Lefitikʋs 2 - Chahta Holisso Holitopa 1886

¹ Micha kʋna hosh ilhpak im issa Chihowah ya̱ im issakmʋt nan im issa kʋt bota tohbi lipehbi ya hi oke; micha bila ya̱ on hlatʋblikmʋt fila̱kinsen onochashke.

² Mikmʋt na holitompa isht a̱sha Alon ushi ʋhleha ha̱ isht im onashke, mikma naholitompa isht ʋtta yʋt bota tohbi micha bila, micha fila̱kinsen moma aiena ibbak alota achʋfa ho̱ eshi cha isht ithana yo̱ alta onochit hukmashke. Chihowah nan i̱ balama achukma yo̱ luak ishit hukmit im issa yashke.

³ Mikma ilhpak im issa atampa hokʋto Alon micha ushi ʋhleha immi hashke; luak ishit hukmit Chihowah im issa nana holitopa moma i̱ shahli hoke.

⁴ Apalʋska a nuna yo̱ ilkpak im issa ya̱ isht ishla hokmʋt, bota tohbi lipehbi pʋska lumbo ik shatʋmmo bila yʋmmi yashke, keyu hosh pʋska lapushki ik shatʋmmo yokmʋt bila isht ahamashke.

⁵ Micha ilhpak ish im issa yʋt ampo mahaia a nuna yokmʋt bota tohbi lipehbi toba hosh ik shatʋmmo bila yʋmmi yashke.

⁶ Ish bushullichi cha bila ish on hlatʋblashke: ilhpak im issa yoke.

⁷ Micha ilhpak ish im issa yʋt ampo ʋlwʋsha a nuna yokmʋt bota tohbi lipehbi bila yʋmmi yashke.

⁸ Ilhpak im issa yʋt ilʋppa chohmi puta kak o̱ atoba ka̱ Chihowah isht ish im onashke; atuk o̱ na holitompa isht ʋtta ya̱ imakma yʋmmak osh alta a hikia ka̱ isht onashke.

⁹ Micha na holitompa isht ʋtta yʋt ilhpak im issa yash ai ishit isht ithana yo̱ ikbit alta onochit hukmashke; luak ishit hukmit im issa Chihowah nan i̱ balama achukma yoke.

¹⁰ Micha ilhpak im issa atampa kʋt Alon, micha ushi ʋhleha immi ha hi oke; luak ishit hukmit Chihowah im issa ya̱ nana holitopa moma i̱ shahli hoke.

¹¹ Ilhpak im issa nana kia Chihowah hʋsh im issa kʋt shatʋmmi ya he keyu hoke; luak ishit hukmit Chihowah im issa nana kia shatʋmmi, keyukmʋt foi bila nana kia hʋsh hukma he keyu hoke.

¹² Nawaya ʋmmona im issa hokʋno, Chihowah hʋsh im issa hi oke. Yohmi kia na balama yo̱ alta ai on lua he keyu hoke.

¹³ Micha ilhpak hʋsh im issa puta kʋt hʋpi ha̱ hʋsh yʋmmichashke; ilhpak im issa ya̱ Chihowah nan itim apesa hʋpi ik ono kʋt iksho kashke; nana hʋsh im issa moma kʋt hʋpi aieninchit hʋsh im issashke.

¹⁴ Micha ilhpak im issa na chi̱ waya ʋmmona ya̱ Chihowah ya̱ ish im issakmʋt ilhpak im issa na chi̱ waya ʋmmona ya̱ onush hiloha luak ishit shilʋt onush noshkobo alota chilohka yashke.

¹⁵ Micha bila ish on hlatʋbli cha fila̱kinsen ish onochashke; ilhpak im issa yoke.

¹⁶ Mikma na holitopa isht ʋtta yʋt isht ithana yo̱ onush chilohka kashapa, micha bila kashapa, micha fila̱kinsen moma aiena ka̱ hukmashke; luak ishit hukmit Chihowah im issa yoke.