Lefitikʋs 25 - Chahta Holisso Holitopa 1886

¹ Micha Chihowah yʋt Moses a̱ Sinai nʋnih ha̱ ai im anumpulit,

² Islael im ʋlla ʋhleha ha̱ im anumpulit, Yakni hʋch ima la chi̱ ka̱, hʋsh onakma, yohmikma yakni ʋt Chihowah i̱ nitak holitopa ya̱ i̱ holitobla hi oke.

³ Afʋmmi hannali ho̱ chim osapa ya̱ ish hokchikmʋt, afʋmmi hannali ho̱ chi̱ pa̱kʋpi ahollokchi ya̱ naksish ʋmot ʋni ya̱ ishma hi oke.

⁴ Amba afʋmmi isht untuklo hokʋto yakni afoha nitak hollo ya hi oke, Chihowah i̱ nitak hollo ya hi oke; chim osapa ya̱ ish ahokcha he keyu, micha chi̱ pa̱kʋpi a hollokchi ya̱ naksish a̱ ishma he keyu hoke.

⁵ Ish ai ʋmo ya̱ ilap akinli hosh awaya ishma he keyu, micha chi̱ pa̱kʋpi a hollokchi ʋt naksish ik ʋlmo ya̱ pa̱ki ya̱ ishma he keyu, yakni ʋt afoha he afʋmmi yoka.

⁶ Micha yakni ya̱ i̱ nitak hollo ya̱ ilhpak chim a̱sha hi oke; chishno, micha chin tishu, micha chin tishu ohoyo, micha tishu chim ilhtono, micha okla inla yosh chi awant anta aiena,

⁷ Micha chi̱ wak, micha nan ʋlhpoa chi̱ yakni aiasha aiena ka̱ awaya moma kʋt ilhpak ʋt im aiasha hi oke.

⁸ Micha afʋmmi nitak hollo untuklo ho̱ afʋmmi untuklo bat untuklo ho̱ ish hohtenashke; mikma afʋmmi nitak hollo untuklo kʋt chim afʋmmi pokoli ushta akucha chakkali hashke.

⁹ Yohmikma hʋshi ont isht untuklo kʋt nitak ont ishit pokolikma, chubili isht pu̱fa ish olachechashke, i̱ kashoffi nitak ma hʋchi̱ yakni moma ka̱ olachechit hʋsh hlopullecha hi oke.

¹⁰ Micha afʋmmi ont ishit pokoli tahlapi ya̱ hʋsh hullocha hi oke, micha yakni moma hlopullechit okla aiasha moma ka̱ yuka issachit anumpa hʋsh i̱ bohlashke: hʋchi̱ chubili ya hi oke, mikma hatak hʋsh moma kʋt i̱ yakni aiyukali, micha hatak hʋsh moma kʋt in chuka aiyukali hʋsh ona hi oke.

¹¹ Afʋmmi ishit pokoli tahlap yʋmmʋt hʋchi̱ chubili ya hi oke: nana hʋsh hokcha he keyu, micha ilap akinli offo ya̱ hʋshma he keyu, micha pa̱kʋpi naksish ʋlmo tuk keyu ya̱ pa̱ki̱ hʋsh ai ʋma he keyu hoke.

¹² Chubili yoka; hʋchi̱ holitopa hi oke: osapa awaya ak o̱ hʋshpa hi oke.

¹³ Chubili afʋmmi ilʋppa hatak puta kʋt ilap i̱ yakni aiyukali ka̱ falamʋt hʋsh ona hi oke.

¹⁴ Micha chuka abili̱ka hatak a̱ nana kia ish i̱ kanchikmʋt, keyukmʋt nana kia chuka a bili̱ka ish in chumpakmʋt hʋsh itilbʋshala he keyu hoke.

¹⁵ Chubili ha ya̱ afʋmmi holhtina ʋlhpi̱sa ho̱ chin chuka abili̱ka ya̱ ish in chumpa hi oke, mikma nawaya afʋmmi holhtina ʋlhpi̱sa ho̱ yʋmmak osh chi̱ kancha hi oke.

¹⁶ Afʋmmi laua ka̱ ʋlhpi̱sa hosh aiʋlli ka̱ i̱ shahlechit isht ish ia hi oke, micha afʋmmi iklauo ka̱ ʋlhpi̱sa ho̱ aiʋlli ka̱ ish ola taklʋchashke; nawaya ya̱ afʋmmi holhtina ya̱ ʋlhpi̱sa ho̱ chi̱ kanchi hoka.

¹⁷ Yʋmohmi hoka, hʋsh itilbʋshala he keyu hoke, amba chin Chitokaka ish i̱ nukwiya hi oke, hʋchin Chitokaka Chihowah sia hoke.

¹⁸ Yʋmohmi hoka a̱ nan ʋlhpisa ka̱ hʋsh yʋmihcha hi oke, micha ʋm aiʋlhpiesa yʋmihchi ya̱ hʋsh holitoblashke, mikmʋt achukma hosh yakni ya̱ hʋsh aiasha hi oke.

¹⁹ Mikma yakni ʋt na waya ka̱ waya hi oke, micha impʋt hʋchi kaiya cha yʋmmak o̱ achukma hosh hʋsh aiasha hi oke.

²⁰ Atuk o̱ afʋmmi isht untuklo ka̱ nana ho̱ hokchit na waya ka̱ emachi̱ keyu ho kʋt nanta hak o̱ e pa chi̱ cho? hʋsh achi hokma,

²¹ Yohmikma afʋmmi ont ishit hannalikma ishit yukpali li ya̱ apesʋt hʋchi onochi la hi oke, mikma afʋmmi tuchina waya yo̱ hʋchi̱ waya hi oke.

²² Atuk o̱ afʋmmi ont isht untuchinakma nana hʋsh hokcha hi oke, micha nawaya sipokni ak o̱ hʋshpa na, afʋmmi ont ishit chakkala hi oke; yʋmma i̱ na waya kʋt iklo ki̱sha ka̱ sipokni ak o̱ hʋshpa hi oke.

²³ Yakni ʋt kʋniʋt bilia he keyu hoke; yakni ʋt ʋmmi hoka, okla inla, micha nowʋt a̱ya hʋchia hosh hʋsh aiasha hoka.

²⁴ Yohmi ka̱ yakni hʋsh aiasha moma ka̱ yakni falʋmminchit chumpa ka̱ ʋlhpesa hʋsh ahna hi oke.

²⁵ Hʋsh itibapishi hʋt ilbʋshʋt isht ia cha, i̱ yakni kaniohmi ka̱ kanchi tuk o̱, i̱ kanomi hosh falʋmminchit chumpʋt ʋlakmʋt itibapishi hʋt kanchi tuk a̱ falʋmminchit chumpashke.

²⁶ Mikma hatak ʋt falʋmminchit im a chumpa hinla kʋt ik im ikshokmʋt, amba ilap ʋto falʋmminchit chumpa hinla,

²⁷ Yʋhmikma a kʋnia tok afʋmmi ha̱ hohtena cha atampa ka̱ i̱ kanchi tok a̱ i̱ falʋmminchashke yʋmohmi ho̱ falamʋt i̱ yakni ya̱ onashke.

²⁸ Amba i̱ falʋmmincha he keyukma, na kʋnia tuk ʋt chumpa tuk ash ibbak fo̱ka na chubili afʋmmi ka̱ ona hi oke; atuk osh chubili ya̱ mokofa hi oke, mikma i yakni ya̱ falamʋt ona hi oke.

²⁹ Micha hatak ʋt tʋmaha holihta ya̱ chuka in talaia tuk osh kanchi tuk mʋt, kʋnia ha ya̱ afʋmmi achʋfa fehna itintakla ho̱ falʋmminchit chumpa hinla hoke, afʋmmi achʋfa ʋlhpesakma falʋmminchit chumpashke.

³⁰ Micha afʋmmi achʋfa ʋlhpesa ka̱ falʋmminchit ik chumpokma, tʋmaha holihta chuka talaia tuk ʋt chumpa tok ash kʋllot im ai itishali a hlopulli ka̱ immit bilia yo̱ tobashke; chubili ma kohcha he keyu hoke.

³¹ Amba chuka alokoli yo̱ chuka taloha holihtʋt apakfoyupa keyu hokʋto yakni haiaka osapa ya̱ chohma hi oke, falʋmminchit chumpa hinlakmʋt yʋmohma hi oke, mikmʋt chubili ma kohcha hi oke.

³² Yohmi kia Lefait ʋhleha in tʋmaha holihta ya̱ micha i̱ yakni tʋmaha a holihta chuka puta ka̱ nitak nana ho̱ falʋmminchit chumpakmʋt Lefait ʋhleha hʋt yʋmihcha hi oke.

³³ Micha hatak osh Lefait a̱ in chumpa tuk ma chuka kʋnia tuk a̱ micha i̱ yakni tʋmaha holihta aiena kʋt chubili ma kohcha hi oke; Islael im ʋlla ʋhleha im ai iti takla ya̱ Lefait ʋt in tʋmaha holihta chuka puta kak osh i̱ yakni yoka.

³⁴ Amba in tʋmaha holihta abili̱ka fullota yakni haiaka hokʋto kʋnia he keyu, i̱ yakni bilia yoka.

³⁵ Micha chitibapishi hʋt chiba fokʋt ilbʋshʋt kʋnia cha, nana bʋnnakma ish apelʋchashke, a̱hli okla inla micha nowʋt a̱ya yoh kia, yʋmohmi ho̱ chi takla ahantashke.

³⁶ Micha chelichi micha i̱ shahlit isht ia aiena ka̱ chik im esho kashke; amba chin Chitokaka ya̱ ish i̱ nukshopashke; yʋmohmi ho̱ chitibapishi hʋt okcha̱ya cha chi takla ahantashke.

³⁷ Chelichi ho̱ chin tʋli holisso ya̱ ish ima he keyu, micha i̱ shahlit ibafohka chi̱ ho̱ chim ilhpak o̱ ish i̱ pota he keyu hoke.

³⁸ Hʋchin Chitokaka Chihowah sia hosh, Kenan yakni ya̱ hʋch ima lish, hʋchin Chitokaka sia chi̱ hosh Echip yakni ya̱ a hʋchi pehlichit kohchi li tok oke.

³⁹ Micha chitibapishi hʋt chi̱ bili̱ka ahanta kʋt ilbʋshʋt kʋniakma micha chi̱ kanchikma; yuka chohmichit ish toksʋlecha he keyu;

⁴⁰ Amba tishu ilhtono micha nowʋt a̱ya chohmit chin toksʋlit chi takla ahanta na, chubili afʋmmi ha̱ ont ʋhla hi oke.

⁴¹ Atuk osh yohmikma ilap, micha im ʋlla ʋhleha aiena itapi̱hʋt chi̱ filʋmmit falamʋt ilap in chuka achʋfa micha i̱ki ʋhleha i̱ yakni ya̱ ona hi oke.

⁴² An tishu ʋhleha hosh Echip yakni pehlichit kohchi li tok oka, hatak yuka chohmichit kancha he keyu hoke.

⁴³ Kʋllot ish toksʋlecha he keyu, amba chin Chitokaka ya̱ ish i̱ nukshopa hi oke.

⁴⁴ Hatak yuka micha ohoyo yuka chim aiasha kʋt oklushi Chihowah ik ithano chi afolublit aiasha kak a hi oke; yohmi kak o̱ hatak yuka micha ohoyo yuka aiena ka̱ hʋsh a chumpa hi oke.

⁴⁵ Micha okla inla im ʋlla ʋhleha hʋt nowʋt a̱ya yosh hʋchi takla aiasha, micha in chuka achʋfa hʋchi takla aiasha hʋchi̱ yakni ya̱ atobachi tok aiena kak o̱, hʋsh a chumpa hi oke, mikma yʋmmak osh hʋchim ila̱yak a hi oke.

⁴⁶ Micha hʋsh ai isha he ai ʋlhpesa yatuk o̱ hʋchim ʋlla et hʋchiakaiya kʋt immi ha̱ chi̱ hosh isha he ai ʋlhpesa ho̱ hʋsh isha hi oke; yʋmmʋt hʋchi̱ yuka na bilia he oke; amba hʋch itibapishi ʋhleha, Islael im ʋlla ʋhleha hokʋno kʋllot hʋsh iti toksʋlecha he keyu hoke.

⁴⁷ Micha nowʋt a̱ya micha okla inla yosh chi̱ bili̱ka ahanta kʋt holitopʋt taiyaha, micha chitibapishi hʋt bili̱ka ahanta kʋt ilbʋshʋt taha cha, okla inla micha nowʋt aya yash chi̱ bili̱ka ahanta ka̱ keyukmʋt okla inla yash in chuka achʋfa ai unchuloli yo̱ im ile kanchikma,

⁴⁸ Kanchi ha ya̱ falʋmminchit chumpa hinlakmʋt yohma hi oke, itibapishi ʋhleha achʋfa kʋt falʋmminchit chumpa hinlakmʋt yohma hi oke.

⁴⁹ Imoshi, keyukmʋt imoshi ya̱ ushi ʋt falʋmminchit chumpa hinla, keyukmʋt in chuka achʋfa ya̱ i̱ kanomi fehna kanima kia falʋmminchit chumpa hinlakmʋt yohma hi oke; keyukmʋt ilap ak inli kia falʋmminchit ile chumpa hinlakmʋt yohma hi oke.

⁵⁰ Mikmʋt chumpa tok a̱ afʋmmi ile kanchi tok a̱ hohtenʋt isht ia hosh chubili afʋmmi ha̱ isht onashke: micha ʋlhtoba kʋt afʋmmi holhtina ka̱ ʋlhpi̱sa hi oke, tishu ilhtono nitak ʋlhpisa ak o̱ ʋlhpi̱sa ha hi oke.

⁵¹ Afʋmmi laua hosh takali moma hokma yʋmma ʋlhpi̱sa ho̱ falʋmminchit ishit chumpa tʋli holisso ya̱ anonti tʋli holisso ishit chumpa tok a̱ ima hi oke.

⁵² Micha afʋmmi ik lauo hosh chubili afʋmmi ona chi̱ kʋt takanli momakma, yohmi ho̱ i̱ hohtena hi oke mikma im afʋmmi ʋlhpi̱sa ho̱ falʋmminchit chumpa isht ʋlhtoba ya̱ ima hi oke,

⁵³ Micha tishu hosh afʋmmi ilhtohno chohmit takla ahanta ho̱, mikma ish pi̱sa ho̱ achʋfa kash ot kʋllochit toksʋlecha he keyu hoke.

⁵⁴ Micha afʋmmi ilʋppa puta ka̱ falʋmminchit ik chumpokma, chubili afʋmmi hano, ilap micha im ʋlla ʋhleha aiena kʋt api̱ha ho̱ kohcha hi oke,

⁵⁵ Islael im ʋlla ʋhleha hʋt ʋno ak o̱ an tishu ʋhleha hoka, an tishu ʋhleha hosh Echip yakni ya̱ pehlichit kohchi li tok oke: hʋchin Chitokaka Chihowah sia hoke.