Kaleshan 5 - Chahta Holisso Holitopa 1886

¹ Yʋmohmi hoka a yuka keyu ho̱ Klaist ʋt pisht ona tuk a̱ kʋllot hʋsh hielashke, micha anonti yuka ikunla im abana ilʋppa isht hʋch ik il onocho kashke.

² Yakeh! Pal sia hosh hakshup hʋchi tʋpa hokma, Klaist ʋt nan isht hʋchim ai achukma he keyu ka hʋchim achi lishke.

³ Anonti hatak moma kʋt hakshup tʋpa yʋmmak okʋto, nan ʋlhpisa moma ka yʋmihcha he aheka in takanli ka atokolit im anoli lishke.

⁴ Kʋna hʋchia hosh nan ʋlhpisa yak o̱ isht hʋchi ai ʋlhpiesa hokma, Klaist ʋt nana isht hʋchim ai achukma keyu; isht i̱ kana ya̱ i̱ filʋmmit hʋchi tula hoke.

⁵ Yohmi ka Shilombish pulla hatuk mak o̱ na yimmi hosh isht ai ʋlhpiesa hi a̱ il esha he ahnit, e ho̱ho̱yoshke.

⁶ Chisʋs Klaist imma hokʋno hakshup tʋpa yokmá, hakshup ik tapo yokmá, nana hoh kia nana a kanihma he keyu hoke; amba ai yimmi ka i̱ hullo isht atoba yak oke.

⁷ Ʋlhpesa hosh hʋsh maleli tuk; anumpa a̱hli ya̱ hʋch ik im antio ka chi̱ ka, kʋta hosh hʋchi ataklʋmmi tuk o̱?

⁸ Hʋchi anukfohki na ʋlhpesa hʋsh ahni ilʋppʋt hʋchi hoyo tok ak o̱ a minti keyu hoke.

⁹ Isht shatʋmmichi iskʋtinosi kia yʋmmʋska ya̱ mominchit shatʋmmichi chatuk oke.

¹⁰ Chitokaka pulla kak o̱ hʋchi̱ yimmi li kʋt, nana inla hʋch im anukfila he keyu ak oke; amba kʋna hatuk oh kia mihi yosh hʋchi anuktuklochikmʋt, nan ʋlhpisa yʋt onʋtula hi oke.

¹¹ Yohmi ka itibapishi li ʋhleha ma! ʋno yʋt hakshup tʋpa ya̱ isht anumpuli li moma hokak osh, nanta katiohmi ho̱ nan ilbʋsha yʋt si onʋtula moma cho? yʋmmak okma ititaiyukhʋna isht ai ibetʋbli ʋt yokopa hoke.

¹² Hʋchi anuktoklochi ʋhleha hatuk ʋt chʋch a a tʋpʋt kʋniakbano ahni lishke.

¹³ Itibapishi li ʋhleha ma! a yuka keyu yo̱ hʋch isht ona tuk oke; a yuka keyu yʋto haknip yukpali keyu, amba it i̱ hullot it apelahanchi yak oke.

¹⁴ Anumpa achʋfa ho̱ ʋba nan ʋlhpisa a moma kʋt isht ai a̱hli hoka; yʋmmʋt ilʋppak oke, Chin chuka panta hatak a̱ ish i̱ hullo kʋt chishno ak inli ho̱ chim itilauashke.

¹⁵ Amba iti koblit, ʋpʋt hʋsh ititahli hokmʋt, iti okpʋnit hʋch ik iti tahlo ka chi̱ kʋt, ahah! hʋsh ahnashke.

¹⁶ Yohmi ka Shilombish iba foyukʋt hʋsh a̱yashke; yohmi hokmʋto, haknip nan ahni okpulo ya̱ hʋch ik ai a̱hlecho ka chi̱ hoke.

¹⁷ Haknip nan ahni kʋt Shilombish a̱ im i̱ sanalikma, Shilombish nan ahni kʋt haknip a̱ im i̱ sanali hoke; micha ilʋppʋt it im inla hoke: yʋmohmi ho̱ nana yʋmihcha he hʋsh ahni kia hʋsh yʋmihcha he keyu hoke.

¹⁸ Amba Shilombish ak osh hʋch isht a̱ya hokma, nan ʋlhpisa ya̱ hʋsh i̱ nutaka keyu hoke.

¹⁹ Yʋmohmi ka haknip atoksʋli otʋni yʋmmʋt ilʋppak oke: Haui toba, itin luma̱ka, na liteha, haui anukfilli,

²⁰ Na holba aiokpʋchi, ikhi̱sh isht yushpakama, iti̱ nukkilli, itachowa, iti̱ shahshohlechi, anukhobela, iti̱ yichina, ita kʋshkoʋt nan ʋlhpisa i̱ sanali, ʋbanumpuli iksa iti̱ filamohli,

²¹ It i̱ potʋnno, hatak bi̱ka ʋbi, okishko shahli, okishkot tʋssahʋt a̱ya, micha yʋmma chohmi puta ka tikba ma hʋchim anoli li ak inli tok kia, himak a̱ atuklant hʋchim anoli li ka, ilʋppa yʋmihchi puta kʋt Chihowa im apehlichika yo̱ isha he ʋlhpesa keyu hoke.

²² Amba Shilombish o̱ isht ai ʋni hokʋto, I̱ hullo, nayukpa, it i̱ nanaiya, nuktaiyalʋt nokowa sʋlaha, anukfila yohbi, nana achukma yʋmohmi, na yimmi,

²³ Il aiokha bʋnna keyu, ahah! ahnit il oktampli; yʋmma chohmi ka onʋtonla kʋt nan ʋlhpisa yʋt ikshoshke.

²⁴ Yohmi ka kʋna hosh Klaist a̱ immi hokʋto haknip, micha haknip nan isht i̱ hullo, micha nan ai ahni okpulo ya̱ haknip ash aieninchit ititaiyukhʋna a takalichit illichi hoke.

²⁵ Shilombish ak o̱ il ai okcha̱ya hokmʋt, Shilombish a̱ iba foyukʋt il iba noho̱wa mak inlashke.

²⁶ Nana ik ahobo a holitopa ya̱ ahnit it i̱ nokowʋchit, it i̱ potʋnnot kiloh ai asho kashke.