Koloshan 1 - Chahta Holisso Holitopa 1886

Na yimmi a̱hlit ma̱ya pulla kak o̱ Chihowa ya̱ ai okpahanchi, 1: 9 nan isht i̱ kana anukfohkʋt i̱ shahlit ma̱ha̱ya he isht anumpohonli; 14 Klaist holitopa he isht anumpuli; 21 mihmʋt nana ka Klaist ʋt im ataiyahli tok a̱ im anoli.

¹ Pal, Chihowa nan ai ahni hatuk pulla mak o̱ Chisʋs Klaist im apostel sia, micha Timohliʋs pitibapishi ita tuklo kʋt,

² Ʋbanumpa yimmi a̱hli ʋhleha, il itibapishi a̱hli Klaist a̱ ibafoyuka Kolossi ai asha ka pit aiokpʋchi kʋt, Pi̱ki Chihowa, micha Chitokaka Chisʋs Klaist ita tuklo nan isht i̱ kana, micha nan isht it i̱ nanaiya ita tuklo mak osh hʋchi anukfoyukashke, hʋchim ahnishke.

³ Chihowa, micha pin Chitokaka Chisʋs Klaist I̱ki ya̱ yak oke, im ahnit, ʋba isht e hʋchi anumpohonli na bilia hoke;

⁴ Yohmi kʋt Klaist Chisʋs a̱ hʋsh i̱ yimmi, micha ʋbanumpa yimmi ʋhleha ha̱ hʋsh i̱ hullo ka e haklo ha yokʋt,

⁵ Ai okcha̱ya bilia hʋsh isha he ʋba hʋch in tuyula pulla kak o̱ e yohmishke; yʋmmak oka ʋbanumpa a̱hli isht ai anumpa ho̱ tikba kash hʋsh haiyaklo tuk ʋt;

⁶ Mihi yosh hʋchim ʋla tuk ak inli chohmit, yakni moma ka im a̱ya cha, nan ʋnit waya kʋt, nana ka hʋsh haiyaklot, Chihowa nan isht i̱ kana a̱hli hʋsh ithaiyana nitak atuk taiyakla kʋt, nan ʋnit hʋsh waya kak inli ho̱ chohmi hoke.

⁷ Yʋmmak ash inli ho̱ Epaflas, tishu pi bi̱ka pi̱ holitopa ya̱ hʋsh im ai ithʋna tuk; yʋmmak okʋt Klaist im ʋbanumpa isht ʋtta hʋchim a̱hli mak oke:

⁸ Yʋmmak inli kak osh Shilombish a̱ ibai achʋfʋt hʋsh it i̱ hullo ka pim anoli tok.

⁹ Yakohmi kak o̱ nitak yʋmma fehna ka e haiyaklo tuk taiyakla kʋt, anumpa ilbʋsha isht e hʋchi anumpohonli kʋt il issa keyu, mihmʋt hʋchi hopoyuksa bieka, micha shilombish im ahalaia ka ithʋnʋt, Chihowa nan ai ahni ka hʋsh ithana ka isht hʋchi alotowa he ak o̱, il ai ahni hoke:

¹⁰ Micha nan toksʋli achukma puta ka isht ai ʋni, micha Chihowa nan isht im ithana ya̱ isht i̱ shahlit isht ia hosh, Chitokaka ya̱ ai im ʋlhpiesʋt nana moma ka isht yukpali cha;

¹¹ Chihowa imi hlampko holitopa isht hlampko fehna hosh, nukchintot achunanchit, nan ilbʋsha yʋt onʋtuyula kia nuktaiyalʋt ʋlhpesa ahnit yukpa banot;

¹² Ʋbanumpa yimmi yʋt ʋba atohwikeli ai isha he ʋlhpesa hosh ai asha ka ai il iba ta̱kla hi a̱ pi ai atahli tok, Pi̱ki yʋmma yak oke hʋsh im ai ahna he ak o̱, il ai ahni hoke;

¹³ Yʋmmak okʋt aiokhlili ka isht im ai a̱hli ya̱ a pi a hlakofichi mʋt, anonti kanʋllichit ilap Ushi holitopa im apehlichika ya̱ pisht ona tuk oke;

¹⁴ Yʋmmak o̱ im issish isht ʋlbi ai okcha̱ya, nan ai ashʋchi isht kashofa mak o̱ il eshi hoke:

¹⁵ Yʋmmʋt Chihowa ya̱ pisa he keyu ka hoyulba kʋt, nana toba tok puta ka Ʋttahpi yoke.

¹⁶ Yʋmmak atuk mak o̱ nana moma toba kʋt nana ʋba aiasha, micha yakni paknaka ai asha, nana ka pisa he, micha nana ka ik peso ka he, mi̱ko yohmá, nan i̱ shahli yokmá, hochitoka yokmá, nan ʋlhtoka yokmá, aiena mikmʋt nana moma kʋt yʋmmak atuk mak o̱ toba kʋt, yʋmmak ash o̱ in toba tok.

¹⁷ Yohmi ka yʋmmak ash osh nana moma ka in tikba yoke, mihma yʋmmak o̱ nana moma kʋt a takala he atok ʋt ont ai yʋmohmit isht ai it im ʋlhpesa hoke.

¹⁸ Yohmi ka yʋmmak osh chʋch haknip a̱ i̱ noshkobo yoke: yʋmmʋt nana moma ka ai in tikbʋt holitopa cha, ai isht ia ʋmmona illi tuk osh falamʋt tani ʋhleha ha̱ im Ʋttahpi yoke.

¹⁹ I̱ki ʋt ʋlhpesa ahni kʋt, yʋmmak ash o̱ nan isht ai ʋlhtaha yʋt afoyuka he, ahni tok:

²⁰ Yohmi kʋt ititaiyukhʋna issish a hlatapa tok pulla ho̱ it i̱ nanaiyʋichi ikbi cha, yʋmmak pulla ho̱ nana moma ka isht il ai i̱ kanʋcha hi ʋt ahni tok; yʋmmak pulla ho̱ nana yakni ai asha yokmá, nana ʋba yakni aiasha yokmá, nana kʋt yʋmohmi hoke.

²¹ Yohmi ka hʋchishno ʋt ti̱kba kamo ik ahalaio yosh nana ashʋchi toksʋlit hʋchim anukfila isht in tanampi atuk kia, himak ano hʋch il i̱ kanʋchi tuk oke,

²² Ilap haknip nipi illi kak o̱ himak ano hʋch il i̱ kanʋchi tuk; yʋmohmi hosh nan ai ashʋchi iksho, micha liteha a lapali iksho, micha anumpa nana kia hʋchi onʋtula he keyu ho̱ ilap a̱ itikba ya̱ hʋchi hilecha hi atok:

²³ Nan ai yimmika ya̱ a kʋllot nan anukfilli fitikʋchi iksho, micha nana ka yohma he ahni, ʋbanumpa a takali yʋmma hʋsh haiyaklo ma, yʋmmak ash ot okla moma shutik nuta aiasha ka im anuhumpa tuk a̱ hʋch ik i̱ filʋmmo ka chi̱ mak o̱, Pal sia hʋt ʋbanumpa isht ʋtta toba li tuk osh;

²⁴ Himak a̱ hʋchishno pulla kak o̱, nan isht a̱ palʋmmi puta kʋt sai yukpa hoke; micha Klaist ai ilbʋsha tok a̱ sa haknip isht sʋlbʋsha kʋt ik ono ki̱sha ka, haknip yʋmmʋt chʋch pulla kak oka, isht alotolit isht ma̱ha̱ya li hoke.

²⁵ Hʋchishno pulla ho̱ Chihowa hʋt nana ai ahnit ʋm apesa kʋt, Chihowa im anumpa mominchit isht anumpuli la he ak o̱ ʋbanumpa isht ʋtta si atokli tok.

²⁶ Anumpa yʋmmʋt nitak bilia kash, micha hatak cha̱shpo a̱sha ka in luma hatok kia, himak ano ʋbanumpa yimmi puta ka im otʋni yak oke.

²⁷ Yʋmmak ash o̱ Chihowa hʋt anumpa luma hatok ilʋppak ash isht a holitopa chinto kʋt Chentail ai itintakla otʋni kʋt kaniohmi ka im otʋnincha he ai ahni tok; yʋmmʋt Klaist hʋchi anukfoyuka a holitopa isha he isht ai ahni yoke.

²⁸ Yʋmma isht il anumpohonlit e hopoyuksa biekʋt, hatak moma kʋt ahah! ahna hi a̱ il im ahanchi mʋt, hatak moma ka il im abahanchi hoke; yʋmohmi hosh Chisʋs Klaist pulla hatuk mak o̱ hatak moma ka ai a̱hlichit e hilecha chi̱ hatuk.

²⁹ Yʋmmak a chi̱ mak osh ʋno ak kia imi hlampko isht sa hlampkohonchi fehna kak o̱ amosholit toksahanli li hoke.