Lefitikʋs 13 - Chahta Holisso Holitopa 1886

¹ Micha Chihowah yʋt Moses micha Alon a̱ im anumpulit,

² Hatak nipi hakshup a̱ shatali, hlachowa, keyukmʋt tohbi hosh talaia, micha nipi hakshup a lapali kʋt ililli leplosi ʋbi chohmikma, naholitompa isht ʋtta Alon, keyukmʋt ushi ʋhleha naholitompa isht a̱sha achʋfa isht im ona hi oke.

³ Mikma naholitompa isht ʋtta yʋt nipi hakshup ililli onʋtonla ka̱ pisashke; atuk o̱ ililli a lapali ka̱ hishi tohbit isht ia, micha ililli pisa ka̱ kolukbi kʋt nipi hakshup inla ka̱ i̱ shahlikmʋt ililli leplosi yoke: mikma naholitompa isht ʋtta yʋt pesa cha ik kashofo, achashke.

⁴ Nipi hakshup tohbi chohmi tuk ʋt tohbikma, micha kolukbi kʋt hakshup a̱ i̱ shahli keyu, micha hishi ʋt tohbi keyu, yohmikma ililli i̱shi tuk ash naholitompa isht ʋtta yʋt nitak untuklo ho̱ aboha fohkit im okhishta hi oke.

⁵ Atukmʋt nitak isht untuklokma naholitompa isht ʋtta yʋt pisa hi oke: atuk o̱ yakeh! ililli ʋt pisa ka̱ ont talaia cha ililli ʋt hakshup a̱ chitot isht ik aiyokma, naholitompa isht ʋtta yʋt himakma nitak untuklo ho̱ aboha fohkit im okhishta hi oke.

⁶ Atuk mʋt naholitompa isht ʋtta yʋt nitak ont isht untuklokma anonti pisa hi oke: atuk o̱ yakeh! ililli hʋt lusbi choyuhmi cha ililli hʋt hakshup a chitot isht ik aiyokma, naholitompa isht ʋtta yʋt kashofah, acha hi oke: peh hlachowa yoke; mikma i̱ nafohka ya̱ achifa cha kashofa hi oke.

⁷ Amba kashofa chi̱ ho̱ naholitompa isht ʋtta yʋt pisa ha ya̱ hlachowa yʋt hakshup a̱ chito fehnʋt isht iakma, naholitompa isht ʋtta yʋt anonti pisa hi oke.

⁸ Atuk osh naholitompa isht ʋtta yʋt pisakma yakeh! ililli hʋt hakshup a̱ chitot isht ia ho̱ pisakmʋt naholitompa isht ʋtta yʋt ik kashofo, acha hi oke, leplosi yoke.

⁹ Ililli leplosi ʋt hatak a̱ onʋtoyulakma naholitompa isht ʋtta ya̱ isht im ona hi oke.

¹⁰ Mikma naholitompa isht ʋtta yʋt pisa hi oke, micha yakeh! shatali yʋt hakshup a̱ tohbi, micha hishi a̱ tohbichi, micha shatali yʋt okchushbʋt homma ho̱ pisakmʋt,

¹¹ Leplosi sipokni yosh nipi hakshup a̱ onʋtoyula hoke; mihma naholitompa isht ʋtta yʋt ik kashofo, acha hi oke; micha ik im okhishto kashke, ik kashofo hoka.

¹² Micha leplosi yʋt kohchʋt nipi ya̱ onʋtoyulʋt maha̱yakma, micha ililli onʋtola tuk ash nipi moma ka̱ ompoholmot noshkobo ʋttʋt ia hosh iyi ya̱ ont ʋhlichikma, naholitompa isht ʋtta yʋt kanima yo̱ a pesakmʋt,

¹³ Yohmikmʋt naholitompa isht ʋtta yʋt anukfillashke; atuk o̱ yakeh! leplosi yʋt nipi ya̱ mominchikma ililli onʋtola tuk ash kashofa, achashke, momʋt tohbit taha hoke; kashofa hoke.

¹⁴ Yohmi kia nipi okcha̱ki yʋt haiakakma ik kashofo ka hi oke.

¹⁵ Mikma naholitompa isht ʋtta yʋt nipi okcha̱ki a̱ pisa cha, ik kashofo, acha hi oke, nipi okcha̱ki yʋt ik kashofo yoka; leplosi yoke.

¹⁶ Keyukmʋt nipi okcha̱ki yʋt anonti inlʋt isht ia cha tohbi tobakma, naholitompa isht ʋtta ya̱ im ona hi oke.

¹⁷ Mikma naholitompa isht ʋtta yʋt pisa hi oke; mikma yakeh! ililli yʋt tohbit tahakma naholitompa isht ʋtta yʋt ililli onʋtola kash kashofa, acha hi oke: kashofa hoke.

¹⁸ Micha nipi yʋmma hakshup a̱ hichi ʋt talaia tuk osh ʋtta hoke.

¹⁹ Micha hichi atalaia tohbi shatali, keyukmʋt tohbi iskitinesi hosh talaia, tohbi micha homma chohmi hosh talaia tuk o̱ naholitompa isht ʋtta ya̱ pisachi;

²⁰ Atuk o̱ naholitompa isht ʋtta yʋt pisakma, Yakeh! Kolukbi kʋt hakshup a̱ i̱shahli, micha hishi ʋt tohbit tahakma, naholitompa isht ʋtta yʋt ik kashofo, achashke; ililli leplosi yosh hichi ya̱ a kʋhla hoke.

²¹ Amba naholitompa isht ʋtta yʋt pisakma, yakeh! hishi tohbi kʋt iksho, micha kolukbi kʋt nipi hakshup inla ya̱ ik i̱ shahlokma, amba lusbi choyuhmi; yohmikma naholitompa isht ʋtta yʋt aboha fohkit im okhi̱shta na, nitak untukla hi oke.

²² Amba nipi hakshup a̱ chitot isht i̱ shahlit maha̱yakma, naholitompa isht ʋtta yʋt ik kashofo, acha hi oke, ililli hoke.

²³ Amba tohbi talaia tuk ʋt atalaia tuk a̱ talaia cha chitot isht ik aiyokma, hichi lua yoke; mikma naholitompa isht ʋtta yʋt kashofa, acha hi oke.

²⁴ Keyukmʋt hakshup a̱ lʋshpʋt hukmi fehna, nipi okchushba homma lua ya̱ tohbi iskitini homma chohmi, keyukmʋt tohbi hosh talaiakma;

²⁵ Yohmikma naholitompa isht ʋtta yʋt pisa hi oke; mikma yakeh! tohbi iskitini talaia ho̱ hishi ʋt tohbit isht ia, micha pisa ka̱ kolukbi kʋt nipi a̱ i̱ shahlikma, leplosi yosh lua ka̱ atobʋt kohcha hoke, yʋmohmi hoka naholitompa isht ʋtta yʋt ik kashofo, acha hi oke, ililli leplosi yoke.

²⁶ Amba naholitompa isht ʋtta yʋt pisa ma, yakeh! tohbi iskitini ka̱ hishi tohbi kʋt iksho, micha kolukbi kʋt nipi inla ya̱ ik i̱ shahlokma, amba lusa chohmi; yohmikma naholitompa isht ʋtta yʋt nitak untuklo ho̱ aboha fohkit im okhishtashke.

²⁷ Atuk osh nitak ont isht untuklokma naholitompa isht ʋtta yʋt pisa hi oke; yohmikma nipi ya̱ chitot isht i̱ shahlit isht iakma naholitompa isht ʋtta yʋt ik kashofo, acha hi oke; ililli leplosi yoke.

²⁸ Micha tohbi iskitini talaia kʋt mihinli talaia cha, nipi ya̱ chitot isht ik aiyo, amba lusa chohmikma lua shatali yoke; na holitompa isht ʋtta yʋt kashofa, acha hi oke; luʋt homma yoke.

²⁹ Hatak osh keyukmʋt ohoyo hosh ililli hʋt noshkobo keyukmʋt nutakhish a̱ onʋtolakma,

³⁰ Yohmikma naholitompa isht ʋtta yʋt ililli ha̱ pisa hi oke; mikma yakeh! pisa ka̱ kolukbi kʋt nipi ya̱ i̱ shahlikma, micha hishi lakna tapʋski chohmi hosh a̱sha, yohmikma naholitompa isht ʋtta yʋt ik kashofo, acha hi oke; hlachowa shila, leplosi fehna hosh noshkobo, keyukmʋt nutakhish onʋtoyula hoke.

³¹ Micha naholitompa isht ʋtta yʋt ililli hlachowa ya̱ pisa ma, yakeh! pisa ka̱ kolukbi kʋt nipi ya̱ ik i̱ shahlo, micha hishi lusa yʋt iksho, yohmikma naholitompa isht ʋtta yʋt ililli hlachowa onʋtonla tuk a̱ nitak untuklo ho̱ aboha fohkit im okhishta hi oke.

³² Atuk osh nitak ont isht untuklokma naholitompa isht ʋtta yʋt ililli yash pisa hi oke; mikma yakeh! ililli hlachowa yʋt chitot isht ik aiyo, micha hishi lakna kʋt iksho, micha pisa ka̱ hlachowa hʋt kolukbi kʋt hakshup a̱ ik i̱ shahlokma,

³³ I̱ sha̱fa hi oke; yohmi kia hlachowa yano sha̱fa he keyu hoke; mikma naholitompa isht ʋtta yʋt hlachowa ya̱ himakma nitak untuklo ho̱ aboha fohkit im okhishta hi oke.

³⁴ Atuk osh nitak ont isht untuklokma naholitompa isht ʋtta yʋt hlachowa yash pisa hi oke; mikma yakeh! hlachowa yʋt nipi ya̱ chitot isht ik aiyo, micha pisa ka̱ kolukbi kʋt ik i̱ shahlo, yohmikma naholitompa isht ʋtta yʋt kashofa, acha hi oke; mikma i̱ nafohka ya̱ achifa cha kashofa hi oke.

³⁵ Amba kashofa ha ya̱ hlachowa yʋt nipi ya̱ chito fehnʋt isht ia,

³⁶ Yohmikma naholitompa isht ʋtta yʋt pisashke; mikma yakeh! hlachowa yʋt nipi ya̱ chitot isht iakma, naholitompa isht ʋtta yʋt hishi lakna hoya he keyu, ik kashofo hoke.

³⁷ Amba hlachowa yash osh pisa ka̱ mih achʋfa talaia, mikma hishi lusa yʋt yʋmma ai offokma, hlachowa yʋt hlakofi, kashofa hoke, mikma naholitompa isht ʋtta yʋt kashofa, acha hi oke.

³⁸ Micha hatak osh keyukmʋt ohoyo hosh nipi hakshup a̱ tohbi taloha, tohbi shohkauwanli taloha,

³⁹ Yohmikma naholitompa isht ʋtta yʋt pisa hi oke; mikma yakeh! nipi a̱ tohbi taloha kʋt lusa chohmikmʋt, chikchiki talaia yosh nipi ya̱ toba hoke; kashofa hoke.

⁴⁰ Micha hatak osh pa̱shi yʋt noshkobo ha̱ achilofa cha yushmilali, yohmi kia kashofa hoke.

⁴¹ Micha kʋna hosh noshkobo ha̱ nashuka pilla hosh pa̱shi yʋt i̱ chilofakmʋt ibitakla yushmilali hoke, yohmi kia kashofa hoke.

⁴² Micha noshkobo yushmilali, keyukmʋt ibitakla yushmilali ya̱ hlachowa tohbi homma chohmit talaiakmʋt; noshkobo yushmilali keyukmʋt ibitakla yushmilali ya̱ leplosi tobʋt kohcha hoke.

⁴³ Yohmikma naholitompa isht ʋtta yʋt pisa hi oke; mikma yakeh! noshkobo yushmilali ya̱ keyukmʋt ibitakla yushmilali hlachowa shatali kʋt tohbi homma chohmi leplosi yʋt nipi ya̱ a haiaka chatuk a̱ chohmikmʋt,

⁴⁴ Hatak leplosi onʋtonla, ik kashofo hoke; naholitompa isht ʋtta yʋt ik kashofo kʋmohmi, acha hi oke; ililli hʋt noshkobo hak o̱ onʋtola hoke.

⁴⁵ Mikma ililli onʋtonla tuk leplosi ʋbi yash osh i̱ nafohka yʋt hlilafa cha noshkobo bieka hi oke, micha itiʋlbi ʋba ya̱ ompohomo cha pa̱yʋt, Ik kashofo, Ik kashofo, ahan cha hi oke.

⁴⁶ Ililli hʋt onʋtoyula nitak moyuma ka̱ liteha hi oke; ik kashofo hokʋt ilap banot ahanta hi oke; aiʋtta yʋt binah ha̱ kocha ya̱ hi oke.

⁴⁷ Micha nafohka ya̱ ililli leplosi ʋt onʋtonla, chukfi hishi yokma, linen okma,

⁴⁸ Linen osh keyukmʋt chukfi hishi yosh ʋpi tʋnna yokma, keyukmʋt ishit tʋnna yokma, nahakshup okma, keyukmʋt nahakshup osh nana toba yokma,

⁴⁹ Ililli hʋt okchamali chohmi, keyukmʋt homma chohmi hosh nafohka ya̱, keyukmʋt nahakshup, keyukmʋt ʋpi tʋnna, keyukmʋt ishit tʋnna, keyukmʋt nahakshup nana ho̱ onʋtonlakmʋt, ililli leplosi yoke; atuk o̱ naholitompa isht ʋtta ya̱ pisacha hi oke.

⁵⁰ Mikma naholitompa isht ʋtta yʋt ililli ha̱ pisa cha ililli onʋtonla tuk a̱ im okhishta na nitak untukla hi oke.

⁵¹ Atuk osh nitak ont isht untuklokma nan ililli hash pisa hi oke; nafohka ya̱ ʋpi tʋnna ak okmá; keyukmʋt ishit tʋnna ak okmá; keyukmʋt nahaksup ak okmá, keyukmʋt nana hosh nahakshup ishit toba ak okmá, nana ho̱ ililli hʋt chitot isht iakma, ililli hʋt leplosi chilita yoke; ik kashofo hoke.

⁵² Yohmi hoka chukfi hishi yosh, keyukmʋt linen osh ʋpi tʋnna, keyukmʋt ishit tʋnna, keyukmʋt nahakshup keyukmʋt nahakshup ishit toba yosh ililli hʋt onʋtonla nafohka yʋmma hukma hi oke: leplosi chilita yoka, luak ishit luashke.

⁵³ Atuk o̱ naholitompa isht ʋtta yʋt pisakma, yakeh! nafohka ya̱ ʋpi ponola yokma, keyukmʋt ishit tʋnna yokma keyukmʋt nahakshup nana ho̱ ishit toba ya̱ ililli hʋt chitot isht ik aiyokma,

⁵⁴ Yohmikma naholitompa isht ʋtta yʋt ililli onʋtonla nana kash achifa chi̱ ka̱ i̱ miha cha, himakma nitak untuklo ho̱ im okhishta hi oke.

⁵⁵ Atukma ahchifa ha ya̱ naholitompa isht ʋtta yʋt pisa hi oke; mikma yakeh! ililli pisa kʋt inlʋt isht ik aiyo, micha ililli hʋt chitot isht ik aiyokmʋt ik kashofo hoke; luak ishit ish luacha hi oke; noshkobo, keyukmʋt ibitakla yushmilali hokmá, nana kia anu̱kaka chilita yoke.

⁵⁶ Micha naholitompa isht ʋtta yʋt pisakma yakeh! ahchifa ha ya̱ ililli hʋt lusa chohmikma, nafohka yash, keyukmʋt na hakshup ash, keyukmʋt ʋpi yash, keyukmʋt ishit tʋnna yash hlilʋffit kohcha hi oke.

⁵⁷ Atuk o̱ anonti nafohka yash, keyukmʋt ʋpi yash, keyukmʋt ishit tʋnna yash, keyukmʋt nahakshup osh natoba yash haiakakmʋt ililli ʋlmoli yoke: ililli onʋtonla yʋmma luak isht ish hukma hi oke.

⁵⁸ Micha nafohka ya̱ ʋpi hokmá keyukmʋt ishit tʋnna yokmá; keyukmʋt nahakshup osh nana kia toba tuk okmá nana ish achifa tuk ash ililli hʋt kʋniakma, atukla ma ʋlhchifa cha kashofa hi oke.

⁵⁹ Nafohka yʋt chukfi hishi, keyukmʋt linen osh ʋpi yokmá; keyukmʋt ishit tʋnna yokmá, keyukmʋt nahakshup isht atoba nana ho̱ ililli hʋt onʋtoyula na, kashofa, acha he, keyukmʋt ik kashofo, acha hi ya̱, nan ʋlhpisa hʋt ilʋppak oke, im achi tok.