Koloshan 4 - Chahta Holisso Holitopa 1886

Nan i̱ shahli ʋt nana a kaniohma he ʋlhpesa ka achi, 1, 2 Ʋba a sihi̱hla bilia he im achi; 5 chʋch ik ibafoko itanowa ka nan ʋlhpesa biekʋt im itʋnoho̱wa he; 10 nana ka i̱ shahlit ma̱ha̱ya he ahnit im achi.

¹ I̱ nahullo ʋhleha ma! hʋchi̱ yuka ʋhleha nan isht im ʋlhpesa, micha nan isht im itilaui aiena ka hʋsh imashke; micha hʋchishno ak kia hʋchi̱ shahli hʋt ʋba yakni binili ka hʋsh ithaiyanashke.

² Anumpa ilbʋsha anumpohonlit, yʋmmak ash o̱ ai o̱kchʋt yak oke hʋsh aha̱nashke.

³ Yohmi mak inlit Klaist im anumpa luma yatok, micha yʋmma pulla kak o̱ sa talakchi ak inli tuk ʋt isht anumpuli la he, okhissa ya̱ Chihowa yʋt pin tiwa hi a̱, isht hʋsh anumpohonli mak inlashke.

⁴ Yʋmohmi ho̱ anumpuli la he ʋlhpesa hatuk ʋt, otʋninchi lashke.

⁵ Kocha ai asha ka i̱ hopoyuksʋt itʋnowʋt, nitak ik hʋchi̱ kʋnio hosh nan isht hʋsh il im ahantashke.

⁶ Hʋchim anumpa puta kʋt Chihowa nan isht i̱ kana ai ibafoyuka biekʋt hʋpi ho̱ isht yʋmmashke; yohmi hosh kaniohmit hatak puta anumpa falama ka hʋsh ima he ʋlhpesa kʋt hʋsh ithaiyana hoke.

⁷ Nana ʋma kaniohmi ka Tikikʋs, ilʋppʋt itibapishili holitopa, micha ʋbanumpa isht ʋtta ai a̱hlit, micha tishu sa bi̱ka Chitokaka ibafoyuka yak osh hʋchim anola chi̱ hoke.

⁸ Yʋmmʋt yʋmohma chi̱ kak o̱ hʋchi̱ pila li tuk: yohmi ka nana hʋchim a kaniohmi ka akostininchi cha, hʋchi chu̱kʋsh a̱ hopohlʋla chi̱ kak atuk;

⁹ Micha Onesimʋs itibapishi li ai a̱hli holitopa, yʋmmʋt hʋchishno ak inli ka aieninchit hʋchi̱ pila li hatuk. Yʋmmak osh nana moma ilʋppa a kaniohmi ka hʋchim anola chi̱ hoke.

¹⁰ Alistakʋs, sʋbai yuka yʋt pit hʋchi aiokpʋchishke: micha Makʋs, Banabas in tek ushi mʋt pit hʋchi aiokpʋchishke; yʋmmak oka isht anumpa ʋlhpisa ha̱ hʋsh ishi tuk ʋt hʋchim onakma, hʋsh aiokpʋchashke.

¹¹ Micha Chisʋs, yʋmmʋt Chʋstʋs hohchifo hʋt pit hʋchi aiokpʋchishke; yakohmi kʋt hakshup tʋpa yoke. Ilʋppak illa hosh Chihowa im apehlichika a sʋba toksahanli yosh nan isht sa hopoho̱hla yatuk oke.

¹² Epaflas, yʋmmʋt hʋchishno mak inli, Klaist in tishu hosh pit hʋchi aiokpʋchishke, micha Chihowa nan ai ahni moma ka a kʋllot ai a̱hlit hʋsh hikia hi a̱ anumpa ilbʋsha achunanchit isht hʋchi anumpohonli bilia yoke.

¹³ Hʋchishno, micha Laotisea ai asha, micha Hielapolis ai asha aiena ka hʋchi anukfihinli fehna ka im atokowa anoli sia hoke.

¹⁴ Luk, alikchi holitopa, micha Temas, ita tuklo kʋt pit hʋchi aiokpʋchishke.

¹⁵ Itibapishi ʋhleha hʋt Laotisea aiasha, micha Nimfas, micha in chuka chʋfa chʋch ai asha aiena ka pit hʋsh aiokpʋchashke.

¹⁶ Micha holisso ilʋppa hʋsh it im anumpulikmʋt, anonti Laotisea chʋch ak kia ai it anumpa hi a̱ hʋsh apesashke: mikmʋt holisso Laotisea a minti ak kia hʋsh it im anumpulashke.

¹⁷ Micha Achippʋs a̱ Chitokaka yak o̱ ʋbanumpa isht ai ʋtta ish im ai eshi tuk ʋt ahah! ahnit ish ai a̱hlichashke, hʋsh im achashke.

¹⁸ Ʋno sʋbbak ak inli ho̱ Pal sia hʋt pit isht hʋchi aiokpʋchi lishke. Sa talakchi ka hʋsh ithaiyanashke. Isht i̱ kana yʋt hʋch anukfoyukashke. Amen.