Lefitikʋs 1 - Chahta Holisso Holitopa 1886

¹ Mihma Chihowah yʋt Moses a̱ i̱ howa cha okla moma im ʋlhtipo ya̱ et im anumpulit,

² Islael im ʋlla ʋhleha ha̱ im anumpulit, Hatak hʋsh kanima hosh nan im issa ya̱ Chihowah isht hʋsh im onakmʋt, na hʋsh im issa, ʋlhpoa hochito ai ishit wak, micha ʋlhpoa chipunta ya̱ isht hʋsh im onashke.

³ Mikmʋt nan im issa yʋt ʋlhpoa hochito ai ishit na hukmit im issa hokmʋt nakni yosh ai okpuloka iksho ho̱ im issashke, ilap ahni hosh Chihowah itikba okla moma im ʋlhtipo okhissa yak o̱ ai im issashke.

⁴ Micha na hukmit im issa noshkobo ha̱, ibbak isht om bitepashke. Micha im aiokpʋchi na, isht im ʋlhtoba hi oke.

⁵ Mikma wak hobʋk ash Chihowah itikba ai ʋba hi oke; mihma na holitopa isht a̱sha Alon ushi ʋhleha hʋt issish a̱ isht ʋla cha, issish ash alta, yʋmmʋt okla moma im ʋlhtipo okhissa bili̱ka hikia ka̱ o̱ fimmit fullohlichashke.

⁶ Micha na hukmit im issa ya̱ hlu̱fi cha bʋshlit tahla hi oke.

⁷ Mikma na holitompa isht ʋtta Alon ushi ʋhleha hʋt alta ya̱ luak onochi cha achukmalit luak a̱ iti onochashke.

⁸ Mikma na isht a̱sha Alon ushi ʋhleha hʋt, tʋptua, noshkobo micha nia aiena ka̱ luak ʋt alta on a̱sha iti on a̱sha ka̱ paknaka ya̱ achukmalit onochashke.

⁹ Amba ikfoka, iyi aiena kʋno, oka isht achifa hi oke: mihma na hukmit im issa Chihowah i̱ balama achukma lua yo̱ naholitopa isht ʋtta yʋt mominchit alta onochit hukma hi oke.

¹⁰ Micha nan im issa kʋt nan ʋlhpoa chipunta chukfʋlhpoa, keyukmʋt issi kosoma yo̱ hukmit im issak mʋt, nakni yosh ai okpuloka kʋt iksho ho̱ isht ʋlashke.

¹¹ Micha Chihowah itikba alta ya̱ falʋmmi in tʋnnʋp o̱ ai ʋbashke; micha na holitompa isht a̱sha Alon ushi ʋhleha hʋt issish a̱ alta ya̱ o̱ fimmit fullohlichashke.

¹² Micha noshkobo micha nia aiena ka̱ bʋshlit tahlashke. Mikma na holitopa isht ʋtta yʋt alta ya̱ luak on a̱sha na iti ʋt o̱ a̱sha ka̱ achukmalit onochashke.

¹³ Amba ikfoka micha iyi aiena kʋno oka isht achifashke, micha na holitompa isht ʋtta yʋt mominchit isht ʋla cha alta ya̱ onochit hukmashke; na hukmit im issa luak ishit hukmit im issa Chihowah ya̱ nan i̱ balama achukma yoke.

¹⁴ Micha na hukmit im issa ya̱ Chihowah ya̱ nan im issa kʋt, hushi yokma, nan im issa yʋt pʋchi yʋshoba, keyukmʋt pʋchushi yo̱ isht ʋlashke.

¹⁵ Mikma na holitopa isht ʋtta yʋt alta bili̱ka isht ona cha, noshkobo ha̱ shʋnnit tʋbli cha alta ya̱ onochit hukmashke; micha im issish a̱ shʋnnit alta lapalika a hlatʋblashke.

¹⁶ Micha impʋffakchi ya̱ naliteha aieninchit eshi cha alta lapalika i̱ hʋshi akochaka in tʋnnʋp, hituk chubbi aiasha bili̱ka pilashke.

¹⁷ Micha sanahchi ʋt a̱sha moma ho̱ pahlʋllashke; yohmi kia ik ita hokofo kashke; mikma na holitopa isht ʋtta yʋt alta ya̱ luak on a̱sha ka̱ mikma iti on a̱sha ka̱ onochit hukmashke; na hukmit im issa luak ishit hukmit Chihowah nan i̱ balama achukma yoke.