlicha hi oke, mikma kʋna hosh hʋchi hlioli keyu kia hʋsh tihla̱ha̱ya hi oke.

¹⁸ Micha nana ilʋppa moma ka̱ hʋs sa̱ haponakla he keyukma, na hʋsh ashʋchi pulla kak o̱, himakma napalʋmmi untuklo ha isht hʋchi onochi la hi oke.

¹⁹ Micha nan isht hʋsh a kʋllo isht ilefehuʋchi ya̱ kobʋffi la hi oke; micha hʋchi̱ shutik a̱ tʋli chohmichi likmʋt, hʋchi yakni ya̱ asonak lakna ya̱ hʋchin chohmichi la hi oke.

²⁰ Mikma pilla ho̱ hʋchim i̱ hlampko hʋt taha chi̱ hoke; hʋchi̱ yakni yʋt nawaya ya̱ hʋchi̱ waya he keyu hoke, micha yakni ya̱ iti puta kʋt ʋni ya̱ waya he keyu hoke.

²¹ Micha hʋs sʋm ilapunla cha hʋs sa̱ haponakla he keyukma, na hʋsh ashʋchi atukmak o̱ ililli untuklo ho̱ himakma hʋchi onochi la hi oke.

²² Micha nampoa okpulo aiena hʋchim itin takla et tihleli likma yʋmmʋt hʋchim ʋlla ʋhleha ha̱ wehpuli cha, hʋchi̱ nan ʋlhpoa ya̱ ʋbit tahla hi oke, micha hʋchi kanamosechi likma, hʋchi̱ hina puta kʋt aksha hi oke.

²³ Atuk osh ilʋppa puta ka̱ isht hʋchi kostininchi la he keyukma, amba hʋs sʋm ilapunlakma,

²⁴ Yohmikma ʋno ak kia hʋchim ilapunla lish, na hʋsh ashʋchi pulla ka̱ untuklo ha na palʋmmi hʋchi onochi la hi oke.

²⁵ Micha a̱ nan ʋlhpisa ha̱ i̱ sanali tuk a̱ ilaiokha chi̱ ka̱ bʋshpo falaia ya̱ hʋchi onochi la hi oke; mikma hʋchin tʋmaha holihta anu̱ka itahobʋt hʋsh itʋnahakma, ililli hʋchi onochi la hi oke, mikma tʋnʋp ibbak hʋsh fohka hi oke.

²⁶ Mikma ishit hlampko hʋchi̱ pʋska ya̱ kobʋffi likma, ohoyo pokoli hosh hʋchi̱ pʋska ya̱ a palʋska achʋfa ho̱ anunachi cha hʋchi̱ pʋska ya̱ wekichi hosh anonti hʋch ima hi oke; mikma hʋshpa kia ik hʋchi fihopo ka hi oke.

²⁷ Micha ilʋppa moma kʋt yʋmohmi kia hʋs sa̱ haponakla he keyu, amba hʋs sʋm ilapunlakma,

²⁸ Yohmikma ʋno ak kia nukhobela hosh hʋchim ilapunlʋt a̱ya la chi̱ hoke; micha ʋno, ʋno fehna kʋt na hʋsh ashʋchi tuk a̱ untuklo ha napalʋmmi hʋchi onochi la hi oke.

²⁹ Mikma hʋchiso ʋhleha nipi ya̱ hʋshpa cha hʋchiso tek ʋhleha nipi ya̱ hʋshpa hi oke.

³⁰ Micha hʋch im achaha puta ka̱ ishit kanchi lish na holba hʋchin toba puta ka̱ chanlit akakohli likmʋt hʋchi haknip illi ya̱ hʋchi̱ na holbʋt toba puta ka̱ on ashachi la hi oke, micha ʋmi shilombish ʋt hʋchi̱ yuwala hi oke.

³¹ Micha hʋchin tʋmaha hohlita puta ka̱ chukilissʋchi lish, hʋchim ʋlhtipo holitompa puta ka̱ chukilissʋchi likmʋt, na hʋchi̱ balama ya̱ hu̱wa la he keyu hoke.

³² Micha yakni ya̱ a chukilissa isht ona la chi̱ hoke, mikma hʋchin tʋnʋp ʋhleha yʋmma ai ahanta kʋt okokko! ahna chi̱ hoke.

³³ Micha oklushi Chihowah ik ithano puta ka̱ im itin takla hʋchi fimmi lish bʋshpo falaia shu̱fit hʋchiakaiyachi la hi oke; mikma hʋchi̱ yakni ʋt chukilissakma, hʋchin tʋmaha holihta puta kʋt ai okpuloka hi oke.

³⁴ Yohmikma hʋchin tʋnʋp i̱ yakni a̱ hʋsh aiasha na yakni ʋt chukilissa momakmʋt i̱ nitak hollo ya̱ a yukpa hi oke; yohmi pulla hokmʋno yakni ʋt foha cha, i̱ nitak hollo ya̱ a yukpa hi oke.

³⁵ Chukilissʋt talaia momakmʋto foha hi oke; hʋsh on a̱sha ma hʋchi̱ nitak hollo ya̱ ik foho tuk okʋt.

³⁶ Micha okcha̱ya momʋt in tʋnʋp i̱ yakni a̱sha ka̱ chu̱kʋsh iilli fohki la hi oke, mikma iti hishi fatahʋchit ola yʋt tihlela hi oke; mikma bʋshpo falaia i̱ yihlepa chohmit yihlepa hi oke, micha kʋna hosh hlioli keyu kia akakoha hi oke.

³⁷ Micha kʋna hosh hlioli keyu kia bʋshpo falaia itikba yo̱ chohmit ito̱ kahʋt akakoha hi oke, mikmʋt kʋllot hʋchin tʋnʋp itikba hʋsh hiela he keyu hoke.

³⁸ Micha oklushi Chihowah ik ithano im itin takla ai illit hʋchi taha hi oke, mikma hʋchin tʋnʋp i̱ yakni ʋt hʋchi tahla hi oke.

³⁹ Micha hʋchi okcha̱ya kʋto hʋchin tʋnʋp i̱ yakni ai ashʋt nan ashʋchi ishit hlipushit, micha i̱ki nan ashʋchi ya̱ ishit hlipushit ia hi oke.

⁴⁰ Yohmi kia ilap nan ashʋchi, micha i̱ki ʋhleha nan ashʋchi, yoshoba aiena a̱ yoshoba tuk, micha ʋm ilapunla tuk,

⁴¹ Micha ʋno ak kia im ilapunla li tuk, micha in tʋnʋp i̱ yakni ya̱ isht ona li tuk aiena ka̱ ʋm il aionohonlikma, micha chu̱kʋsh hakshup ik tapo ʋt akanlosi cha, nan ashʋchi pulla hosh na palʋmmi onʋtula tuk ʋt ʋlhpesa ahnikma,

⁴² Yohmikma Chekob a̱ nan itim apesali tok ʋt ithaiyana la hi oke, micha Aisak a̱ nan itim apesali tok ʋt ithaiyana la hi oke, micha Ebleham a̱ nan itim apesali tok aiena kʋt ithaiyana la hi oke, micha yakni ya̱ ithaiyan a la hi oke.

⁴³ Micha yakni ya̱ issakma, yʋmmʋt iksho ho̱ chukilissʋt talaiakmʋt, i̱ nitak hollo ya̱ a yukpa hi oke: micha nan ashʋchit na palʋmmi onʋtula tuk ʋt ʋlhpesa ahna hi oke; ʋm aiʋlhpesa yʋmihchi ya̱ shitilema tuk okʋt, micha imi shilombish ʋt a̱ nan ʋlhpisa puta ka̱ shitilema tuk okʋt.

⁴⁴ Amba yʋmma moma ka̱ ik yohmi kia in tʋnʋp i̱ yakni a̱shakma kanchi la he keyu, micha shitilemʋt nan itim apesali ʋt kobʋffit kanchit ʋmohmichi la he keyu; in Chitokaka Chihowah sia hokʋt.

⁴⁵ Amba yʋmmak atuk pulla mak o̱ in tikba ʋhleha ha̱ yʋmmak oka in Chitokaka sia ha chi̱ hosh, oklushi Chihowah ik ithano ʋhleha hʋt pi̱sa ho̱, Echip yakni ya̱ pehlichit kohchit nan itim apesali tok ʋt, ithaiyana la hi oke, Chihowah sia hoke, ish im achashke, achi tok.

⁴⁶ Nana ʋlhpisa ilʋppa puta, micha ai ʋlhpesa yʋmihchi, micha nanʋlhpisa ilʋppa puta kak o̱ Chihowah yʋt Moses a̱ tohnot Sinai nʋnih ha̱ Islael im ʋlla ʋhleha ha̱ ai itim apesa tok oke.