Kaleshan 4 - Chahta Holisso Holitopa 1886

¹ Anonti ibai isha he ʋlhpesa kʋt, ʋlla moma hokʋto, nana moma kʋt immi hoh kia, yuka ha̱ nan isht inla keyu hoke, achi lishke.

² Amba kostininchi, micha apesʋchi ya̱ i̱ nuta kʋt ahanta na, i̱ki ʋt im apesa tok nitak a̱ ona chatuk oke.

³ Yʋmmak inli ho̱ chiyuhmit, pishno ak kia ʋlla pia momo mʋt, yakni nan ai ithʋna ai ishtia ʋmmona ya̱ i̱ nutakʋt yukʋt il a̱shwa tok.

⁴ Yohmi tok kia nitak ont ʋlhpesa kʋt ʋla ma, Chihowa yʋt Ushi ʋt pila na, nan ʋlhpisa i̱ nutaka toba hosh ohoyo ho̱ a toba tok.

⁵ Ʋba nan ʋlhpisa i̱ nutakʋt a̱sha tuk a̱ falaminchit pi chumpa na, Chihowa ushi ʋhleha e toba chi̱ hatok.

⁶ Yohmi tok a̱ ushi ʋhleha hʋchia hoka, Chihowa yʋt Ush imi Shilombish a̱ hʋchi chu̱kʋsh a̱ anukfohki na Abba I̱ki achit tahpahanla hoke.

⁷ Yʋmohmi hoka himak a pilla ka yuka chia keyu, amba ushi mak o̱ chia hoke; yohmi kʋt ushi chia hokmʋt, Klaist pulla hatuk mak o̱ Chihowa immi ha̱ ai isha he ʋlhpiesa chia hoke.

⁸ Yohmi kia tikba ma Chihowa hʋch ik ithano mʋt, chihowa nana keyu ka hʋsh i̱ yuka tok.

⁹ Yohmi tok kia, himak a̱ Chihowa ya̱ hʋsh ithana ha ya, yʋmmak keyukmʋt, Chihowa yak osh hʋch ithana ha ya, katiohmi ho̱ anonti nan ai ithana ai ishtia ʋmmona isht hlampka he keyu, micha isht ai yukpa he keyu ka falamʋt i̱ nutakʋt yuka hʋchi bʋnna cho?

¹⁰ Nitak il aiyuka, micha hʋshi talali, micha afʋmmi ʋlhpisa aiena ka hʋsh holitoblishke.

¹¹ Peh pilla ho̱ hʋchin toksʋlit isht a sʋlbʋsha tuk yoba ká ahnit, ahah! hʋchim ahni lishke.

¹² Itibapishi li ʋhleha ma! hʋchishno ak inli chohmi li hokʋt, ʋno ak o̱ hʋsh chohma chi̱ ka hʋchim asilhha lishke: nan ik ʋlhpeso hʋs sa̱ yʋmihchi tok keyu kʋmohmi hoke.

¹³ Ʋmmona hoka haknip ik hlampkot hoyubli hosh kaniohmit ʋbanumpa ha̱ hʋchin tosholi li tok a̱, hʋsh ithanʋshke.

¹⁴ Micha imomaka pisa li yʋt sa haknip a̱ afoyuka ka ik shitilemot hʋch ik sa kancho ki tok; amba Chihowa im enchil chohmichit, Klaist Chisʋs mak o̱, chohmichit hʋs sashi tok.

¹⁵ Yokmi kʋno nan isht aiyukpa ya̱ isht hʋsh anumpuli tok mʋto? hʋsh yʋmihcha hinla nana hokmʋt, hʋchi nishkin a̱ hʋsh kohchi cha, hʋs sʋma hinla tok a̱, atokowa hʋchim anoli lishke.

¹⁶ Yʋmohmi ka a̱hli ho̱ hʋchim anoli li kak osh hʋchin tʋnʋp o̱ toba li cho?

¹⁷ Hʋchi̱ hullo fehna ahoba kia ʋlhpesa keyu hoke; a̱hli, hʋchi ataklʋma he ahni na hʋch ik sa̱ hullo hosh, ilap ak o̱ hʋsh i̱ hulla chi̱ kak atok oke.

¹⁸ Yohmi kia nana achukma hokʋno i̱ hullo fehnʋt bilia kak o̱ ʋlhpesa hoke; micha hʋchi takla anta li kak bano keyu.

¹⁹ Ʋm ʋlla chipunta ʋhleha ma! ohoyo ʋlla esha chi̱ nukhʋmi ka a hʋchim a chohmi li tuk atok o̱ Klaist ʋt a hʋchi atobak mak a chi̱ hoke.

²⁰ Himak a̱ hʋchi takla anta lish, ʋm anumpa ha̱ inlanchi la he sa bʋnnʋshke; a hʋchi anukfilli la he ak ithanoshke.

²¹ Ʋba nan ʋlhpisa ya̱ i̱ nutaka hʋchi bʋnna kʋt, ʋba nan ʋlhpisa ya̱ hʋchik haklo ho̱? oh ʋm anolí

²² Holisso kʋt, Eblaham ʋt ushi ín tuklo tok; achʋfa kʋt ohoyo yuka yak o̱ ushi yokma, achʋfa kʋto ohoyo yuka keyu yak o̱ atok, achi hoka.

²³ Yohmi ka ohoyo yuka ushi yʋt haknip nana a kaniohmi chatuk a̱ chiyuhmi tok; amba ohoyo yuka keyu ushi ʋto im issa tok ak atok.

²⁴ Yʋmmʋt nan isht ʋlhpisa yoke: ilʋppʋt nan it im ʋlhpisa tuklo yoka; achʋfa kʋt nʋnih chaha Sainai a tobʋt yuka ikbichi, yʋmmʋt Akah yak oke.

²⁵ Akah ilʋppʋt nʋnih chaha Sainai yosh Alabia yak o̱ hikia hosh, Chelusalem ʋt himak a talaia ka isht ʋlhpisa hosh, im ʋlla puta ka il ai eshit yuka hoke.

²⁶ Amba Chelusalem ʋba yokʋto yuka keyu hosh, e moma ka hʋp ishkí yoke.

²⁷ Holisso kʋt, Ʋlla ik chim iksho, ʋlla ish eshi chatuk keyu ma! chi yukpashke; ʋlla esha chi̱ chi nukhʋmi chatuk keyu ma! chitolit ish tahpahanlashke; ohoyo ʋlhtakla ya tuk kia ʋlla in laua kʋt hatak im a̱sha tuk kak kia, i̱ shahli hokʋt, achi hoka.

²⁸ Yohmi ka itibapishi li ʋhleha ma! pishno ʋt Aisaak atok a̱, chohmit nan im issa tok ak o̱ im ʋlla pia hoke.

²⁹ Yohmi ka nitak yʋmma haknip o̱ kaniohmi chatuk a̱ chohmit ai ʋtta yʋt Shilombish ai ʋtta ya̱ ilbʋshali tok a̱, chohmit himak ak kia yʋmohmi hoke.

³⁰ Yʋmohmi ka Holisso Holitopa yʋt nan tuk achi ho̱? Ohoyo yuka, micha ushi ita tuklo ka kohchit ish kanchashke: ohoyo yuka ushi ʋt ohoyo yuka keyu ushi ya̱ nana ibai isha he ʋlhpesa keyu hoka.

³¹ Yʋmohmi hoka itibapishi li ʋhleha ma! ohoyo yuka im ʋlla pia keyu, amba ohoyo yuka keyu ak oke.