Lefitikʋs 22 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Alon micha ushi ʋhleha ha̱ aiena ka̱ ish im anumpuli na, Islael im ʋlla ʋhleha nan im aholitopa ya̱ ai i̱ filʋmmi cha, nana a̱ hullochi tuk a̱ sa hohchifo ha̱ isht ik ahobalo kashke: Chihowah sia hoke.

³ Hʋchim isht atia moma ka̱ kʋna hosh hʋchim ai iti shali ha̱ anta kʋt ik im akashofo ʋt onʋtonla hosh nana holitopa Islael im ʋlla ʋhleha hʋt Chihowah ya̱ i̱ hullochi cha tuk a̱ bili̱ka onakmʋt sa tikba ai i̱ filʋmmit fiopa tʋpa hi oke; Chihowah sia hoke.

⁴ Hatak nana hosh Alon ushi yosh lepa, keyukmʋt i̱ yanahanli ʋt ik kashofo ki̱sha na, naholitopa ya̱ ai ʋpa he keyu hoke. Micha kʋna hosh nan illi isht ik kashofo, keyukmʋt im isht ai unchuloli ʋt i̱ kohcha tuk o̱ halelikmʋt,

⁵ Keyukmʋt kʋna hosh na balʋlli nana ho̱ ik kashofo ishit toba tuk, keyukmʋt hatak osh ik a kashofo kaniohmi ho̱ im aiesha hinla aiena ho̱ haleli tuk,

⁶ Shilombish osh ilʋppa chohmi kanima ho̱ haleli tuk mʋt, ik kashofo ho̱ ont opia cha, nipi ya̱ oka isht ik achifo ki̱sha kʋt naholitopa ya̱ ai ʋpa he keyu hoke.

⁷ Atuk osh hʋshi ʋt okatulakma kashofa hi oke, micha im ilhpak atuk okʋt i̱ himmak a yano naholitopa ya̱ ai ʋpa hi oke.

⁸ Ilap akinlit illi tuk, micha nampoa hosh ʋbi tuk a̱ ʋpʋt isht ile litehla he keyu hoke, Chihowah sia hoke.

⁹ Yʋmohmi hoka, a̱ nan ʋlhpisa ya̱ holitoblashke, ik ahobalot nan ashʋchi isht onʋtoyula cha, illi nah: Chihowah sia hosh hullochi lishke.

¹⁰ Okla inla nana hosh naholitopa ya̱ ʋpa he keyu hoke: naholitompa isht ʋtta i̱ nowʋt aya̱, micha tishu ilhtono aiena kʋt naholitopa ya̱ ʋpa he keyu.

¹¹ Amba naholitompa isht ʋtta yʋt shilombish o̱ i̱ tʋli holisso ishit chumpa tuk ʋt ai ʋpa hi oke: micha in chuka ya̱ ai ʋtta tok aiena kʋt im ilhpak a̱ okla ai ʋpa hi oke.

¹² Naholitompa isht ʋtta ushetik ʋt okla inla yo̱ auwayakmʋt naholitopa im issa ya̱ ai ʋpa he keyu hoke.

¹³ Amba naholitompa isht ʋtta ushetik ʋt i̱ hatak illi, keyukmʋt kanchi tuk o̱ ʋlla ik im iksho yosh falamʋt i̱ki in chuka onakmʋt himita tok o̱ chohmit i̱ki im ilhpak a̱ ʋpa hi oke; yohmi kia okla inla nana hosh ʋpa he keyu hoke.

¹⁴ Micha hatak ʋt ik ithano hosh naholitopa ya̱ ʋpakmʋt, kashapa ont ishit tahlapi ya̱ ibafoka cha, naholitopa aieninchit naholitompa isht ʋtta ya̱ ima hi oke.

¹⁵ Micha Islael im ʋlla ʋhleha hʋt naholitopa Chihowah im issa tuk a̱ ik ahobalo kashke.

¹⁶ Micha naholitopa ya̱ ʋpa cha, ʋbanʋbli nan ashʋchi ʋt ik onʋtonlá, ik ahno kashke: Chihowah sia hosh hullochi li hoka, ish im achashke, achi tok.

¹⁷ Micha Chihowah yʋt Moses a̱ im anumpulit,

¹⁸ Alon, micha ushi ʋhleha ha̱ micha Islael im ʋlla ʋhleha moma aiena ka̱ im anumpulit, Islael in chuka achʋfa ya̱, keyukmʋt okla inla yosh Islael a̱ a̱sha kʋt hatak kʋna hosh anumpa kʋllo il onochi tuk moma isht aiokpʋchi im issakmʋt, micha hukmit im issa nana ho̱ ilap ahnit im issa ya̱ Chihowah im issakmʋt:

¹⁹ Hʋchishno, hʋsh ahni hosh nakni yosh aiokpuloka iksho wak, keyukma chukfi kia micha issi kosoma aiena ho̱ hʋsh im issashke.

²⁰ Amba nana hosh aiokpuloka im a̱shakma hʋsh im issa he keyu hoke: hʋchim aiokpʋcha he keyu hoka.

²¹ Micha kʋna hosh anumpa kʋllo il onochi tuk ʋt aia̱hlicha chi̱ hosh itin naniyʋchi im issa mak o̱ ʋbit im issa, keyukmʋt ilap ahni hosh, wak okmá keyukmʋt chukfi yokmá nana im issa mak o̱ Chihowah im issakmʋt aiokpʋcha chi̱ ka̱ ik ai ono ʋt iksho ka hi oke.

²² Niskin lʋpa, keyukmʋt kobafa, keyukmʋt imomokpulo, keyukmʋt shatali im a̱sha, keyukmʋt nutak bala̱kchi, keyukmʋt hlachowa aiena ka̱ Chihowah hʋsh im issa he keyu, micha alta onochit luak ishit hukmit Chihowah hʋsh im issa he keyu hoke.

²³ Wak hobʋk osh, keyukmʋt chukfushi yosh i̱ nana ho̱ isht atapa, keyukmʋt isht ik ono ya̱ ilap ahnit ish im issa hinla hoke; amba anumpa kʋllo il onochi atuk ano aiokpʋcha he keyu hoke.

²⁴ Litowa keyukmʋt kʋhla, keyukmʋt kobafa, keyukmʋt bʋsha aiena ka̱ Chihowah hʋsh im issa he keyu hoke; micha hʋchi̱ yakni ya̱ hʋsh ai im issa he keyu hoke.

²⁵ Micha okla inla ibbak foyuka ho̱ ilʋppa kanima ka̱ hʋchin Chitokaka i̱ pʋska ya̱ hʋsh im issa he keyu hoke; im a liteha yʋt fo̱ka, micha aiokpuloka yʋt fo̱ka hoka, hʋch im aiokpʋcha he keyu hoke; ish im achashke, achi tok.

²⁶ Micha Chihowah yʋt Moses a̱ im anumpulit,

²⁷ Wak hobʋk, keyukmʋt chukfi, keyukmʋt issi kosoma yo̱ isht ona hokma, nitak untuklo ho̱ ishki ya̱ im anta ha hi oke; nitak isht untuchina ai ʋhlit ia hokʋno luak ishit hukmit Chihowah im issa yo̱ aiokpʋcha hi oke.

²⁸ Micha wak tek okma, chukfi tek okma nana kia nitak acha̱fa it aieninchit hʋshba he keyu hoke.

²⁹ Micha yakoke ahnit ima, ʋbit im issa yo̱ Chihowah ya̱ hʋsh im issakmʋt, hʋchishno hʋsh aiahni hosh hʋsh im issashke.

³⁰ Mih nitak akinli ho̱ ʋpʋt taha hi oke, hʋsh ashanchi na ont onna he keyu: Chihowah sia hoke.

³¹ Yʋmohmi hoka ʋm anumpa ʋlhpisa ha̱ hʋsh holitobli cha, hʋsh yʋmihcha hi oke; Chihowah sia hoke.

³² Micha sa hohchifo holitopa ka̱ hʋch ik ahobalo ka he keyu; amba Islael im ʋlla ʋhleha im ai itin takla ya̱ sa holitopa hi oke; Chihowah sia hosh hʋchi hullochi lishke.

³³ Hʋchin Chihowah sia ha chi̱ hosh Echip yakni ya̱ pehlichit hʋchi kohchi li tok oke: Chihowah sia hoke; im achi tok.