Koloshan 2 - Chahta Holisso Holitopa 1886

Ai ʋlhpiesa banot chʋch a̱ ai asha he i̱ miha, 1: 8 hatak nan im anukfila, micha nana kʋt Klaist a̱ isht a hʋch a filʋmmicha hi okʋno hʋsh i̱ filʋmma he anoli.

¹ Hʋchishno, micha Laotisea ai asha, micha laua kʋt kaniohmi hosh sa nashuka ya̱ ik peso ki̱sha puta ka anukfihinlit, isht sʋlbʋsha fehna ka hʋsh ithaiyana hi a̱ hʋ chim ahni lishke:

² Yʋmohmi ho̱ chu̱kʋsh ʋt it i̱ hullot itʋshekonompa hosh chu̱kʋsh ʋt hopoho̱hlashke: yʋmohmi hosh ai yimmi a̱hli isht ai yukpa chinto ka ai a̱hlit ithana he, yohmi hosh Chihowa yʋmmʋt I̱ki, micha Klaist isht anumpa luma hatok ma otʋnihincha he ak atok;

³ Klaist ak o̱ na hopoyuksa, micha nan ithana ita tuklo im isht ilaiyukpa moma kʋt a luma hoke.

⁴ Micha hatak nana kia anumpa isht yimmichi isht hʋchi haksicha hinla kak o̱ ilʋppa achi lishke.

⁵ Haknip okʋno isht ik saksho kia, shilombish okʋno isht hʋch ibafoyukʋt ai ʋlhpiesa hʋsh yʋmohmi, micha Klaist a̱ i̱ yimmi ka a kʋllot hʋsh hieli ka hʋchi pihi̱sa li kʋt sai yukpa hoke.

⁶ Yʋmohmi ka Klaist Chisʋs Chitokaka ya̱ hʋsh i̱ yimmi hatuk okʋt, yʋmohmit hʋsh iba nohowashke:

⁷ Micha hakshish atobʋt kʋllot ontalaiʋt a hʋchim ai ʋlbʋchi tok mak o̱, ai yimmika a kʋllot im ai ʋlhtaha fehnʋt, yak oke hʋsh ai ahnashke.

⁸ Ahah! hʋsh ahnashke, keyukma hatak nana kia hatak im anumpa cha̱shpo isht auehinchi iakaiya, micha yakni nan ai ithʋna isht ia ʋmmona iakaiya cha, Klaist a̱ ik iakaiyo yʋt anumpa inla, micha anumpa isht haksichi aiena ka isht hʋchi okpʋnichi ná.

⁹ Klaist ak osh Chihowa yʋt akaniohmi ka isht alotowa kʋt:

¹⁰ Hochitoka, micha nan ʋlhtoka puta i̱ noshkoboka yʋmmak o̱ isht hʋchim ai ʋlhtaha hoke:

¹¹ Yʋmmak pulla ho̱ hʋchishno ak kia ibbak o̱ hakshup isht tʋpa keyu ho̱ hakshup isht hʋchin tʋpa tok: yʋmohmi hosh Klaist hakshup tʋpa pulla ho̱ haknip nan isht ashʋchi yash naksika hʋsh bohli tuk oke:

¹² Na baptismo ho̱ hʋsh iba hollopi tuk, Chihowa yʋt toksʋlit yʋmmʋt illi tuk a̱ falaminchit tanichi tok ak o̱, hʋchi yimmi hosh yʋmmak ash awant hʋsh tani hoke.

¹³ Yohmi kʋt hʋchishno ʋt nana hʋsh ai ashʋchi isht illi, micha hʋchi haknip hakshup ik tapo atuk a̱ nana hʋsh ai ashʋchi puta ka hʋchi̱ kashofi cha, yʋmmak ash iba ta̱klʋchit hʋchi okchalinchi tuk oke:

¹⁴ Nan isht ʋlhpisa ibbak isht holisso a̱ kashofi tok, yʋmmʋt pi̱ sanali, micha pim ai ʋlhpiesa keyu hosh pi ai ititakla hikia tok a̱ ishit kanchit, im ititaiyukhʋna ya̱ ahonʋhlichi tok oke:

¹⁵ Yʋmma pulla ho̱ hochitoka, micha isht im ai a̱hli puta aiena ka wehpulit, haiakʋchit pisachit isht ai yukpa tok.

¹⁶ Yʋmohmi hoka hatak nana kia impa ak ok má, nan ishko ak okmá, impa holitopa nitak ak okmá, hʋshi talali ak okmá, nitak hʋllo puta ak okmá, nana kia nan isht apesʋt ik hʋchi onocho kashke.

¹⁷ Yʋmmʋt nana kʋt ʋla he isht ʋlhpisa yoke: amba haknip okʋto Klaist ak oke.

¹⁸ Hatak nana kia ilap ahnit il akanlosechit, enchil ʋhleha ha̱ aiokpʋchit nana pisa chatuk keyu kʋt, afʋnalit haknip im anukfila isht ilefehnʋchi, yʋmohmit noshkoboka ya̱ halʋlli keyu kʋt, na hʋsh asitʋba he tuk a̱, ik hʋchim esho kashke.

¹⁹ Yʋmmak o̱ haknip moma itachakli, micha hakshish aiena kʋt isht ai iti talakchit isht hlampkot, Chihowa hʋt ahni ho̱ tobʋt ia hoke.

²⁰ Yohmi ka yakni ai ithʋna isht ia ʋmmona ai i̱ filʋmmit, Klaist a̱ hʋsh ibai illi tok okmʋt, nanta katihmi ho̱ yakni hʋsh ibafoyuka chohmit, nan isht ʋlhpisa hatak ʋt apesʋt ithʋnanchi ka hʋsh i̱ nutaka cho̱?

^21-22 Ilʋppa chohmi ka, Ish potoli ná; ʋpʋt ish pisa ná; ish pʋshohli ná, moma kʋt ieshi kʋt okpula he bieka hoka.

²³ Nana yʋmma puta hokʋt hopoyuksa ahoba ho mʋhli, ilap ahnit ʋba aiokpʋchit il akanlosechit hahnip a̱ ilbʋshali; yohmi kia holitoblichi keyu, peh haknip ak o̱ im achukmali hoke.