Lefitikʋs 21 - Chahta Holisso Holitopa 1886

¹ Micha Chihowah yʋt Moses a̱ im anumpulit, Na holitompa isht a̱sha Alon ushi ʋhleha ha̱ im anumpulit, Kanima kia im okla ai illi ya̱ ishit liteha he keyu.

² Amba i̱ kanomi hosh i̱ kanomi fehna, ishki, micha i̱ki micha ushi, micha ushetik micha itibapishi,

³ Micha in tek osh hatak haleli keyu, i̱ kanomi fehna yosh i̱ hatak iksho chatuk, yʋmmak okʋno liteha hinla hoke.

⁴ Yohmi kia im okla im ai itin takla ya̱ hatak i̱ shahli yatuk okʋt, ile litehlit ik ile holitoblo kashke.

⁵ Noshkobo ha̱ yushmilali ikba he keyu, micha nutakhish chukbika ya̱ sha̱fa he keyu, micha nipi ya̱ ile bʋshla he keyu hoke.

⁶ In Chitokaka ya̱ i̱ holitopa cha, i̱ Chitokaka hohchifo ha̱ ik ahobalecho kashke; luak ishit hukmit Chihowah im issa, micha in Chitokaka i̱ pʋska yo̱ im issa hokʋt; yʋmohmi hokʋt holitopa hi oke.

⁷ Haui ya̱, keyukmʋt ik ahobo ohoyo ha̱ ik esho kashke, micha i̱ hatak ʋt kanchi tok ohoyo ha̱ isha he keyu hoke; in Chitokaka i̱ holitopa hoka.

⁸ Yʋmohmi hoka chin Chitokaka i̱ pʋska im issa hoka ish hullocha hi oke; chi̱ holitopa hi oke; hʋchi hullochili tuk Chihowah sia hʋt sa holitopa hoka.

⁹ Micha naholitompa isht ʋtta ushetik osh hauit anta cha ik ilahobalo tuk mʋt, i̱ki ya̱ ik ahobalo hoke: luak ishit lua hi oke.

¹⁰ Mikma itibapishi ʋhleha im ai itin takla ya̱ naholitompa isht ʋtta i̱ shahli, noshkobo ha̱ isht ahama bila yʋt on hlatapa tok, micha nafohka ya̱ fohka chi̱ ho̱ hullochi tok ʋt noshkobo ompohomo ya̱ shu̱fa he keyu, micha i̱ nafohka ya̱ hlilʋffa he keyu hoke.

¹¹ Micha haknip illi ya̱ iba chukowa he keyu, micha i̱ki, keyukmʋt ishki yatuk ok mak o̱ ile litehla he keyu hoke.

¹² Micha aboha holitopa ya̱ kohcha he keyu, micha in Chitokaka im aboha holitopa ya̱ ik ahobalo ka he keyu hoke; in Chitokaka isht im ahama bila isht a holitopa yʋt onʋtonla hokʋt; Chihowah sia hoke.

¹³ Micha hatak ik halelo yo̱ ohoyo ha̱ isha hi oke.

¹⁴ I̱ hatak illi, keyukmʋt i̱ hatak ʋt kanchi, keyukmʋt ik ahobo, keyukmʋt haui aiena ka̱ isha he keyu, amba ilap im okla akinli hatak haleli keyu ho̱ ohoyo isha hi oke.

¹⁵ Micha im okla im ai itin takla ya̱ im isht atiaka ya̱ ik ahobalecho kashke: Chihowah sia hosh hullochi li hoke, ish im achashke, im achi tok.

¹⁶ Mihma Chihowah yʋt Moses a̱ im anumpulit,

¹⁷ Alon a̱ im anumpulit, Kʋna hosh chim isht atiaka yosh im ai iti shali ha̱ anta kʋt ik im ai ono ʋt a̱shakmʋt in Chitokaka i̱ pʋska ya̱ im issa chi̱ hosh bili̱ka ik ono kashke, ai ʋla he keyu;

¹⁸ Hatak nishkin lʋpa, keyukmʋt iyimomokpulo, keyukmʋt ibechulo latʋssa, keyukmʋt nana hoh kia isht atampa,

¹⁹ Keyukmʋt hatak osh iyi kobafa, keyukmʋt ibbak kobafa,

²⁰ Keyukmʋt nʋli kofona, keyukmʋt hofanti ik ono, keyukmʋt nishkin okpulo, keyukmʋt nutak bala̱kchi hlachowa, keyukmʋt hlachowa ik ʋtto, keyukmʋt i̱ nihi kʋhla hatak nana kia ai okpuloka im a̱sha kʋto bili̱ka ona he keyu hoke.

²¹ Hatak nana hosh naholitompa isht ʋtta Alon isht atiaka yosh ai okpuloka im a̱sha kʋt luak ishit hukmit Chihowah im issa ya̱ bili̱ka onʋt im issa he keyu hoke: aiokpuloka im a̱sha hoke; bili̱ka onʋt in Chitokaka i̱ pʋska ya̱ im issa he keyu hoke.

²² In Chitokaka i̱ pʋska holitopa i̱ shahli, micha holitopa aiena ka̱ ʋpa hi oke.

²³ Aiokpuloka im a̱sha hokʋt, peh chukowʋt natakali ya̱ onʋt alta ya̱ bili̱ka ona he keyu hoke; yʋmohmi hosh ʋm aboha holitopa ya̱ ik ahobalo kashke: Chihowah sia hosh hullochi li hoka, ish im achashke, achi tok.

²⁴ Mihma Moses ʋt Alon micha ushi ʋhleha, micha Islael im ʋlla ʋhleha moma ka̱ im anoli tok.