Lefitikʋs 14 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Ilʋppak osh leplosi ʋbi ʋt kashofa he nitak a̱ nan ʋlhpisa hoke; naholitompa isht ʋtta ya̱ isht im ona hi oke.

³ Mikma naholitompa isht ʋtta yʋt binah ha̱ kohchʋt ia hi oke; micha naholitompa isht ʋtta yʋt pisa hi oke; mikma yakeh! lepa hatak leplosi ʋbi ʋt ililli leplosi onʋtonla tuk ʋt hlakofikma,

⁴ Yohmikma kashofa chi̱ kash hushi kashofa okcha̱ya tuklo ho̱, micha chuahla iti, micha tishepa, micha hissop aiena ho̱ im esha hi ya̱ naholitompa isht ʋtta yʋt miha hi oke.

⁵ Micha hushi yash achʋfa hosh lukfi tʋnna nan aiʋlhto fohka hosh oka kapʋssa paknaka ai illa hi ya̱, mihashke.

⁶ Hushi okcha̱ya yano, yʋmma, micha chuahla iti micha tishepa micha hissop aiena kash eshi cha yʋmma micha hushi okcha̱ya yash, oka kapʋssa paknaka ai illi tuk ash issish a̱ akʋcha hi oke.

⁷ Micha kashofa chi̱ kash untuklo ha o̱ fimma hi oke, micha kashofa, achi cha hushi okcha̱ya oktak ashahbi ho̱ hikacha hi oke.

⁸ Micha kashofa chi̱ kʋt i̱ nafohka ya̱ achifa cha pa̱shi moma ka̱ sha̱fikmʋt oka ya̱ ilachefa cha kashofa hi oke; atuk osh yohmi ha yosh binah ha̱ onashke; micha nitak untuklo ho̱ binah ha̱ kocha ya̱ ahantashke.

⁹ Yohmi kia nitak ont isht untuklokma noshkobo pa̱shi ya̱ mominchit micha nutakhish, micha im osana aiena mominchit sha̱fashke; peh i̱ pa̱shi mominchit sha̱fashke; micha i̱ nafohka ya̱ achifashke; micha nipi ya̱ oka isht achifa cha kashofa hi oke.

¹⁰ Micha nitak isht untuchinakma chukfushi nakni tuklo aiokpulo kʋt iksho, micha chukfushi tek afʋmmi ʋmmona achʋfa hosh aiokpuloka iksho, micha hukmit im issa mak o̱ bota tohbi lipehbi ʋlhpisa ishit pokoli tuchina hosh bila aiyoma ho̱ micha bila ampushi achʋfa aiena ho̱ isha hi oke.

¹¹ Mikma kashoffa chin tuk naholitompa isht ʋtta yʋt hatak kashofa chi̱ kash, micha nana yʋmma puta kash Chihowah itikba okla moma im ʋlhtipo okhissa ya̱ isht onashke.

¹² Micha na holitompa isht ʋtta yʋt chukfushi nakni achʋfa ka̱ ishi cha na yoshobat im issa ya̱ im issa chi̱, micha bila ampushi achʋfa ka̱ eshi cha fahfulit im issa mak o̱ Chihowah itikba ya̱ fahfulashke.

¹³ Micha chukfushi yash nan ashʋchi im issa micha hukmit im issa aiʋba he aholitopa ak o̱ ai ʋba hi oke; nan ashʋchi im issa yʋt naholitompa isht ʋtta immi hatuk a̱ yʋmmak inli chohmit nayoshobat im issa yak kia immi hoke; holitopa i̱ shahli hoke.

¹⁴ Micha naholitompa isht ʋtta yʋt ʋbanʋblit im issa issish a̱ eshi cha naholitompa isht ʋtta yʋt kashofa chi̱ kash haksobish isht impakimma wishakchi, micha ibbak isht impakimma ibbak ishki, micha iyi isht impakimma iyishki aiena ka̱ lapalicha hi oke.

¹⁵ Micha naholitompa isht ʋtta yʋt bila ampushi achʋfa kash kanohmi ka̱ eshi cha tosholit ilap ibbak ʋlhfʋbekimma ibbak pʋta ya̱ ona hi oke.

¹⁶ Micha naholitompa isht ʋtta yʋt ibbak ushi isht impakimma ya̱ bila yʋt ibbak ʋlhfʋbekimma a̱lhto kash okʋchi cha bila yash Chihowah itikba ya̱ untuklo ha ibbak ushi ishit fimma hi oke.

¹⁷ Micha bila yʋt ibbak a̱lhto moma tuk a̱ naholitompa isht ʋtta yʋt kashofa chi̱ kash isht impakimma haksobish wishakchi, micha ibbak isht impakimma ibbak ishki, micha iyi isht impakimma iyishki aiena ka̱ yoshobʋt im issa issish alapanli ka̱ onocha hi oke.

¹⁸ Micha bila yash atampa kʋt naholitompa isht ʋtta ibbak a̱lhto ka̱ kashofa chi̱ kash noshkobo ha̱ on hlatʋbla hi oke, micha naholitompa isht ʋtta yʋt Chihowah itikba im a kashoffa hi oke.

¹⁹ Micha naholitompa isht ʋtta yʋt nan ashʋchi im issa im issa cha ik kashofo tuk ʋt kashofa chin tuk ash i̱ kashofa hi oke, micha i̱ himmak o̱ hukmit im issa ya̱ ʋba hi oke.

²⁰ Micha naholitompa isht ʋtta yʋt hukmit im issa micha ilhpak im issa ya̱ alta ya̱ onochit im issa hi oke, micha naholitompa isht ʋtta yʋt i̱ kashoffikma i̱ kashofa hi oke.

²¹ Mikma hatak ilbʋsha yatuk osh yohmi ka̱ ahayucha he keyukmʋt ʋbanʋblit im issa mak o̱ chukfushi achʋfa, micha ilhpak im issa mak o̱ bota tohbi lipehbi kushkoa ishit pokoli achʋfa bila aiyoma, micha bila ampushi achʋfa aiena fahfula chi̱, micha isht im atobba chi̱ ka̱ isha hi oke.

²² Micha pʋchi yoshoba tuklo, keyukmʋt pʋchushi tuklo ahayucha hinla kʋt achʋfa kʋt; nanashʋchi im issa, micha achʋfa kʋt hukmit im issa ya̱ chi̱ aiena hi oke.

²³ Micha nitak isht untuchinakma i̱ kashofa chi̱ hosh Chihowah itikba okla moma im ʋlhtipo okhissa ya̱ isht onʋt naholitompa isht ʋtta ya̱ isht im ona hi oke.

²⁴ Mikma naholitompa isht ʋtta yʋt chukfushi ʋbanʋblit im issa yash, micha bila ampushi achʋfa kash eshi cha Chihowah itikba fahfulit im issa mak o̱ fahfula hi oke.

²⁵ Micha ʋbanʋblit im issa chukfushi yash ʋbi cha naholitompa isht ʋtta yʋt ʋbanʋblit im issa yash issish kaniohmi ka̱ eshi cha kashofa chi̱ kash haksobish isht impakimma wishakchi, micha ibbak isht impakimma ibbak ishki, micha iyi isht impakimma iyishki aiena ka̱ lapalechashke.

²⁶ Micha bila yash kaniohmi ka̱ naholitompa isht ʋtta yʋt tosholit ilap ʋlhfʋbekimma ibbak pʋta ya̱ ona hi oke.

²⁷ Micha naholitompa isht ʋtta yʋt ibbak ʋlhfʋbekimma bila a̱lhto kash kaniohmi ka̱ ibbak ushi isht impakimma ya̱ untuklo ha Chihowah itikba isht fimma hi oke.

²⁸ Mikmʋt naholitompa isht ʋtta yʋt bila ibbak a̱lhto tuk ʋt kaniohmi ka̱ kashofa chin tuk ash haksobish isht impakimma wishakchi, micha ibbak isht impakimma ibbakushi, micha iyi isht impakimma iyishki aiena, ʋbanʋblit im issa issish alapanli ka̱ lapalecha hi oke.

²⁹ Micha bila yʋt ibbak a̱ a̱lhto moma tuk a̱ Chihowah itikba im a kashoffa chi̱ hosh i̱ kashofa chi̱ kash nashkobo ha̱ on hlatʋbla hi oke.

³⁰ Micha pʋchi yoshoba yash, keyukmʋt pʋchushi yash ahayucha hinla kʋt achʋfa ka̱ im issa hi oke.

³¹ Ahayucha hinla tuk ash o̱ achʋfa ka̱ nanashʋchi im issa mak o̱ micha achʋfa ka̱ hukmit im issa mak o̱ ilhpak im issa aieninchit im issa hi oke. Micha naholitompa isht ʋtta yʋt i̱ kashoffa chin tuk a̱ Chihowah itikba ya̱ i̱ kashoffa hi oke.

³² Ilʋppak osh ililli leplosi onʋtonla isht kashofa he ya̱ ibbak ʋt ahayucha he keyu ya̱ i̱ nan ʋlhpisa hoke, im achi tok.

³³ Mihma Chihowah yʋt Moses micha Alon a̱ im anumpulit,

³⁴ Kenan ʋt hʋchi̱ yakni ya chi̱ ho̱ hʋchima li ka̱ hʋsh onakma, atuk o̱ hʋchi̱ yakni ya̱ chuka yo̱ ililli leplosi ya̱ onochi likma,

³⁵ Chuka yash immi hʋt naholitopa isht ʋtta ya̱ ont im anolit, chuka ya̱ ililli hʋt onʋtonla, ʋm ahobʋshke, achikma,

³⁶ Yohmikma naholitompa isht ʋtta yʋt ililli pisa chi̱ kʋt aboha ya̱ ik chukowo ki̱sha, anu̱kaka a̱sha moma ka̱ toshoht tahla chi̱ ka̱ i̱ miha hi oke; yʋmohmi ho̱ aboha a̱sha tuk moma kʋt ik kashofo ik tobo kashke; atuk o̱ i̱ himmak a ya̱ naholitompa isht ʋtta yʋt aboha ya̱ pisa chi̱ hosh chukowa hi oke.

³⁷ Micha ililli ha̱ pisa hi oke; mikma yakeh! ililli hʋt aboha itabana ya̱ kolukbit okchamali chohmit, keyukmʋt hamma chohmit bʋskʋchi hosh pisa ka̱ kolukbi kʋt itabana ya̱ i̱ shahlikma,

³⁸ Yohmikma naholitopa isht ʋtta yʋt aboha ya̱ kohchʋt aboha okhissa ya̱ ona cha nitak untuklo ho̱ okhishtʋt hilecha hi oke.

³⁹ Atuk osh nitak isht untuklokma naholitompa isht ʋtta yʋt ʋla cha, anonti pisa hi oke; mikma yakeh! ililli hʋt aboha itabana ya̱ chitot isht iakma,

⁴⁰ Yohmikma naholitompa isht ʋtta yʋt ililli onʋtonla tʋli yash ishit kancha hi a̱ i̱ miha hi oke, mikma tʋmaha holihta kohcha ik a kashofo yo̱ ont kancha hi oke.

⁴¹ Micha aboha anu̱kaka fullota ka̱ sha̱fichi cha na pushi sha̱fa kash tʋmaha holihta kohcha ik a kashofo yo̱ ont hlatʋbla hi oke.

⁴² Micha tʋli inla eshi cha, tʋli yʋmmak ash atobbichit bohla hi oke; micha yʋmmʋska inla yo̱ eshi cha aboha ya̱ isht apolusla hi oke.

⁴³ Atuk o̱ ililli hʋt anonti ʋla cha, tʋli ya̱ ishit kanchi ha ya̱, micha aboha ya̱ sha̱fi ha ya̱ micha aboha yʋt ʋlhpolosa ha ya̱ aboha ya̱ kohchakma,

⁴⁴ Yohmikma naholitompa isht ʋtta yʋt ona cha, pisa hi oke; mikma yakeh! ililli hʋt aboha ya̱ chitot isht iakmʋt, leplosi chilita yosh aboha ya̱ onʋtola, ik kashofo hoke.

⁴⁵ Micha aboha yash tʋli, micha iti, micha aboha in lukfi yʋmmʋska moma aiena ka̱ tiʋbla hi oke, micha tʋmaha holihta ya̱ kohcha ik akashofo yo̱ isht ona hi oke.

⁴⁶ Mikma kʋna hosh okhishtʋt hikia moma ho̱ chukowa tuk mʋt ik kashofo ho̱ ont opia hi oke.

⁴⁷ Mikma kʋna hosh aboha yash itola tukmʋt i̱ nafohka ya̱ achifa hi oke; mikma kʋna hosh aboha yash ai impa tukmʋt i̱ nafohka ya̱ achifa hi oke.

⁴⁸ Mikma naholitopa isht ʋtta yʋt ont chukowa cha pisa ma, yakeh! aboha yʋt ʋlhpolusa ha ya̱ illilli hʋt chitot isht ik aiyokma, naholitompa isht ʋtta yʋt aboha yʋt kashofah, achashke, ililli hʋt hlakofi hoka.

⁴⁹ Micha aboha ya̱ kashofa chi̱ kʋt hushi tuklo, micha chuahla iti, micha tishepa, micha hissop aiena ho̱ isha hi oke.

⁵⁰ Micha hushi yash achʋfa ka̱ lukfi tʋnna fohkit oka kapʋssa paknaka yo̱ ʋba hi oke.

⁵¹ Mikmʋt chuahla iti, micha hissop, micha tishepa micha hushi okcha̱ya yash aiena ka̱ eshi cha hushi illi yash issish, micha oka kapʋssa yash okʋchi cha untuklo ha̱ aboha ya̱ o̱ fimma hi oke.

⁵² Micha aboha ya̱ hushi issish, micha oka kapʋssa, micha hushi okcha̱ya, micha chuahla iti, micha hissop, micha tishepa aiena ho̱ ishit kashoffa hi oke.

⁵³ Amba hushi okcha̱ya ʋno tʋmaha holihta kohcha oktak a shahbi yo̱ isht onʋt hikachi cha aboha ya̱ i̱ kashoffa hi oke, mikma kashofa hi oke.

⁵⁴ Ilʋppak osh ililli ilaiyukali leplosi, micha hlachowa a puta.

⁵⁵ Micha nafohka, micha aboha in leplosi,

⁵⁶ Micha shatali, micha hlachowa, micha shohkaualit talaia aiena kʋt i̱ nanʋlhpisa hoke.

⁵⁷ Ik kashofokma, micha kashofakma im ʋlbʋchi yoke. Ilʋppak osh leplosi nan ʋlhpisa hoke, im achi tok.