Lefitikʋs 24 - Chahta Holisso Holitopa 1886

¹ Mihma Chihowah yʋt Moses a̱ im anumpulit,

² Islael im ʋlla ʋhleha ha̱ ish i̱ miha na, pʋla ha chi̱ ka̱ pʋla bila ai ʋlhto ʋt luhu̱wa na bilia chi̱ ka̱, alif bila boa a̱hli yo̱ isht chim onashke.

³ Nan isht atokowa in takali ya̱ kocha okla moma im ʋlhtipo anu̱kaka Chihowah itikba yak o̱ opia ʋttʋt ia hosh onnahinli ont ʋhli ha̱ Alon ʋt ai im apihi̱sa biliashke; hʋchim ai itishali ha̱ nan ʋlhpisa bilia ya hi oke.

⁴ Pʋla ai o̱ hikia kashofa pʋla bila aiʋlhto on taloha ka̱ Chihowah itikba talohonli na bilia he, apesashke.

⁵ Micha bota tohbi lipehbi yo̱ ish ishi cha pʋska lumbo auahtuklo ho̱ ish pʋskashke: pʋska achʋfakma kʋshkoa ishit pokoli tuklo kashke.

⁶ Micha itiakaiya tuklo ho̱ ish talohlashke, itiakaiya achʋfakma hannali hosh ai impa kashofa Chihowah itikba hikia ka̱ on talohashke.

⁷ Micha itiakaiya aiyukali ka̱ fila̱kinsen bano yo̱ ish on ashachashke: yʋmohmi ho̱ luak ishit hukmit Chihowah im issa isht ithana bilia yosh pʋska ya̱ on a̱shashke.

⁸ Nitak hollo moma ka̱ nan itim ʋlhpisa bila yo̱ Islael im ʋlla ʋhleha im ai ishi tuk mak o̱ Chihowah itikba achukmʋt talohli na biliashke.

⁹ Mikma Alon, micha ushi ʋhleha ha̱ immi ha hi oke; micha aholitopa ak o̱ ai ʋpa hi oke; nan ʋlhpisa bilia ho̱ luak ishit hukmit Chihowah im issa yosh i̱ holitopa fehna hoka, ish im achashke, achi tok.

¹⁰ Atuk o̱ i̱ki ʋt Echip hatak o̱ Islael ohoyo ushi yosh Islael im ʋlla ʋhleha ha̱ takla kohchʋt aya tok; atuk o̱ Islael ohoyo ushi ilʋppʋt bina ha̱ Islael hatak o̱ itachowa tok.

¹¹ Mihma Islael ohoyo ushi ʋt Chihowah hohchifo ha̱ ik ahobalot anumpulit kallakshichit anumpuli tok; mikma Moses a̱ isht im ʋla tuk, mihma (ishki ʋt Tan apehlichi ai achʋfa Tibli ya̱ ushetik osh hohchifo kʋt Shilomilh atok.)

¹² Mihma Chihowah im anukfila hʋt im otʋna chi̱ ho̱, ai atoni fohki tok.

¹³ Atuk o̱ Chihowah yʋt Moses a̱ im anumpulit,

¹⁴ Kallakshichit anumpuli tuk a̱ binah ha̱ kocha isht ish onashke; mikma haklo tuk moma kʋt ibbak a̱ noshkobo onochashke, mikma okla moma kʋt tʋli ishit bolashke.

¹⁵ Micha Islael im ʋlla ʋhleha ha̱ im anumpulit, kʋna hosh in Chitokaka ya̱ kalakshichit anumpulikmʋt nan ashʋchi ʋt onʋtonlashke.

¹⁶ Mikma kʋna hosh Chihowah hohchifo ha̱ ik ahobalot anumpulikmʋt illi pulla hi oke, mikma okla moma kʋt tʋli ishit boli pulla hi oke; okla inla yʋt yakni ya̱ ai ʋtta tok akinli chohmit Chihowah hohchifo ha̱ ik ahobalot anumpulikmʋt illi pulla hi oke.

¹⁷ Micha kʋna hosh hatak bi̱ka ʋbikmʋt illi pulla hi oke.

¹⁸ Micha kʋna hosh nan ʋlhpoa yo̱ ʋbikmʋt achukmala hi oke, nan ʋlhpoa yokma nan ʋlhpoa ya hi oke.

¹⁹ Micha hatak ʋt chuka abili̱ka ʋtta ya̱ im okpʋnikma, yʋmihchi tuk a̱ chohmichit ilap ma yʋmihcha hi oke.

²⁰ Kinʋffi hokma kinafa, nishkin okma nishkin, nuti yokma nuti; hatak o̱ kaniohmichit im okpʋnikma, anonti yohmi ho̱ ilap a̱ yʋmihcha hi oke.

²¹ Micha kʋna hosh nan ʋlhpoa ʋbikmʋt atobbashke, micha kʋna hosh hatak a̱ ʋbikmʋt illa hi oke.

²² Okla inla hʋchi̱ yakni ya̱ ai ʋtta tuk a̱ itilauet nan ʋlhpisa hʋchim achʋfa hi oke, hʋchin Chitokaka Chihowah sia hoka, ish im achashke, achi tok.

²³ Mihma kalakshichit anumpuli tuk ash binah ha̱ kocha isht ona cha tʋli ishit bola chi̱ ho̱ Moses ʋt Islael im ʋlla ʋhleha ha̱ im anumpuli tok, mikma Chihowah yʋt Moses a̱ i̱ miha tuk mak o̱ Islael im ʋlla ʋhleha hʋt yʋmihchi tok.