Lefitikʋs 16 - Chahta Holisso Holitopa 1886

¹ Micha Alon ushi tuklo hosh Chihowah itikba nan im issa cha illi, illi ha ya̱, Chihowah yʋt Moses a̱ im anumpuli tok.

² Micha Chihowah yʋt Moses a̱, Chitibapishi Alon a̱ ish im anumpulashke. Yʋmohmi ho̱ aholitopa natakali anu̱kaka aiombinilit i̱ nukha̱klo itikba, yʋmmʋt itombi holitopa ontalaia ka̱ nitak moma ik ono kashke. Yʋmohmi hosh ik illo kashke; hoshonti anu̱kaka yo̱ ai ombinilit i̱ nukha̱klo paknaka ahaiaka la chi̱ hoke.

³ Yakohmi hosh Alon ʋt aholitopa ka ya̱ ona hi oke; nan ashʋchi im issa mak o̱, wak hobʋk himita, micha hukmit im issa mak o̱, chukfi nakni iesha hi oke.

⁴ Linen nafohka holitopa foyuka cha, obalafoka linen ʋt nipi alataiya hi oke, micha linen ʋskofʋchi ya̱ ʋskofʋchikmʋt, linen iahlipa ha̱ ishit shema hi oke; ilʋppa puta kʋt nafohka holitopa hoke. Yʋmohmi hoka nipi ya̱ oka isht achifa cha ishit fohka hi oke.

⁵ Micha nan ashʋchi im issa mak o̱ issikosoma ya̱ issikosomushi tuklo ho̱ aiishi, micha hukmit im issa mak o̱, chukfi nakni achʋfa ho̱ Islael im ʋlla ʋhleha okla moma ka̱ im esha hi oke.

⁶ Mikmʋt nanashʋchi im issa mak o̱ Alon ʋt i̱ wak hobʋk o̱ yʋmmʋt ilap akinli mak o̱ im issa cha, ilap, micha in chuka achʋfa ya̱ i̱ kashoffa hi oke.

⁷ Micha issikosoma tuklo kash eshi cha, Chihowah itikba isht onʋt okla moma im ʋlhtipo okhissa ya̱ isht ona hi oke.

⁸ Micha Alon ʋt issikosoma tuklo ho̱ nashoeli onocha hi oke; nashoeli achʋfa kʋt Chihowah ak o̱ immi hokma, nashoeli achʋfa kʋt issikosoma okcha̱ya immi ha hi oke.

⁹ Micha Alon ʋt issikosoma Chihowah i̱ nashoeli ʋt onʋtola kash isht onʋt nanashʋchi im issa mak o̱ im issa hi oke.

¹⁰ Amba issikosoma okcha̱ya ya chi̱ mak o̱ nashoeli ʋt onʋtola tuk a̱ isht i̱ kashofa chi̱ hosh, micha issikosoma okcha̱ya chi̱ mak o̱ yakni haiaka chʋfficha chi̱ kash okcha̱ya ho̱ Chihowah itikba isht ona hi oke.

¹¹ Micha Alon ʋt nanashʋchi im issa wak hobak ash yʋmmʋt ilap atuk mak o̱ isht ona cha, ilap micha in chuka achʋfa ya̱ i̱ kashoffa hi oke, micha ilap akinli nanashʋchi im issa mak o̱ wak hobak ash ʋba hi oke.

¹² Micha alta yʋt Chihowah itikba hikia ka̱ tobaksi ai eshi chá, nabalama aiʋlhto ya̱ alotoli cha, boʋt lapushki yo̱ nabalama ya̱ ibbak alotoli cha, natakali anu̱ka ya̱ isht onashke.

¹³ Micha na balama ya̱ Chihowah itikba luak ai onocha hi oke; yʋmohmi ho̱ shobulli hoshonti kʋt ai ombinilit i̱ nukha̱klo yʋmmʋt isht atokowa ontalaia ka̱ ompoholma hi oke; yomohmi ho̱ ik illo ka hi oke.

¹⁴ Micha wak hobʋk ash im issish a̱ ai ombinilit i̱ nukha̱klo hʋshi akochaka pilla ka̱ ibbak ushi isht o̱ fimma hi oke; micha ai ombinilit i̱ nukha̱klo itikba ya̱ issish ash untuklo ha ibbak ushi isht fimma hi oke.

¹⁵ Yohmikmʋt nanashʋchi im issa issikosoma yʋmmʋt okla hatuk mak o̱ ʋbi cha, im issish a̱ natakali anu̱kaka isht onashke; micha issish yʋmmakma wak hobʋk im issish ishit yʋmihchi tuk ʋt chohmicha hi oke, micha ai ombinilit i̱ nukha̱klo paknaka o̱ fimmit micha ai ombinilit i̱ nukha̱klo itikba fimma hi oke.

¹⁶ Micha Islael im ʋlla ʋhleha hʋt ik kashofo kak o̱ micha nanashʋchi moma ka̱ yʋmihchi tuk ak o̱ aholitopa ya̱ i̱ kashoffa hi oke; micha ik a kashofo im itin takla ya̱ okla moma im ʋlhtipo yʋt hikia tuk a̱ yʋmihcha hi oke.

¹⁷ Micha okla moma im ʋlhtipo aholitopa ya̱ kashofa chi̱ hosh chukowakmʋt, ilap micha in chuka achʋfa, micha Islael okla moma aiena ka̱ kashoffi cha, ik kohcho ki̱sha ka̱, hatak nana kia iksho ka hi oke.

¹⁸ Micha kohchʋt Chihowah itikba alta hikia ka̱ ona cha, yʋmma kashoffa hi oke; micha wak hobʋk issish micha issikosoma issish a̱ ishi cha, alta lapish a̱ lapalichit fullolecha hi oke.

¹⁹ Micha issish a̱ untuklo ha ibbak ushi isht o̱ fimmi cha, Islael im ʋlla ʋhleha ik a kashofo yatuk a̱ kashoffit hullocha hi oke.

²⁰ Atuk osh aholitopa, micha okla moma im ʋlhtipo, micha alta aiena ka̱ kashoffit tahlikmʋt issikosoma okcha̱ya yash isht ona hi oke.

²¹ Micha Alon ʋt ibbak a̱ ita tuklonchit issikosoma okcha̱ya noshkobo ha̱ isht umbitepa cha, Islael im ʋlla ʋhleha ik aiʋlhpieso, micha nanashʋchi moma aiyoshoba chatuk moma ka̱ anolit issikosoma noshkobo onochi cha, hatak ai ʋlhpesa ho̱ ibbak fohkit yakni haiaka pit pila hi oke.

²² Mikma issikosoma yʋt ai ʋlhpesa keyu moma shaiyalit yakni okla a binili keyu isht ona hi oke; mikma issikosoma ya̱ yakni haiaka ya̱ ont chʋfficha hi oke.

²³ Mikma Alon ʋt okla moma im ʋlhtipo ya̱ ont chukowa cha, aholitopa chukowa chi̱kmʋt linen nafohka ishit fohka tuk ʋt shu̱fi cha yʋmmak inli ho̱ bohla hi oke.

²⁴ Micha nipi ya̱ aholitopa ya̱ oka isht ai achifa mʋt, i̱ nafohka ishit fohka cha, ilap hukmit im issa, micha okla hukmit im issa aiena ka̱ im issa cha, ilap, micha okla aiena ka̱ i̱ kashoffa hi oke.

²⁵ Micha nan ashʋchi im issa nia ya̱ alta onochit a hukma hi oke.

²⁶ Mikma issikosoma okchaya mak o̱ issikosoma chuffichi tuk ʋt i̱ nafohka ya̱ achifa cha oka yupi ha yosh binah ha̱ ont chukowa hi oke.

²⁷ Micha nanashʋchi im issa mak o̱ wak hobʋk micha nanashʋchi im issa mak o̱ issikosoma, yʋmma im issish o̱ aholitopa ya̱ kashoffa chi̱ hosh isht chukowa kash, achʋfʋt binah ha̱ kohcha isht ona hi oke; micha hakshup, micha nipi, micha i̱ yʋlhki aiena ka̱ luak itʋchit hukma hi oke.

²⁸ Micha hukmi tuk ʋt i̱ nafohka ya̱ achefakmʋt oka yupi ha yosh binah ha̱ ont chukowa hi oke.

²⁹ Micha ilʋppak osh hʋchi̱ nan ʋlhpisa bilia ya chi̱ hoke. Hʋshi isht untuklo, hʋshi talali tuk nitak ont ishit pokolikma, hʋchi̱ yakni ai achʋfa hokma, keyukmʋt okla inla yosh hʋchi takla anta tuk okma, nana kia aienʋt hʋchi shilombish a̱ hʋsh ilbʋshali cha natoksʋli nana kia hʋsh yʋmihcha he keyu hoke.

³⁰ Nitak yʋmmak o̱ naholitompa isht ʋtta yʋt Chihowah itikba ya̱ na hʋsh aiashʋchi moma a hʋchi̱ kasoffi na hʋchi kashofa chi̱ ho̱ hʋchi̱ kashoffa hi oke.

³¹ Nitak hollo afoha hʋchi̱ nitak a hi oke: mikma nan ʋlhpisa bilia ya̱ hʋchi shilombish a̱ hʋsh ilbʋshala hi oke.

³² Micha naholitompa isht ʋtta yʋt naholitompa isht ai ʋtta ya̱ i̱ki ya̱ ʋlhtobʋt isht ʋtta chi̱ ho̱ nana ahʋmmi tuk, micha hullochi mihi yosh i̱ kashoffa hi oke, micha linen nafohka, nafohka holitopa fehna ka̱ foyuhka hi oke.

³³ Micha aboha holitopa ya̱ i̱ kashoffa hi oke, micha okla moma im ʋlhtipo, micha alta aiena ka̱ i̱ kashoffa hi oke; micha naholitompa isht asha ya̱, micha okla moma ka i̱ kashoffa hi oke.

³⁴ Micha ilʋppak osh afʋmmikma himmona ha̱ Islael im ʋlla ʋhleha nanashʋchi moma ka̱ i̱ kashofa he ʋt hʋchi̱ nan ʋlhpisa bilia ya chi̱ hoke, ish im achashke, achi tok. Mihma Chihowah yʋt Moses a̱ ai i̱ miha tuk mak o̱ yʋmihchi tok.