Lefitikʋs 19 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Islael im ʋlla ʋhleha okla moma ka̱ im anumpulit, Nan ashʋchi ik hʋchim iksho kashke: Chitokaka hʋchin Chihowah sia hʋt nanashʋchi ik sʋm iksho hoka.

³ Hatak hʋsh puyuta kʋt hʋchishki, micha hʋchi̱ki aiena ka̱ hʋsh i̱ nukwia cha, a̱ nitak hollo ya̱ hʋsh holitoblashke: Chitokaka hʋchin Chihowah sia hoke.

⁴ Fullotʋt na holbʋt toba ya̱ hʋchik im ono kashke; micha bilʋt akmot na holbʋt toba hʋch ik ikbo kashke: Chitokaka hʋchin Chihowah sia hoke.

⁵ Micha ʋbit im issa ya̱ itin nanaiyʋchi im issa yo̱ Chitokaka hʋsh im issakmʋt, hʋchishno hʋchim anukfila hosh hʋsh im issa hi oke.

⁶ Hʋsh im issa i̱ nitak akinli, micha im onna aiena kak o̱ hʋshpa hi oke; atuk o̱ kaniohmi kʋt nitak ont atuchina ka̱ a̱shakmʋt luak ishit hukma hi oke.

⁷ Micha nitak ont atuchina ka̱ kaniohmi ka̱ ʋpakma nan isht yuwala yoke; aiokpʋcha he keyu hoke.

⁸ Yʋmohmi hoka kʋna hosh ʋpakmʋt nanashʋchi tuk ʋt onʋtonla hi oke; Chihowah i̱ nahullochi ya̱ ik ahobalo hoka; micha shilombish yʋmmʋt im okla im aiitin takla akohchʋt fiopa tʋpa hi oke.

⁹ Micha hʋchi̱ yakni nana awaya hʋshmokmʋt, hʋchim osapa chukbi puta ka̱ ʋmohmichit hʋshma he keyu hoke; micha hʋsh ai ʋmo yʋt ʋlbʋllit hʋsh ai ʋma he keyu hoke.

¹⁰ Pa̱kʋpi hʋchim ahollokchi a̱ hʋsh ʋlbʋlla he keyu; micha pa̱kʋpi hʋchim ahollokchi yash pa̱ki ya̱ mominchit hʋsh ai ʋma he keyu hoke; ilbʋsha micha okla inla aiena ka̱ hʋsh im ashacha hi oke; Chitokaka hʋchin Chihowah sia hoke.

¹¹ Hʋsh hu̱kopa he keyu, micha hʋsh haksicha he keyu, micha hʋsh iti̱ holaba he keyu hoke.

¹² Micha a̱hli keyu ka̱ sa hochifot anumpa kʋllo hʋsh anumpula he keyu; micha chin Chitokaka hohchifo ha̱ ik ahobalot chik hochifo kashke: Chihowah sia hoke.

¹³ Chin chuka bili̱ka hatak a̱ ish haksicha he keyu; micha ish wehpula he keyu; hatak ilhtono ʋt asitʋbi tuk ʋt chin tonla na ik onno kashke.

¹⁴ Ik haponaklo ya̱ anumpa okpulo isht chik mihacho kashke, micha niskin lʋpa ya̱ isht ibetʋbli itikba chik bohlo hosh, amba chin Chihowah ya̱ ish i̱ nukwiyashke: Chitokaka sia hoke.

¹⁵ Nanapesa ka̱ ai ʋlhpesa keyu ya̱ ish yʋmihcha he keyu; hatak ilbʋsha nipi ya̱ ish holitobla he keyu; micha hatak holitopa annoa ya̱ ish holitobla he keyu hoke: amba aiʋlhpiesa ho̱ chin chuka bili̱ka hatak a̱ ish im apesa hi oke.

¹⁶ Chim okla itin takla ya̱ nan anoli yosh chuka abaiyʋt ish a̱ya he keyu; micha chin chuka bili̱ka hatak im issish a̱ i̱ sanalit ish hikia he keyu hoke: Chitokaka sia hoke.

¹⁷ Chitibapishi ha̱ chi chu̱kʋsh a̱ ish i̱ nukkilla he keyu hoke; ik kaniohmi kia chin chuka a bili̱ka hatak a̱ ish im anumpula hi oke, micha nanashʋchi ʋt ik onʋtonla; ish ahna he keyushke.

¹⁸ Chim okla ʋlla ʋhleha ha̱ hʋsh il aiokha, he keyu; micha hʋsh i̱ potʋnna he keyu; amba chin chuka̱ a bili̱ka hatak a̱ hʋsh holitobli kʋt chishno akinli ish chohmichashke: Chitokaka sia hoke.

¹⁹ A̱ nanʋlhpisa ha̱ hʋsh holitoblashke. Chi̱ nan ʋlhpoa ya̱ ilaiyukalichit ish itim ai ikbicha he keyu hoke: Chim osapa ya̱ na nihi itaiyoma yo̱ ish ahokcha he keyu hoke: micha linen micha chukfi hishi itaiyoma nafohka ya̱ ish foyuka he keyu hoke.

²⁰ Micha kʋna hosh yuka ohoyo yosh hatak im ʋlhpoa, micha falʋmminchit chumpa tok keyu, micha yuka issa ima tok keyu ho̱ iba tʋshki tuk ma fʋma hi oke; yuka issa keyu yatuk oka illit okla he keyu hoke.

²¹ Mikma ʋbanʋbli im issa ya̱ Chihowah isht im onʋt, ʋbanʋblit im issa mak o̱, chukfi nakni yo̱ okla moma im ʋlhtipo okhissa ya̱ isht ona hi oke.

²² Mikma na holitompa isht ʋtta yʋt nanashʋchi yʋmihchi kash chukfi nakni yash o̱ Chihowah itikba ya̱ isht im ai i̱ kashoffa hi oke; mikma nanashʋchi yʋmihchi tuk ʋt i̱ kashofa hi oke

²³ Atuk o̱ yakni ya̱ hʋsh onakmʋt ilhpak achi̱ ho̱ iti puta hʋsh hokchi tukmʋt wayakma, hakshup ik tapo hʋsh itapesa hi oke: afʋmmi tuchina kak osh hakshup ik tʋpo yo̱ hʋchi̱ chohma hi oke: ai ʋpa he keyu hoke.

²⁴ Amba afʋmmi ont ai ushta hokma waya moma kʋt holitopa ho̱ Chihowah isht holitoblicha hi oke.

²⁵ Atuk osh afʋmmi ont ishit tahlapi kak o̱ waya ka̱ hʋsh ai ʋpa hi oke: yʋmohmi ho̱ hʋchi̱ wa̱ha̱ya hi oke: hʋchin Chitokaka Chihowah sia hoke.

²⁶ Nana hoh kia issish aieninchit hʋshpa he keyu hoke; micha nan isht yushpakʋmmi ya̱ hʋsh yʋmihcha he keyu, micha nitak hʋsh apestikela he keyu hoke.

²⁷ Hʋchi noshkobo chukbi pa̱shi ya̱ ʋmot hʋchik apakfoblicho kashke, micha hʋchi nutakhish chukbi ya̱ hʋchik okpano kashke.

²⁸ Illi ak atuk o̱ hʋchi nipi ya̱ hʋsh ile bʋshla he keyu, micha in chu̱wa ya̱ hʋsh ile yʋmihcha he keyu hoke: Chihowah sia hoke.

²⁹ Chisotek a̱ haui ikbicha chi̱ hosh chik kancho kashke, yʋmohmi ho̱ yakni ʋt haui toba bieka, mikmʋt yakni ʋt nahaksi ho isht alotowa hi oke.

³⁰ A̱ nitak hullo ya̱ hʋsh holitobli cha ʋm aboha holitopa ya̱ hʋsh holitoblashke: Chihowah sia hoke.

³¹ Shilombish okpulo ai itim achʋfa ya̱ hʋchik ahnincho kashke; micha isht ahullo, yʋmma isht hʋchi liteha chi̱ ka̱ hʋchik im asilhho kashke: hʋchin Chitokaka Chihowah sia hoke.

³² Hatak noshkobo tohbi yo̱ itikba ya̱ ish wakaiyashke; micha hatak sipokni nashuka ya̱ ish holitoblashke; micha chin Chitokaka ya̱ ish i̱ nukwi̱ yashke: Chihowah sia hoke.

³³ Micha okla inla yosh hʋchi takla hʋchi̱ yakni ahanta tuk a̱ apistikelit chu̱kʋsh hʋsh okpʋna he keyu hoke.

³⁴ Amba okla inla yosh hʋchi takla ahanta kʋt hʋchim ai itin takla ai ʋtta tuk akinli ho̱ hʋchin chohmashke, mikma hʋch i̱ holitopa kʋt hʋchishno akinli hʋchin chohmashke; okla inla yosh Echip yakni ya̱ hʋsh ai asha tuk oka; hʋchin Chitokaka Chihowah sia hoke.

³⁵ Nan apesa, isht ʋlhpisa, ishit weki, keyukmʋt ai ʋlhpisa yoh kia, ik ai ʋlhpeso nana ho̱ hʋsh yʋmihcha he keyu hoke.

³⁶ Aweki aiʋlhpesa, micha isht weki aiʋlhpesa, efah aiʋlhpesa, micha hin aiʋlhpesa hosh hʋchim a̱sha hi oke. Hʋchin Chitokaka Chihowah sia hosh Echip yakni ya̱ a̱pehlichit hʋchi kohchi li tok oke.

³⁷ Yʋmohmi hoka a̱ nanʋlhpisa, micha ʋm aiʋlhpesa yʋmihchi ak o̱ ithanʋt hʋsh yʋmihchashke Chihowah: sia hoke, ish im achashke, achi tok.