Lefitikʋs 20 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Anonti Islael im ʋlla ʋhleha ha̱ im anumpulit, Kʋna hosh Islael im ʋlla ʋhleha hosh, keyukmʋt okla inla Islael takla ʋtta yosh im isht atiaka yo̱ Molek a̱ imakmʋt illi pulla hi oke, yakni yash okla hʋt tʋli ishit bola hi oke.

³ Mikma hatak yʋmma sa nashuka ya̱ isht i̱ sanali lish im okla ai itin takla ya̱ a kohchit ishit kanchi la hi oke; ʋm aboha holitopa ya̱ litehla chi̱ hosh micha sa hohchifo holitopa ik ahobalo ka chi̱ hosh im isht atiaka yo̱ Molek a̱ ima hoka.

⁴ Micha yakni ya̱ okla hʋt hatak ʋt im ishtatia ka ya̱ Molek a̱ ima ho̱ pi̱sa kia kaniohmit nishkin luhmi cha ikbo tuk ma,

⁵ Yʋmohmikma hatak yʋmma, micha in chuka achʋfa ya̱, micha Molek iti̱ haua chi̱ hosh hauit iakaiya moma ka̱, sa nashuka isht i̱ sanali lish, im okla im ai itin takla ya̱ kohchit fiopa tʋbli la hi oke.

⁶ Micha shilombish kʋna hosh fullotʋt shilombish okpulo itim aiachʋfa micha isht a hullo ya̱ iakaiyʋt hauit iakaiyakma, shilombish yʋmma sa nashuka isht i̱ sanali lish, im okla im ai itin takla ya̱ kohchit fiopa tʋbli la hi oke.

⁷ Yʋmohmi hoka, hʋsh ile hullochi cha hʋchi holitopashke; hʋchin Chitokaka Chihowah sia hoke.

⁸ Atuk o̱ a̱ nanʋlhpisa ha̱ hʋsh holitobli cha hʋsh yʋmihchashke. Chihowah sia hosh hʋchi hullochi li hoke.

⁹ Kʋna hosh i̱ki, keyukmʋt ishki ya̱ kallakshichit anumpulikmʋt illi pulla hi oke; i̱ki, keyukmʋt ishki ya̱ kallakshichit anumpuli hoka; yohmi ka̱ im issish ʋt ilap ak inli ka̱ onʋtoyula hi oke.

¹⁰ Micha kʋna hosh hatak tekchi yo̱ itin luma̱ka tuk, chuka a bili̱ka hatak tekchi itin luma̱ka yash itin luma̱ka hatak, micha itin luma̱ka ohoyo aiena kʋt illi pulla hi oke.

¹¹ Micha hatak ʋt i̱ki tekchi ya̱ iba tʋshki tuk ʋt i̱ki nipi bano ya̱ wakʋmmi tuk oka, ita tu̱klot illi pulla hi oke; im issish ʋt ilap ak o̱ onʋtonla hi oke.

¹² Micha hatak osh ipok a̱ iba tʋshkikmʋt ita tu̱klot illi pulla hi oke; itaiyokomachi hokʋt; im issish ʋt ilap akinli hosh onʋtoyula hi oke.

¹³ Micha hatak ʋt hatak bi̱ka iba tʋshkit ohoyo iba tʋshki ka̱ chohmikmʋt, ita tu̱klot nan isht yuwala ya̱ yʋmihchi hokʋt, illi pulla hi oke; im issish ʋt ilap akinli hosh onʋtola hi oke.

¹⁴ Micha hatak osh ohoyo ha̱ micha ishki ya̱ aieninchit ishikmʋt haksi yoke; yʋmma micha ita tu̱klo ka̱ aienʋt luak ishit lua hi oke: yʋmohmi ho̱ hʋchitin takla ya̱ haksi kʋt iksho kashke.

¹⁵ Micha hatak osh nan ʋlhpoa iba tʋshkikmʋt illi pulla hi oke; mikma nanʋlhpoa ya̱ hʋshbi pulla hi oke.

¹⁶ Micha ohoyo hosh nanʋlhpoa bili̱ka onʋt nanʋlhpoa in tushkikma, ohoyo hash micha nanʋlhpoa aieninchit hʋsh ba hi oke: illit okla pulla hi oke; im issish ʋt onʋtuyula hi oke.

¹⁷ Micha hatak ʋt in tek a̱ i̱ki ushetik a̱, keyukmʋt ishki ushetik a̱ ishi cha nipi bano ka pisa, micha ilap a̱ nipi bano ka̱ pisakma nahaksi yoke: im okla itikba ya̱ fiopa tʋpʋt okla hi oke: in tek nipi bano ya̱ wakʋmmi tuk oka, nanashʋchi ʋt onʋtola hi oke.

¹⁸ Micha hatak osh ohoyo abeka yo̱ iba tʋshki cha nipi bano ya̱ wakʋmmikmʋt, im a yanʋlli ya̱ pisa hoka, mikma ohoyo hʋt im issish a yanʋlli wakʋmmi hoka ita tu̱klot im okla im ai itin takla issʋt fiopa tʋpʋt okla hi oke.

¹⁹ Micha chishki itibapishi micha chi̱ki in tek nipi bano ya̱ ish wakʋmma he keyu; i̱ kanomi fehna ya̱ i̱ wakʋmmi hoka: nanashʋchi ʋt onʋtonla hi oke.

²⁰ Micha hatak osh imoshi tekchi ya̱ iba tʋslikikmʋt imoshi nipi bano ya̱ wakʋmmi hoka, nanashʋchi ʋt onʋtonla hi oke; ʋlla ik im iksho hosh illit okla hi oke.

²¹ Micha hatak osh itibapishi tekchi ya̱ ishikma, nan ikkashofo yoke: itibapishi nipi bano ya̱ wakʋmmi hoke, ʋlla ik im iksho hosh illit okla hi oke.

²² Yʋmohmi hoka, a̱ nanʋlhpisa moma, micha ʋm aiʋlhpesa yʋmihchi aiena ka̱ hʋsh holitobli cha, hʋsh yʋmihchashke; yʋmohmi hosh yakni hʋsh aiasha chi̱ ka̱ hʋchisht ona la chi̱ kʋt hoetʋt ik hʋchi kohcho kashke.

²³ Hʋchi tikba a kanchi li tok oklushi ʋt nana akaniohmi ya̱ hʋsh a̱ya he keyu hoke, nana ilʋppa puta kak o̱ yʋmihchi chatuk, yʋmohmi hatuk o̱ shitilema li tuk oke.

²⁴ Yʋmohmi tuk kia I̱ yakni ya̱ hʋsh aiasha hi oke, hʋchim achi li hatuk, atuk osh yakni pishukchi micha foibila aiyanahanli ya̱ hʋsh aiasha chi̱ ho̱ hʋchima la chi̱ hoke; hʋchin Chitokaka Chihowah sia hosh okla inla ya̱ hʋch iti filʋmminchi li tuk oke.

²⁵ Yʋmohmi hoka, nanʋlhpoa kashofa, micha ik kashofo, micha hushi ik kashofo, micha kashofa puta ka̱ hʋsh itim inlʋcha hi oke; yohmi ka̱ nanʋlhpoa, keyukmʋt hushi, keyukmʋt nan okcha̱ya kaniohmi yosh yakni om balahanli, yʋmmak o̱ ik kashofo apesʋt hʋchi̱ filʋmmichi li tuk a̱ hʋchi shilombish a̱ ishit yuwala yo̱ ishit hʋchi ikbo kashke.

²⁶ Micha hʋs sʋm i̱ holitopa hi oke; Chihowah sia hʋt sa holitopa hosh ʋmmi hʋchia ha chi̱ ho̱ okla inla ya̱ ile hʋchi̱ filʋmmichi li tuk oke.

²⁷ Micha hatak osh, keyukmʋt ohoyo hosh shilombish okpulo ai itibai achʋfa, keyukmʋt isht a hullo ʋt illi pulla hi oke; tʋli yo̱ ishit bola hi oke; im issish ʋt ilap ak o̱ onʋtonla hi oke, ish im achashke, achi tok.