Lefitikʋs 10 - Chahta Holisso Holitopa 1886

¹ Atuk o̱ Alon ushi Netab micha Abihu ʋt nabalama a hukmi ishi bi̱ka cha luak a̱ fohki mʋt nabalama ya̱ onochi cha, yʋmmak oka i̱ miha tuk keyu ka̱ luak inla Chihowah ya̱ im issa tok.

² Mihma luak ʋt Chihowah ya̱ a minti hosh kohchʋt iʋt hukmit tahli na Chihowah itikba ai illi tok.

³ Yohmi ma Moses ʋt Alon a̱, Ilʋppak o̱ Chihowah yʋt anumpulit, A̱ bilika ʋla ka̱ a holitopa la chi hoke. Micha okla moma itikba a holitopa la chi̱ hoke, achi tuk mak oke, im achi tok. Mihma Alon ʋt nan ik acho ki tok.

⁴ Mihma Moses ʋt Alon imoshi Ussiel ushi Mishael micha Elsafan a̱ hoyo cha, Bili̱ka hʋshla cha hʋchitibapishi ʋhleha ha̱ okla moma im ʋlhtipo itikba ai ishit binah ha̱ kocha isht hʋsh onashke, im achi tok.

⁵ Yohmi ho̱ Moses ʋt achi tuk mak o̱, bili̱ka ona cha i̱ nafohka ya̱ fo̱ka ho̱ binah ha̱ kocha isht ona tok.

⁶ Mihma Moses ʋt Alon, micha ushi Eliesa micha Ihlama, Hʋchi noshkobo o̱ hlipa ya̱ hʋchik shu̱fo kashke, micha hʋchi̱ nafohka ya̱ hʋchik hlilʋffo kashke; hʋch illi ná, micha im ai i̱ nukkilli ʋt okla moma ka̱ onʋtuyula ná: amba hʋchitibapishi ʋhleha Islael in chukachʋfa moyuma kʋt luak a̱ Chihowah yʋt oti tuk ak o̱ chitoli hosh yaiyashke.

⁷ Micha okla moma im ʋlhtipo okhissa ya̱ i̱ filʋmmit hʋchik ayo kashke, hʋch illi ná; nan isht ahama Chihowah i̱ bila yʋt hʋchi onʋtonla hokʋt, im achi tok. Mihma Moses im anumpa hatuk mak o̱ okla yʋmohmi tok.

⁸ Mihma Chihowah yʋt Alon a̱ im anumpulit,

⁹ Chishno micha chiso ʋhleha hʋsh aiena kʋt okla moma im ʋlhtipo ya̱ hʋsh chukowakmʋt oka pa̱ki, micha nan ishko kʋllo aiena ka̱ hʋchik ishko kashke, hʋch illi ná, ilʋppʋt hʋchi ai unchuloli hlopulli ka̱ nan ʋlhpisa bilia ya chi̱ hoke.

¹⁰ Yʋmohmikma naholitopa, micha nan ik holitopo, micha nan ik kashofo, micha nana kashofa ya̱ hʋsh itim inlʋchashke.

¹¹ Yʋmohmi hosh Chihowah yʋt Moses a̱ tohnot ai im anumpohonli tok nan ʋlhpisa moma ka̱ Islael im ʋlla ʋhleha ha̱ hʋsh im abahanchashke; im achi tok.

¹² Mihma Moses ʋt Alon micha ushi okcha̱ya moma tuk Eliesa micha Ihlama aiena ka̱ im anumpulit, Ilhpak im issa luak ishit hukmit Chihowah im issa a̱sha moma tuk a̱ hʋsh eshi cha isht shatʋmmi ʋt iksho ho̱ alta bili̱ka hʋsh ai ʋpashke: holitopa i shahli yoke.

¹³ Ilʋppʋt ʋbit luak ishit hukmit Chihowah im issa puta ak o̱ ai ishit chimmi, micha chiso ʋhleha immi hatuk okʋt, a holitopa ak o̱ hʋsh ai ʋpashke, yʋmmak o̱ a̱ miha tuk mak oka.

¹⁴ Micha fahfuli ikkishi micha wahli fulup a̱ akashofa ho̱ chishno, micha chiso ʋhleha, micha chisotek ʋhleha aienʋt hʋsh ai ʋpashke: itin nanaiyʋchi im issa ʋbit im issa Islael im ʋlla ʋhleha hʋt ima tuk akohcha kʋt chimmi micha chiso ʋhleha aienʋt immi hatuk okʋt.

¹⁵ Fahfulit ikkishi im issa ya̱ Chihowah itikba fahfula chi̱ kʋt, wahli fulup, micha fahfuli ikkishi ha̱ luak ishit hukmit im issa nia ya̱ aieninchit isht ʋlashke; yohmi ka̱ Chihowah yʋt miha tuk mak o̱ yʋmmʋt chimmi micha chiso ʋhleha immi nan ʋlhpisa bilia ya chi̱ hoke, im achi tok.

¹⁶ Atuk o̱ Moses ʋt nan ashʋchi im issa issi kosoma ya̱ achunanchit hoyo ma, Yakeh, lua tuk atok: mihma Alon ushi ʋhleha okcha̱ya moma tuk, Eliesa micha Ihlama ya̱ i̱ nukhobela cha,

¹⁷ Nanta katiohmi ho̱ nanashʋchi im issa, aholitopa ya̱ hʋch ik ai apo tuk oh cho? holitopa i̱ shahli hatuk, micha okla moma nan ashʋchi ya̱ Chihowah itikba hʋsh a shaiyala chi̱, micha isht hʋsh i̱ kashoffa chi̱ aiena ho̱ Chitokaka yʋt hʋch ima hatuk oka.

¹⁸ Yakeh, issish a̱ aholitopa anu̱kaka isht ikloshke hʋchi̱ miha li tuk mak o̱ aholitopa ya̱ hʋsh ai ʋpa mʋhla he tuk oke, im achi tok.

¹⁹ Mihma Alon ʋt Moses a̱, Yakeh, himak nitak nan ashʋchi im issa, micha hukmit im issa aiena ka̱ Chihowah itikba ai im issa tuk oke; atuk o̱ nana yakohmi kak osh si onʋtulʋshke: atuk osh himak nitak a̱ nan ashʋchi im issa ʋpa li tuk ma, Chihowah yʋt aiokpʋcha he tuk oh cho? im achi tok.

²⁰ Atuk o̱ Moses ʋt yʋmma haklo mʋt, im ʋlhpesa tok.