Koloshan 3 - Chahta Holisso Holitopa 1886

Pim anukfila nan isht hih il ahni a̱ kanima yo̱ il a bohla hi a̱ pim anoli, 1; 5 na liteha isht im anukfila puta ka illicha he ʋlhpesa ka i̱ miha; 9 nan a̱hli anumpuli; 12 i̱ kanʋt nan iti̱ nanaiyachi; 14 ʋba isht taloho̱ʋt isht i̱ shahlit hʋsh iti hlampkochashke; 18 hatak im ohoyo; 10 hatak ohoyo im a̱sha; 20 ʋlla, 21 i̱ki 22, yuka aiena kʋt nan a kaniohma hi ʋlhpesa ka isht anumpuli.

¹ Yohmi ka Klaist a̱ hʋsh iba tani tuk okmʋt, Klaist ʋt a binili ʋba Chihowa ibbak isht impakimma nana ai asha kak o̱ hʋsh hoho̱yashke.

² Hʋchim anukfila ha̱ nana kʋt ʋba ai asha kak o̱ hʋsh onochi cha, nana kʋt yakni paknaka ai asha kak o̱ keyu kashke,

³ Hʋch illi; yohmi hosh hʋchi okcha̱ya yʋt Klaist a̱ iba lumʋt Chihowa ya̱ ibafoyuka hoke.

⁴ Klaist yʋmmʋt il ai okcha̱ya yosh haiaka, yohmikma hʋchishno ak kia a holitopa hosh yʋmmak ash awant hʋsh haiaka hi oke.

⁵ Yʋmohmi ka hʋchim i̱ nana kʋt yakni ai asha ka hʋsh illihinchi; haui toba, chu̱kʋsh liteha, anushkunna atampa, haknip nan ahni okpulo, nana ahayuchi bʋnna atampa, yʋmmʋt na holbʋt toba aiokpʋchi yoke.

⁶ Na yakohmi pulla kak o̱ Chihowa nan isht i̱ nukkilli ʋt nan ik im antio hatak puta ka onʋtuyula hoke:

⁷ Yʋmma chohmi ka hʋchishno ak kia cha̱shpo ma hʋsh ibafoyuka kʋt hʋsh ai itʋnowa tok.

⁸ Yohmi tuk kia himak okʋno hʋchishno ʋt nokowa, nukhobela, i̱ nukkilli, ik ahobalot anumpuli, anumpa isht hofahya, hʋch itih ha̱ akocha ilʋppa moma kak kia hʋsh kanchashke.

⁹ Hʋsh it i̱ holabi ná, hatak sipokni ya̱ shu̱fit nana a kaniohmi chatuk puta ka hʋsh kanchi cha;

¹⁰ Hatak himona yo̱ isht hʋsh foyuka tuk okʋt, yʋmmak okʋt nan ithana ka isht a himonʋt, Ikbi tok a̱ hoyulba hosh himonʋt toba tok:

¹¹ Yʋmmak oka Klik, micha Chu yo̱ keyu, hakshup tʋpa, micha hakshup ik tapo yo̱ keyu, Bʋlbaha, micha okla nukshopa yo̱ keyu, yuka, micha ik yuko yo̱ keyu, amba Klaist ʋto nana moma ka im i̱ shahli, micha moma ka ibafoyuka hoke.

¹² Yʋmohmi hoka Chihowa im ʋlhtoka nan ashʋchi iksho, holitopa hʋchia hokʋt hiahni, i̱ kana, anukfila akanlosi, chu̱kʋsh yohbi, anukhobela sʋlahʋt nuktaiyala aiena kak o̱ hʋsh foyukashke.

¹³ Hatak kʋna kia isht itachowa im a̱shakmʋt, itin lumʋt hʋsh it i̱ kashofashke; Klaist ʋt hʋchi̱ kashofi tok oka, yʋmmak inli ho̱ chohmit hʋsh yʋmohmashke.

¹⁴ Micha ilʋppa moma paknakachi kʋt nan isht i̱ hullo, yʋmmak osh ai ʋlhtaha ai a̱hli ka isht iti talakchi yoka, isht hʋsh foyukashke.

¹⁵ Micha it i̱ nanaiyʋchi Chihowa a minti ʋt hʋchi chu̱kʋsh a̱ foyukʋt nana hʋchim apesashke, yʋmmak a he ak o̱ haknip achʋfa hʋsh toba chi̱ hosh hʋchi ʋlhtoka tok oke: micha yak oke, hʋsh ahnashke.

¹⁶ Klaist im anumpa hʋt a chitot hʋchi foyuka na isht a hʋchi hopoyuksashke; ʋba isht taloa, micha shilombish imma isht taloa aiena ka isht it im abʋchit, isht it i̱ nukfohkit, nana aiokpahancha he hʋchi chu̱kʋsh a̱ foyukʋt Chitokaka ya̱ hʋsh in taloho̱ashke.

¹⁷ Micha anumpa hokmá, na kaniohmi hokmá, nana hoh kia hʋsh yʋmohmikmʋt, Chitokaka Chisʋs hochihi̱fot yʋmmak atuk mak o̱ I̱ki Chihowa ya̱ yak oke im ai ahnit, mominchit hʋsh yʋmihinchashke.

¹⁸ Tekchi ʋhleha ma! Chitokaka im ai ʋlhpiesa mak o̱ hʋchi̱ hatak a̱ hʋsh im ile nutakʋchashke.

¹⁹ I̱ hatak ʋhleha ma! hʋchi tekchi a̱ hʋsh i̱ hullashke; yohmi kʋt chu̱kʋsh homit hʋch ik i̱ kʋllo kashke.

²⁰ Ʋlla ʋhleha ma! nana moma ka hʋch i̱ki, micha hʋch ishki ita tuklo ka, hʋsh im antiashke; ilʋppak osh Chitokaka ya̱ im ai achukma a̱hli yoka.

²¹ I̱ki ʋhleha ma! hʋchim ʋlla ʋhleha ha̱ hʋsh nokowʋchi ná; yohmikma im ai a̱hli la he keyu ahnit, chu̱kʋsh iella hinla yoba ká.

²² Yuka ʋhleha ma! hʋchi haknip i̱ nahullo ʋhleha ha̱ nana puta ka hʋsh im antiashke; nishkin pi̱sa toksʋli hatak ak o̱ yukpali chohmi keyu, chukʋsh achʋfa ai apissali hosh Chihowa ya̱ hʋsh i̱ nukshoyupashke.

²³ Yohmi kʋt nan toksʋli nana ho̱ hʋsh yʋmihchikmʋt, chu̱kʋsh ai a̱hlit Chitokaka pulla, micha hatak keyu ho̱ hʋsh i yʋmihchashke.

²⁴ Chitokaka yak o̱ ai isha he ai ʋlhpesa isht hʋchim ʋlhtoba he ʋt hʋsh ithaiyanashke: Chitokaka Klaist ak o̱ hʋsh in toksahanli hokʋt.

²⁵ Amba kʋna hosh nan ik ʋlhpeso yohmikmʋt, nan ik ʋlhpeso yohmi tuk ak osh isht im ʋlhpisa hi oke: iti̱ shahsholichit kʋna kia im anukfilli kʋt iksho hoka.