Lefitikʋs 23 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Islael im ʋlla ʋhleha ha̱ im anumpulit, Chihowah impʋchi yʋmmak oka itʋnaha holitopa achit hʋsh anola chi̱, ilʋppa puta kak osh impʋchi li yoke.

³ Nitak hannali ho̱ natoksʋli ʋt ʋlhtaha hi oke: amba nitak isht untuklo kʋto nitak hullo afoha aiitʋnaha holitopa yoke: yʋmmak oka natoksʋli nana kia hʋsh yʋmihcha he keyu hoke; hʋsh aiasha moma ka̱ Chihowah i̱ nitak hollo ya hi oke.

⁴ Ilʋppa puta kak osh Chihowah impʋchi itʋnaha holitopa yo̱ ont ai ʋlhpiesakma hʋsh anola hi oke.

⁵ Hʋshi ʋmmona nitak ont isht auahhushta ont opia kak osh Chihowah im ʋbanʋblit ont ia yoke.

⁶ Micha hʋshi mih makinli nitak ont isht auahtahlapi kak osh pʋska ik shatʋmmo impʋchi Chihowah isht im asha yoke: nitak untuklo ho̱ pʋska ik shatʋmmo hʋshpa hi oke.

⁷ Nitak ʋmmona kak o̱ itʋnaha holitopa hʋchim a̱sha hi oke: tishu atoksʋli nana kia hʋsh yʋmihcha he keyu hoke.

⁸ Amba nitak untuklo ho̱ luak ishit hukmit im issa mak o̱ Chihowah hʋsh im issa hi oke: nitak isht untuklo kʋt itʋnaha holitopa hoke, tishu atoksʋli ya̱ hʋsh yʋmihcha he keyu hoke, ish im achashke, im achi tok.

⁹ Micha Chihowah yʋt Moses a̱ im anumpulit,

¹⁰ Islael im ʋlla ʋhleha ha̱ im anumpulit, Yakni hʋch ima li ka̱ hʋsh ona cha, nawaya hʋshmokmʋt, waya ʋmmona hʋshmo tuk ʋt sita achʋfa ho̱ naholitompa isht ʋtta ya̱ isht hʋshim ona hi oke.

¹¹ Mikma hʋchim aiokpancha chi̱ ho̱ Chihowah itikba ya̱ sita yash hʋsh fahfula hi oke: nitak hullo tuk onnakma naholitompa isht ʋtta yʋt fahfula hi oke.

¹² Micha sita ha̱ hʋsh fahfuli nitak mʋt, hukmit Chihowah im issa mak o̱ chukfushi nakni aiokpuloka iksho afʋmmi ʋmmona hʋsh im issa hi oke.

¹³ Micha balama achukma mak o̱ luak ishit hukmit Chihowah im issa ilhpak im issa yʋt bota tohbi lipehbi kʋshkoa ishit pokoli tuklo hosh bila aiyoma hi oke; micha ishkot im issa oka pa̱ki hin kʋshkoa isht ai ushta ha hi oke.

¹⁴ Micha pʋska, micha tanchi ʋlwʋsha, micha tanchi hilu̱ha noshkobo aiena ka̱ hʋchin Chitokaka ya̱ nan im issa ya̱ isht hʋsh im ona mih nitak ona keyu ka̱ hʋshpa he keyu hoke; hʋsh aiasha moma hʋchim ai itishali hlopulli ka̱ nan ʋlhpisa bilia ya hi oke.

¹⁵ Micha nitak hollo ha ya̱ onnakma sita ha̱ fahfulit im issa yo̱ ont isht hʋsh chukowa tuk nitak ʋttʋt ia ho̱ hʋsh hohtenashke; nitak hullo untuklo hosh tahashke.

¹⁶ Nitak hullo ont isht untuklo ha yo̱ onna ont ʋhli ho̱ nitak pokoli tahlapi ho̱ hʋsh hotehnashke; micha ilhpak im issa himona yo̱ Chihowah hʋsh im issashke.

¹⁷ Kʋshkoa ishit pokoli tuklo atoba, fahfuli pʋska lumbo tuklo ho̱ hʋsh aiasha ya̱ ishit kohchʋt isht hʋsh onashke; bota tohbi lipehbi yosh ishit shatʋmmi aiyomʋt palʋska ya hi oke, Chihowah ya̱ i̱ nawaya ʋmmona yoke.

¹⁸ Micha pʋska ya̱ chukfushi aiokpuloka iksho afʋmmi ʋmmona untuklo, micha wak hobʋk himita achʋfa, micha chukfi nakni tuklo aieninchit hʋsh im issa hi oke; hukmit Chihowah im issa mak osh ilhpak im issa micha ishkot im issa aiena Chihowah i̱ balama achukma luak ishit hukmit im issa ya hi oke.

¹⁹ Yohmikmʋt nan ashʋchi im issa mak o̱ issi kosomushi achʋfa ho̱ issi kosoma yo̱ ai ishit hʋshba hi oke, micha itin nanaiyʋchi im issa ʋbi mak o̱ chukfushi afʋmmi ʋmmona tuklo ho̱ hʋshba hi oke.

²⁰ Mikma naholitompa isht ʋtta yʋt fahfulit im issa mak o̱ waya ʋmmona pʋska ya̱ chukfushi tuklo kash aieninchit Chihowah itikba afahfula hi oke: Chihowah i̱ hullochi yosh naholitopa isht ʋtta immi ha hi oke.

²¹ Micha mih nitak ak inli ho̱ hʋsh anoli na itʋnaha hʋchi̱ holitopa yashke: yʋmmak oka tishu atoksʋli hʋsh yʋmihcha he keyu. Hʋsh ai asha moma hʋchim ai itishali a hlopulli ka̱ nan ʋlhpisa bilia ya hi oke.

²² Atuk osh hʋchi̱ yakni nan awaya ya̱ hʋsh ai ʋmokmʋt hʋsh bʋshlikmʋt hʋchim osapa chukbi puta ka̱ kashofit hʋsh isha he keyu, micha na hʋchi̱ waya ʋlbʋllit hʋsh aiowa he keyu hoke; hatak ilbʋsha micha okla inla aiena kak o̱ hʋsh im ashancha hi oke: hʋchin Chitokaka Chihowah sia hoke, ish im achashke achi tok.

²³ Micha Chihowah yʋt Moses a̱ im anumpulit,

²⁴ Islael im ʋlla ʋhleha im anumpulit, Hʋshi isht untuklo hʋshi yʋmma nitak ʋmmona ma nitak hullo isht ithaiyana hinla isht pu̱fa olahanchi, itʋnaha holitopa hʋchim asha hi oke.

²⁵ Yʋmmak oka tishu a toksʋli ya̱ hʋsh yʋmihcha he keyu hoke; amba luak ishit hukmit im issa ya̱ Chihowah hʋsh im issa hi oke, ish im achashke, achi tok.

²⁶ Micha Chihowah yʋt Moses a̱ im anumpulit,

²⁷ Micha hʋshi isht untuklo ilʋppa i̱ kashoffi nitak ʋt aiasha hi oke: itʋnaha hʋchi̱ holitopa hi oke, micha hʋchimi shilombish a̱ hʋsh ilbʋshali cha luak ishit hukmit Chihowah im issa ya̱ hʋsh im issashke.

²⁸ Micha nitak yʋmma na toksʋli nana kia hʋsh yʋmihcha he keyu hoke: hʋchin Chitokaka Chihowah itikba ya̱ hʋchi̱ kashoffit na kashoffi nitak oka.

²⁹ Nitak yʋmma shilombish nana hosh ilbʋsha he keyukmʋt, shilombish yʋmmʋt im okla im ai itin takla kohchʋt fiopa tʋpa hi oke.

³⁰ Micha nitak yʋmma shilombish nana hosh natoksʋli nana kia yʋmihchikma shilombish yʋmma im okla im ai itin takla ai ishit kanchi la hi oke.

³¹ Na toksʋli nana kia hʋsh yʋmihcha he keyu hoke, hʋsh ai asha moma hʋchim ai itishali hlopulli ka̱ nan ʋlhpisa bilia ya hi oke.

³² Afoha hʋchi̱ nitak hollo ya̱ hi oke, mikma hʋchimi shilombish a̱ hʋsh ilbʋshala hi oke; hʋshi ʋt nitak ont ishit chakkali ʋt opia, opia ka̱ ʋttʋt ia hosh opia ka̱ ont ʋhli kak o̱ hʋchi̱ nitak hollo ya̱ hʋsh holitobla hi oke, im achi tok.

³³ Micha Chihowah yʋt Moses a̱ im anumpulit,

³⁴ Islael im ʋlla ʋhleha im anumpulit, Hʋshi isht untuklo ilʋppa nitak ont isht auahtahlapi kak o̱ nitak untuklo ho̱ Chihowah ya̱ ʋlhtipo im ai impʋcha hi oke.

³⁵ Nitak ʋmmona ka̱ itʋnaha holitopa asha hi oke, yʋmmak oka yuka toksʋli nana kia hʋsh yʋmihcha he keyu hoke.

³⁶ Nitak untuklo ho̱ luak ishit hukmit im issa ya̱ Chihowah hʋsh im issa hi oke: nitak ont isht untuchina ka̱ itʋnaha hʋchi̱ holitopa asha hi oke, micha luak ishit hukmit Chihowah hʋsh im issa hi oke: itʋnaha holitopa yoke; yuka natoksʋli nana kia hʋsh yʋmihcha he keyu hoke.

³⁷ Chihowah impʋchi ilʋppa puta kak o̱ luak ishit hukmit im issa Chihowah im issa ya̱, hukmit im issa, micha ilhpak im issa, ʋbit im issa, micha ishkot im issa aiena nana ilʋppa puta ka̱ nitak im aiʋlhpiesakma itʋnaha holitopa achit hʋsh anola hi oke.

³⁸ Micha Chihowah i̱ nitak hollo puta, micha na hʋchi̱ hʋlbina, micha anumpa kʋllo hʋsh ilonochi moma, micha ilap ahnit hʋsh im issa, Chihowah hʋsh ima aiena hi oke.

³⁹ Micha hʋshi ont isht untuklo nitak ont isht auah tahlapikma, yakni ya̱ awaya tuk a̱ hoiyʋt hʋchim ʋlhtahakmʋt nitak untuklo ho̱ impʋchi yo̱ Chihowah isht hʋsh im aiasha hi oke, nitak ʋmmona kʋt nitak hollo yatukma, nitak ont isht untuchina kʋt nitak hollo ya hi oke.

⁴⁰ Micha nitak ʋmmona ka̱ iti hochukma naksish, pam iti naksish, micha iti hishi chito naksish micha bok ushi ontʋlaka itoko̱wisha aiena hʋsh ishashke; micha nitak untuklo ho̱ hʋchin Chitokaka Chihowah itikba ya̱ hʋchi yukpashke.

⁴¹ Micha afʋmmi achʋfakma nitak untuklo impʋchi yo̱ Chihowah isht hʋsh im aiasha hi oke. Hʋchim ai itishali ha̱ nan ʋlhpisa bilia ya hi oke; hʋshi isht untuklokma isht hʋsh aiasha hi oke.

⁴² Chisha̱ko hʋsh ai asha na nitak untukla hi oke; Islael osh ʋtta tok moma kʋt chisha̱ko aiasha hi oke.

⁴³ Yʋmohmi ho̱ Echip yakni ya̱ pehliechit kohchi li mʋt, Islael im ʋlla ʋhleha ha̱ chisha̱ko ashachit isht a̱ya li tok a̱ hʋchim ai itishali hʋt ithaiyana hi oke, hʋchin Chitokaka Chihowah sia hoke, ish im achashke, achi tok.

⁴⁴ Mihma Moses ʋt Islael im ʋlla ʋhleha ha̱ Chihowah impʋchi puta ka̱ im anoli tok.