Lefitikʋs 12 - Chahta Holisso Holitopa 1886

¹ Micha Chihowah yʋt Moses a̱ im anumpulit,

² Islael im ʋlla ʋhleha ha̱ im anumpulit, Ohoyo hʋt chakali cha ʋlla nakni yo̱ eshikmʋt nitak untuklo ho̱ ik kashofo ka hi oke, liteha kʋt ila filʋmmi chatuk nitak itin takla mak o̱ ik kashofo ka hi oke.

³ Atuk o̱ nitak ont isht untuchinakma ʋlla yʋt hakshup in tʋpashke.

⁴ Yomohmi ka̱ ohoyo hash ot issish onʋtoyulʋt ile kashofi kʋt nitak pokoli tuchina akucha tuchina hi oke; ile kashofi nitak ʋt ont ik taho ki̱sha ho̱ nana hullo nana kia potola he keyu, micha ʋlhtipo holitopa ont chukowa he keyu hoke.

⁵ Amba ʋlla tek o̱ eshi hokmʋto nitak hullo tuklo ho̱ ik kashofot ile filʋmmicha hi oke; micha issish onʋtoyulʋt ile kashofi kʋt nitak pokoli hannali akucha hannala hi oke.

⁶ Micha ʋlla nakni, keyukmʋt ʋlla tek atuk o̱ ile kashofi nitak ʋt ont tahakma, hukmit im issa yo̱ chukfushi afʋmmi ʋmmona, micha nanashʋchi im issa yo̱ pʋchushi, keyukmʋt pʋchi yoshoba aiena ho̱ okla moma im ʋlhtipo okhissa isht onʋt naholitompa isht ʋtta ya̱ isht im ona hi oke.

⁷ Mikma yʋmmak osh Chihowah itikba ya̱ ai im issa cha i̱ kashoffa hi oke. Mikma issish i̱ yanali tuk ʋt kashofa hi oke. Ilʋppʋt nakni, keyukmʋt tek o̱ eshi tuk ʋt i̱ nan ʋlhpisa hoke.

⁸ Yohmi ka̱ chukfushi ya̱ isht ʋla he keyukmʋt pʋchi yoshoba tuklo, keyukmʋt pʋchushi tuklo ho̱ isht ʋlashke; achʋfa kʋt hukmit im issa yokma, achʋfa kʋt nanashʋchi im issa ya hi oke, mikma naholitompa isht ʋtta yʋt i̱ kashoffikma, kashofa hi oke; ish im achashke, im achi tok.