Lefitikʋs 17 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Alon, micha ushi ʋhleha, micha Islael im ʋlla ʋhleha moma aiena im anumpulit, Nana ilʋppak o̱ Chihowah yʋt anumpulit,

³ Hatak kʋna hosh Islael in chuka achʋfa ya̱ ai achʋfa yosh wak hobʋk, keyukmʋt chukfushi, keyukmʋt issikosoma ya̱ binah ha̱ ai ʋbi, keyukmʋt binah ha̱ kocha ai ʋbi.

⁴ Atuk osh okla moma im ʋlhtipo okhissa isht onʋt Chihowah im issa mak o̱ Chihowah im ʋlhtipo itikba ya̱ ont ik im ai issokmʋt hatak yʋmma issish ʋt onʋtola hi oke; issish hlatʋbli tuk oke, micha hatak yʋmmʋt im okla im ai itin takla ya̱ fiopa tʋpa hi oke.

⁵ Yʋmohmi ho̱ Islael im ʋlla ʋhleha hʋt ʋbit im issa ya̱ oktak ashahbi ai im issa Chihowah ya̱ isht im onʋt okla moma im ʋlhtipo okhissa ya̱ isht onʋt, naholitompa isht ʋtta ya̱ isht im ona cha itin nanaiyʋchi im issa mak o̱ Chihowah im issa hi oke.

⁶ Mikma na holitompa isht ʋtta yʋt issish a̱ Chihowah im alta okla moma im ʋlhtipo okhissa hikia ka̱ o̱ fimma hi oke, micha Chihowah i̱ balama achukma mak o̱ nia ya̱ hukma hi oke.

⁷ Micha himak pilla ma nan isht ahullo okpulo puta, yʋmmak o̱ haui tobʋt iakaiya tuk ʋt ʋbit im issa he keyu hoke: Ilʋppak osh im ai itishali hlopulli ka̱ i̱ nan ʋlhpisa bilia ya chi̱ hoke.

⁸ Mikma Islael in chuka achʋfa ya̱, keyukmʋt okla inla yosh hʋchi takla ahanta yosh hatak nana hosh hukmit im issa, keyukmʋt ʋbit im issa yo̱ im issa,

⁹ Micha Chihowah im issa chi̱ kʋt okla moma im ʋlhtipo okhissa ya̱ isht ik onokmʋt, hatak yʋmmʋt im okla im ai itin takla ya̱ fiopa tʋpa hi oke.

¹⁰ Micha hatak nana hosh Islael in chuka achʋfa ya̱ ai achʋfa hokma, keyukmʋt okla inla yosh hʋchim aitin takla ahanta hokma, nana hosh issish kaniohmi nana kia ʋpakma, issish ʋpa tuk hatak shilombish yʋmma sa nashuka ya̱ i̱sht a sanalichi la chi̱, micha im okla im ai itin takla ya̱ fiopa tʋbli la hi oke.

¹¹ Nipi aiokcha̱ya yʋt issish ak oka; atuk o̱ hʋchimi shilombish isht a kashofa chi̱ ho̱ alta onochit hʋch ima li tuk oke, issish ak okʋt hatak shilombish a̱ i̱ kashoffi hoka.

¹² Yʋmohmi hatuk o̱ Islael im ʋlla ʋhleha ha̱ Hatak hʋsh achʋfa kia, issish a̱ hʋshpa he keyu, micha okla inla yʋsh hʋchitin takla ahanta kʋt issish ʋpa he keyu, achi li tuk oke.

¹³ Micha hatak kʋna hosh Islael in chuka achʋfa ya̱ ai achʋfa yosh, keyukmut okla inla hʋchitin takla ahanta yosh owʋtta tuk osh nampoa, keyukmʋt ʋba hushi kia ʋpa hinla ʋlhpesa ka̱ ishikmʋt, issish a̱ aka hlatʋbli cha, lukfi pushi isht ompohoma hi oke.

¹⁴ Na nipi moma isht ai okcha̱ya yoka issish ak osh yʋmma isht ai okcha̱ya yoke: Yʋmohmi hatuk o̱ Islael im ʋlla ʋhleha ha̱, Nipi kaniohmi nana kia issish a̱ hʋshpa he keyushke, achi li tuk oke. Na nipi moma isht ai okcha̱ya yʋt issish ak oka, kʋna hosh ʋpakmʋt fiopa tʋpa hi oke.

¹⁵ Micha hatak nana hosh (hʋchi̱ yakni aiachʋfa yokmá, keyukmʋt okla inla yokma nana hosh) ilap akinli hosh illi, keyukmʋt nana hosh ʋbi tuk o̱ ʋpa tukmʋt i̱ nafohka ya̱ achifa mʋt, oka yupi cha ik kashofo̱ ho̱ ont opia hi oke: yohmi hosh kashofa hi oke.

¹⁶ Amba ik achifo, micha ik yupokmʋt nanashʋchi ʋt onʋtoyula hi oke, ish im achashke, achi tok.