Lefitikʋs 18 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Islael im ʋlla ʋhleha ha̱ ish im anumpulit, ʋno ak osh Chitokaka hʋchin Chihowah sia hoke, ish im achashke.

³ Echip yakni aiasha, yʋmma hʋsh aiasha tuk, yʋmmʋt nana a kaniohmi ya̱ hobachit hʋsh yʋmihcha he keyushke; micha Kenan yakni hʋch isht ona la chi̱ yʋmma a̱sha kʋt nana yʋmohmi ya̱ hobachit hʋsh yʋmohma he keyu hoke, micha i̱ nan ʋlhpisa ka̱ im antiʋt hʋsh noho̱wa he keyu.

⁴ Ʋm aiʋlhpesa micha nan isht apesali, puta ka̱ hʋsh yʋmihchi cha, a̱ nan ʋlhpisa ha̱ holitoblit hʋsh foyuka hi oke; Chitokaka hʋchin Chihowah sia hoke.

⁵ Yʋmohmi hoka a̱ nanʋlhpisa, micha a̱ nanʋlhpisa aiʋlhpisa ak o̱ hʋsh yʋmihcha hi oke; yʋmmak o̱ hatak ʋt yʋmihchi hokmak osh aiokcha̱ya hi oke: Chihowah sia hoke.

⁶ Hʋsh achʋfa kia i̱ kanohmi ha̱, nipi bano ho̱ i̱ wakʋmma chi̱ hosh bili̱ka hʋch ik ono kashke; Chihowah sia hoke.

⁷ Chi̱ki nipi bano ya̱, keyukmʋt chishki nipi bano ya̱ chiki̱ wakʋmmo kashke; chishki yoka, nipi bano ya̱ ish i̱ wakʋmma he keyu hoke.

⁸ Chi̱ki tekchi nipi bano ya̱ ishi̱ wakʋmma he keyu hoke; chi̱ki nipi bano yoke.

⁹ Chin tek chi̱ki ya̱ ushetik, keyukmʋt chishki ya̱ ushetik, chuka ak inli ho̱ keyukmʋt yakni inla ai itola tok okma nana kia nipi bano ya̱ ish i̱ wakʋmma he keyu hoke.

¹⁰ Chiso ha̱ ushetik, keyukmʋt chiso tek a̱ ushetik nipi bano ya̱ ish i̱ wakʋmma he keyu hoke: yʋmmak osh chi nipi bano ash inli hoka.

¹¹ Chi̱ki tekchi ushetik, chi̱ki ʋt tobachi tuk (chin tek oka) nipi bano ya̱ ishi̱ wakʋmma he keyu hoke.

¹² Chi̱ki in tek nipi bano ya̱ ishi̱ wakʋmma he keyu hoke. Yʋmmʋt chi̱ki ya̱ i̱ kanohmi fehna ohoyo hoke.

¹³ Chishki itibapishi nipi bano ya̱ ishi̱ wakʋmma he keyu, chi̱shki ya̱ i̱ kanohmi fehna ohoyo hoka.

¹⁴ Chi̱ki itibapishi ha̱ nipi bano ya ishi̱ wakʋmma he keyutekchi ya̱ ish apota he keyu: chi̱ hukni yoka.

¹⁵ Chipok nipi bano ya̱ ishi̱ wakʋmma he keyu, chiso ha̱ tekchi yoke; nipi bano ya̱ ishi̱ wakʋmma he keyu hoke.

¹⁶ Chitibapishi tekchi nipi bano ya̱ ishi̱ wakʋmma he keyu, chitibapishi nipi bano yoke.

¹⁷ Ohoyo ha̱ micha ushetik a̱ nipi bano ya̱ ishi̱ wakʋmma he keyu; micha ushi ya̱ ushetik, keyukmʋt ushetik a̱ ushetik a̱ ishit nipi bano ya̱ ish i̱ wakʋmma he keyu, i̱ kanomi fehna ohoyo hoka: na haksi yoke.

¹⁸ Micha itibapishi hʋt okcha̱ya moma ka̱ ohoyo ishit itaienʋchit nipi bano ya̱ wakʋmmit chu̱kʋsh a̱ ish okpʋna he keyu hoke.

¹⁹ Micha ohoyo hʋt ik kashofo ho̱ naksika binilechi tuk a̱ nipi bano ya̱ i̱ wakʋmma chi̱ hosh bili̱ka ish ona he keyu hoke.

²⁰ Micha chin chuka a bili̱ka hatak tekchi ya̱ apotʋt isht ish ile litehla he keyu hoke.

²¹ Micha chim isht atiaka ya̱ luak hlopullichit Molek a̱ ish im onacha he keyu; micha chin Chitokaka hohchifo ha̱ chik ahobalecho kashke; Chihowah sia hoke.

²² Hatak bi̱ka ya̱ ohoyo chohmichit chik iba tʋshko kashke; nan isht yuwala yoke.

²³ Micha nan ʋlhpoa nana kia iba tʋshkit isht ish ile litehla he keyu; micha ohoyo kʋna kia nan ʋlhpoa ya̱ tʋshka chi̱ hosh itikba hikia he keyu hoke; itaiyokoma hoke.

²⁴ Nana ilʋppa puta nana kia isht hʋchik ile litehla kashke; ilʋppa puta kak o̱ oklushi puta hʋchi tikba akocha wehli li tuk ʋt isht ile litehli tuk oka.

²⁵ Mikma yakni ʋt liteha hoke; yʋmohmi kak o̱ nan ashʋchi tuk ak o̱ im a̱ya hi oke; mihma yakni oh kia okla ha̱ hoetʋt kohchi hoke.

²⁶ Yʋmohmi hoka, a̱ nanʋlhpisa puta, micha nan ʋlhpesa apihi̱sali puta ka̱ hʋsh yʋmihchi cha nan isht yuwala ilʋppa kanima kia hʋchik yʋmihcho kashke; hʋchim ai okla akinli, keyukmʋt okla inla yosh hʋchi takla ahanta kanima kia hʋchik yʋmihcho kashke.

²⁷ Nan isht yuwala ilʋppa moma kak o̱ yakni ya̱ hatak ʋhleha hʋchi tikba aiasha tuk ʋt yʋmihchi ho̱ yakni ʋt liteha tuk oke.

²⁸ Yʋmohmi ho̱ oklushi puta hʋchi tikba aiasha tuk a̱ hoetʋt kohchi tuk ʋt yakni ʋt hʋchishno ak kia hoetʋt ik hʋchi kohcho kashke.

²⁹ Nan isht yuwala ilʋppa puta kanima ka̱ kʋna hosh yʋmihchikmʋt yʋmma yʋmihchi tuk shilombish ʋt im okla im ai itin takla ya̱ akohchʋt fiopa tʋpa hi oke.

³⁰ Yʋmohmi hoka a̱ nanʋlhpisa ya̱ hʋsh holitobli hosh nan isht yuwala puta hʋchi tikba aiasha tuk ʋt yʋmihchi tok achʋfa nana kia hʋchik yʋmihcho kashke, micha yʋmmak o̱ isht hʋchik ile litehlo kashke: Chitokaka hʋchin Chihowah sia hoke, ish im achashke, im achi tok.