Lefitikʋs 11 - Chahta Holisso Holitopa 1886

¹ Mihma Chihowah yʋt Moses micha Alon itatuklo ka̱ im anumpulit,

² Islael im ʋlla ʋhleha ha̱ im anumpulit, nampoa yakni paknaka aiasha moma ka̱, nampoa ilʋppa puta kak o̱ hʋsh pa hi oke.

³ Nampoa puta ka̱ nana hosh iyakchush ʋt iti̱ filʋmmi, iyi ʋt chulakto cha, hʋshuk ʋpa tuk ʋt falʋmminchit kohchit hopa̱sa ak o̱ hʋshpa hi oke.

⁴ Yohmi kia ilʋppa puta kak o̱ hʋshuk ʋpa tuk ʋt falʋmminchit kohchi cha hopa̱sa yoh kia, micha iyakchush chulakto yoh kia, hʋshpa he keyu hoke. Kamel a chohmi ka̱ hʋshuk ʋpa tuk ʋt kohchi cha hopa̱sa kia, iyakchush a̱ chuhlʋffi keyu hokʋt, hʋchin liteha hoke.

⁵ Micha chukfi hʋshuk ʋpa tuk ʋt falʋmminchit kohchit hopa̱sa kia iyakchush a̱ ik chuhlʋffo hokʋt hʋchin liteha hoke.

⁶ Micha puta kʋta hʋshnk a̱ ʋpa tuk ʋt falʋmminchit kohchit hopa̱sa kia iyakchush a̱ ik chuhlʋffo hokʋt hʋchin liteha hoke.

⁷ Micha shukha, yʋmmʋt iyakchush chuhlʋffi kia hʋshuk ʋpa tuk ʋt falʋmminchit kohchit hopa̱sa keyu hokʋt hʋchin liteha hoke.

⁸ Nipi ya̱ hʋshpa he keyu, micha haknip illi ya̱ hush potola he keyu hoke, hʋchin liteha hoke.

⁹ Oka aiasha ka̱ ilʋppa puta moma kak o̱ hʋshpa hi oke, nana hosh oka, micha okhʋta, micha okhina ai itʋnowa yosh isht okyohli micha hakshup fachula im a̱sha ya̱ hʋshpa hi oke.

¹⁰ Micha isht okyohli micha hakshup fachula ik im iksho moma okhʋta micha okhina aiasha, oka ai itʋnowa moma, nana okcha̱ya nana hoh kia oka aiasha kʋt hʋchi̱ yuwala ya̱ hi oke.

¹¹ Isht hʋchi̱ yuwala he mak oke; nipi ya̱ hʋsh pa he keyu, amba nipi illi yʋt isht hʋchi̱ yuwala hi oke.

¹² Nana hosh isht okyohli micha hakshup fachula ik im iksho hosh, oka aiashakmʋt mihi yosh isht hʋchi̱ yuwala hi oke.

¹³ Micha hushi puta ka̱ ilʋppak osh isht hʋchi̱ yuwala hi oke, ʋpa he keyu; ishit yuwala hoke, U̱ssi micha ossiflech (okhʋta u̱ssi) micha osple, (u̱ssi nʋni ʋpa)

¹⁴ Micha fʋlta, micha kait im aiachʋfa,

¹⁵ Fʋla chito moma im ai achʋfa,

¹⁶ Micha opah: micha oksup‐ibafohli, micha kuku micha bia̱kak im ai achʋfa.

¹⁷ Micha opah iskitini, micha kamolant micha opah chito.

¹⁸ Micha okak, micha chilantakoba micha kia‐u̱ssi.

¹⁹ Micha stok micha itikushayaiya (hushwak) im ai achʋfa, micha lapwin, micha halambisha aiena ka̱ hʋshpa he keyu hoke.

²⁰ Hushi puta balʋlli iyi ushta kash ishit noho̱wa moma kʋt isht hʋchi̱ yuwala hi oke.

²¹ Yohmi kia naheli balʋlli, iyi ushta ishit noho̱wa iyi paknaka ya̱ iyi holhki ʋt a̱shʋt yakni ya̱ isht on tullit aya yokma moma ka̱ hʋshpa hi oke.

²² Ilʋppa puta kak o̱ hʋsh ai ʋpa hi oke. Ha̱wa ilap aiachʋfa, micha ha̱wa yushmilali ilap ai achʋfa micha shu̱shi lapitta ilap ai achʋfa, micha hatʋffo ilap ai achʋfa aiena kak oke.

²³ Amba naheli balahanli inla iyi im ushta moma kʋt nan isht hʋchi̱ yuwala ya chi̱ hoke.

²⁴ Micha ilʋppa puta kak o̱ isht hʋchi̱ liteha hi oke. Kʋna hosh yʋmma illi ya̱ halelikmʋt liti̱ha na, ont opia hi oke.

²⁵ Micha kʋna hosh illi yʋmma kaniohmi ho̱ sholi hokmʋt i̱ nafohka ya̱ achifa cha liti̱ha na, ont opia hi oke.

²⁶ Nampoa hʋt iyakchush iti̱ filʋmmichi, micha iyi pahlata keyu hosh hʋshuk ʋpa tuk ʋt falʋmminchit kohchit hopa̱sa keyu puta haknip illi yʋt hʋchin liteha hoke.

²⁷ Micha nampoa iyi ushta ishit noho̱wa ilaiyuka puta, nampoa nana hosh iyi puta ishit noho̱wa hokmʋt yʋmma puta kʋt hʋchin liteha hoke: Kʋna hosh haknip illi haleli hokmʋt liti̱ha na, ont opia hi oke.

²⁸ Micha illi yʋmma sholi tuk mʋt i̱ nafohka ya̱ achifa cha liti̱ha na, ont opia hi oke; hʋchin liteha yoke.

²⁹ Ilʋppa puta aiena kak osh na balali yakni om balahanli ʋt hʋchin liteha hi oke: weasel, micha pinti micha luksi ilap ai achʋfa,

³⁰ Micha fellet, micha kamelion, micha halanchilawa, micha snail, micha yulhkun aiena kak a hi oke.

³¹ Ilʋppa puta balahanli puta kʋt hʋchin liteha hoke. Kʋna hosh illi tuk a̱ halelikmʋt liti̱ha na, ont opia hi oke.

³² Micha nana ho̱ iti nan ai ʋlhto, keyukmʋt nafohka, keyukmʋt na hakshup, keyukmʋt bahta, nan aiʋlhto nana kia, nan ai atahli chatuk o̱ illi yosh onʋtulakma, liteha hi oke; oka okʋchi cha liti̱ha na ont opia hi oke; yohmi hosh kashofa hi oke.

³³ Micha lukfi tʋnna puta nan ai ʋlhto nana kia, nana hosh a̱lhto tuk o̱ okatulakma liteha hi oke; mikma hʋsh kola hi oke.

³⁴ Ilhpak moma ʋpa he ʋlhpesa ho̱ oka yʋmma chohmi hosh on hlatapakma yʋmmak atuk ʋt liteha hi oke; micha nan ishko nana ho̱ ishka he ʋlhpesa hosh nan aiʋlhto puta yʋmma chohmi ho̱ ʋlhtokmʋt liteha hi oke.

³⁵ Micha nana puta kanima ho̱ illi yash kaniohmi hosh onʋtulakma liteha hi oke; apalʋska, keyukmʋt shuti ʋt baiʋllit ataloha, koʋt kinahla hi oke, liteha yokʋt, micha hʋchin liteha hi oke.

³⁶ Yohmi kia kʋli, keyukmʋt kʋli hofobi yosh oka la̱wa achukma hokmʋto kashofa hi oke; amba yʋmma illi ya̱ haleli hokʋto liteha hi oke.

³⁷ Micha illi yash kaniohmi hosh napehna hollokcha chin tuk a̱ onʋtulakma kashofa hi oke.

³⁸ Amba napehna ya̱ oka nana hosh o̱ hlatapa tuk o̱ illi yash kaniohmi hosh onʋtulakma hʋchin liteha hi oke.

³⁹ Nampoa nana hosh hʋshpa hinla tuk osh illikma kʋna hosh illi yʋmma halelikmʋt liti̱ha na, ont opia hi oke.

⁴⁰ Micha kʋna hosh illi yash ʋpakmʋt i̱ nafohka ya̱ achifa cha liti̱ha na, ont opia hi oke; micha kʋna hosh illi yash sholi tuk oh kia i̱ nafohka ya̱, achifa cha liti̱ha na, ont opia hi oke.

⁴¹ Micha na balali puta yakni paknaka ya̱ o̱ balahanli ʋt nan ishit yuwala ya hi oke; ʋpa he keyu hoke.

⁴² Nana hosh ikfoka ishit nohowa, keyukmʋt iyi ushta ho̱ ishit noho̱wa, keyukmʋt na balali yakni om balahanli ya̱ iyi laua kʋt i̱ shahlikma, yʋmmak oka hʋsh pa he keyu, nan isht yuwala yoka.

⁴³ Na balʋlli balahanli chatuk nana kia, ishit yuwala isht hʋsh il ikba he keyu, micha yʋmmak oka isht hʋsh ile litehli cha isht hʋchi liteha he keyu hoke

⁴⁴ Chitokaka hʋchi̱ Chihowah sia hoka, yʋmohmi hoka hʋsh ile hullochi cha hʋchi holitopashke, holitopa sia hoka; micha na balʋlli yakni o̱ balahanli chatuk nana kia isht hʋsh ile litehla he keyu hoke.

⁴⁵ Hʋchin Chitokaka sia ha chi̱ hosh Echip yakni ya̱ apehlichit hʋchi kohchi tuk Chihowah sia hoka; yʋmohmi hoka hʋchi holitopashke; sa holitopa hoka.

⁴⁶ Ilʋppak osh nampoa, micha hushi, micha okcha̱ya puta oka ya̱ ata̱ya, micha nana puta yakni ya̱ om balahanli aiena nan ʋlhpisa hoke.

⁴⁷ Ik kashofo, micha kashofa, micha nampoa ʋpa he ʋlhpesa ka̱, micha nampoa ʋpa he ʋlhpesa keyu ya̱ ishit itim inlʋchi yoke; hʋsh im achashke, im achi tok oke.