Kaleshan 6 - Chahta Holisso Holitopa 1886

¹ Itibapishi li ʋhleha ma! hatak kʋna kia nan ai ashʋchi ka iba chukowa hokma, Shilombish anukfoyuka hʋchia hʋt, chu̱kʋsh isht i̱ nukha̱klot yʋmma chohmi kash falaminchit hʋsh hilechashke; hʋchishno kia nan ai ashʋchi hʋchi ai itula hinla kʋt, hʋsh il anukfihinlashke.

² Nana isht a hʋchi̱ weki puyuta ka hʋsh iti̱ shaiyalashke; yohmi hosh Klaist i̱ nan ʋlhpisa ya̱ hʋsh ai a̱hlichashke.

³ Hatak ʋt nana keyu kia, na sa fehna ahni hokmʋt, ilap inli hosh ile haksichi hoke.

⁴ Amba hatak puyuta kʋt ilap nan isht ai ʋtta yak o̱ yakohmi ahnit, pisashke; yʋmohmi hosh inla yo̱ ai yukpa keyut, ilap ak inli tuk ak osh nan isht il ai yuhu̱kpa chi̱ hoke.

⁵ Hatak puyuta kʋt ilap i̱ shahpo illa ho̱ shaiyala he oka.

⁶ Kʋna hosh ʋbanumpa ha̱ isht im ʋlbʋchi hokmʋt, nan im abʋchi yʋmmak ash nana hochukma puta ka it ibai eshashke.

⁷ Hʋchik ile haksecho kashke; Chihowa hʋt isht ik si yopulá, ahni keyu hoke; hatak ʋt nana ho̱ hokchi tuk mʋt, yʋmmak o̱ ʋma hi oke.

⁸ Kʋna hosh haknip ak o̱ i̱ hokchi hatuk okʋto, haknip ak o̱ isht okpula hi o̱ ʋma hi oke; amba kʋna hosh Shilombish ak o̱ i̱ hokchi hatuk okʋto, Shilombish ak o̱ ai okcha̱ya bilia yo̱ ʋma hi oke.

⁹ Yohmi kʋt nana achukma isht il ahanta kʋt ik pin takobo kashke; pi tikambi keyu hokmʋt, nitak ont ai ʋlhpiesakma, il ai ʋma hi okʋt.

¹⁰ Yohmi hoka hatak moma ka nana il im ai achukma la hi ʋt pin takalikmʋt, e yʋmihchikmʋt, na yimmi in chuka chʋfa ʋhleha yokak heno i̱ shahlichit il i̱ yʋmihchashke.

¹¹ Holisso chito kʋt, kaniohmi ho̱ ʋno sʋbbak ak inli ho̱ pit isht hʋchi̱ holissochi li tuk a̱ hopesá.

¹² Haknip ak o̱ isht otʋni achukma he ahni aiyukali hokʋto, hakshup tʋpa he ak o̱ hʋchim ahnishke; yʋmmak keyukmʋt Klaist ititaiyukhʋna ai illi pulla hatuk mak o̱ na palʋmmi pisa hinla kak illa kak osh yʋmohmi hoke.

¹³ Yohmi ka hakshup tʋpa ʋhleha ilap inli kak kia ʋba nan ʋlhpisa ya̱ holitobli keyu: yohmi kia hʋchi hakshup tʋpa he hʋchim ahni kʋt, hʋchi̱ haknip ak o̱ isht ilauata he ahni hoke.

¹⁴ Amba ʋno yokʋto isht ak ilauato pulla he, pin Chitokaka Chisʋs Klaist ititaiyukhʋna atakalit illi tok ak banashke: yʋmmak atuk pulla mak o̱ yakni ʋt ititaiyukhʋna ʋm ai illi, mikmʋt ʋno yʋt yakni a̱ im ai illi li hoke.

¹⁵ Klaist Chisʋs imma hokʋno hakshup tʋpa, micha hakshup tʋpa keyu aiena kʋt nana keyu, amba himonʋt toba ak illa hoke.

¹⁶ Laua kʋt kaniohmi hosh anumpa ʋlhpisa ilʋppak ash im antiʋt a̱ya, micha Chihowa im Islael aiena hokʋno isht i̱ nanaiya, micha isht i̱ nukha̱klo ita tuklo kʋt onʋtuyulashke.

¹⁷ Chitokaka Chisʋs pulla hatuk mak o̱ sa haknip a̱ na mi̱sa laua ka isht shaiyali li hoka; himak a pilla mʋnc hatak nana kia ik si ataklammo kashke.

¹⁸ Itibapishi li ʋhleha ma! pin Chitokaka Chisʋs Klaist isht i̱ kana yʋt hʋchimi shilombish a̱ anukfoyukashke. Amen.