Kaleshan 3 - Chahta Holisso Holitopa 1886

¹ Im anukfila iksho Kalesan okla ma! hʋchi nishkin a pisa yo̱ Chisʋs Klaist ʋt ititaiyukhʋna atakalit illi tuk ʋt hʋchi tikba ya̱ ai anoho̱wa tok a̱, kʋta mak osh hʋchi yoshubli na ʋbanumpa a̱hli ya̱ hʋsh im antia he keyu cho?

² Ilʋppak illa ho̱ hʋchi ai ithʋna sa bʋnnʋshke; ʋba nan ʋlhpisa ya̱ hʋsh iakaiya kak osh Shilombish Holitopa ya̱ hʋsh ieshi tok oh cho? akchu? haklot hʋchi yimmi kak atuk o̱?

³ Hʋchim anukfila iksho fehna kʋt hʋsh yʋmohmi cho? Shilombish o̱ anukfoyukʋt isht hʋsh ia kash ot, himak ano haknip o̱ isht a hʋchi ʋlhtaha cho?

⁴ Nan laua ho̱ isht hʋchi ilbaiyasha ka peh pilla ha tok o̱? peh pilla keyu hatok pulla hoke.

⁵ Yʋmohmi ka Shilombish a̱ hʋch ima cha, hʋch itin takla ya̱ na fehna puta ka ai yʋmihchi kʋt, ʋba nan ʋlhpisa ya̱ hʋsh im antia tok ak o̱? akchu? ʋbanumpa haklot a hʋchi yimmi kak atuk o̱?

⁶ Yʋmmak inli ho̱ chiyuhmit Eblaham ʋt Chihowa ya̱ i̱ yimmi tok: mihmʋt nan isht ai yimmi kʋt ai ʋlhpiesa im ʋlhpisa tok.

⁷ Yʋmohmi ka hʋsh ithaiyanashke, yimmi puyuta yʋmmak okʋto Eblaham im ʋlla ʋhleha yoke.

⁸ Mihma Holisso Holitopa yʋt Chihowa yʋt ʋbanumpa ik ithano ya̱ na yimmi pulla kak o̱ isht ai ʋlhpiesacha hi a̱ tikbanli pisa kak osh, Eblaham a̱ ʋbanumpa ha̱ isht im anumpulit, Chishno ak o̱ okla moma kʋt na yukpa hi oke, achi tok.

⁹ Yʋmohmi hoka kʋna hosh yimmi yokʋto, mihi yosh na yimmi Eblaham a̱ iba ta̱klʋt na yukpa hoke.

¹⁰ Ʋba nan ʋlhpisa anukchieto aiyuka hokʋto, na hotopa anumpa hʋt onʋtonla bieka hoka: holisso kʋt, Kʋna kia ʋba nan ʋlhpisa holisso atakali puta ka achunanchit ik im antio aiyuka hokʋno, na hotopa anumpa hʋt onʋtuyula hoke achi hoka,

¹¹ Amba hatak kʋna kia Chihowa ai itikba yokʋno ʋba nan ʋlhpisa ya̱ isht ai ʋlhpiesa he keyu kʋt otʋnishke; Hatak ʋlhpesa yokʋto yimmi pulla kak osh isht ai okcha̱ya hi oka.

¹² Yohmi ka ʋba nan ʋlhpisa yʋt ai yimmi ka yokʋno ahalaia keyu, amba, Hatak ʋt yʋmma yʋmihchi hokʋto, yʋmmak o̱ isht ai okcha̱ya hi oke.

¹³ Klaist ʋt pi ʋlhtobʋt na hotopa onʋtula toba cha, ʋba nan ʋlhpisa isht a hotopa ya̱ a chumpʋt pi falaminchi tok; holisso kʋt, Kʋna kia iti a̱ atakalikmʋt, na hotopa anumpa hosh onʋtula hoke, achi hoke.

¹⁴ Yʋmohmi ho̱ Chisʋs Klaist pulla hatuk mak o̱ Eblaham nan isht aiyukpa yʋt Chentail a̱ onʋtula chi̱ hatok; yʋmohmi ho̱ pi yimmi pulla kak osh, Shilombish pim issa tok a̱ il isha chi̱ hatok.

¹⁵ Itibapishi li ʋhleha ma! hatak nana a kaniohmi yo̱ anumpuli lishke: peh hatak nana it im ʋlhpisa yoh kia kʋllochi hama, hatak kʋna hosh akshochi, micha ibafohka he keyu.

¹⁶ Yohmi ka Eblaham, micha im isht atiaka yak o̱ nan im ihi̱sa tok; Laua nana ho̱ ahobʋchit isht atiaka ʋhleha, achi keyu; amba achʋfa chohmichit, Chim isht atiaka yak o̱, achi yʋmmʋt Klaist ak oke.

¹⁷ Yohmi ka ilʋppak o̱ achi lishke, Nan itim ʋlhpisa Klaist isht anumpa yʋmma Chihowa yʋt kʋllochi ha ya, afʋmmi tahlepa ushta pokoli tuchina ha yo̱ ʋba nan ʋlhpisa toba tok ʋt akshocha he keyu, yohmi kʋt nan im issa tok a̱ ik ai a̱hlecho ka he atok keyu.

¹⁸ Ʋba nan ʋlhpisa im antia pulla kak o̱ nana ai isha he ʋlhpesa kʋt ai yʋmohmi hokma, nan im issa yak keyu hoka; yohmi kia Chihowa yʋt nan im issa tuk osh Eblaham a̱ ima tok.

¹⁹ Yohmi ka ʋba nan ʋlhpisa yʋt nanta ho̱ katiohmichi hatok oh cho? Nan ʋlhpisa kobʋffi pulla kak o̱ ʋlhpisa tok o̱, isht atiaka yʋmma nana im ihi̱sa tok ʋt ʋlak mak a he ʋlhpisa tok; yohmi ka enchil ʋhleha hosh iti takla hikiʋt tosholi ya̱ i̱ nutaka hosh nan ʋlhpisa ya̱ anolit haiakʋchi tok.

²⁰ Yohmi ka ititakla hikiʋt tosholi ʋt achʋfa ho̱ ititakla hikiʋt tosholi chatuk keyu, amba Chihowa yʋto achʋfa hoke.

²¹ Yohmi kʋno nan ʋlhpisa yʋt Chihowa nan isht im issa tok a̱ i̱ sanali cho? ik yʋmohmo pullashke; nan ʋlhpisa ima tok intonla kʋt okchalincha hinla hokma, nan ʋlhpisa pulla kak o̱ isht ai ʋlhpiesa hi atok o̱ mʋhlishke.

²² Holisso Holitopa yʋt moma ka nan ai ashʋchi i̱ nutakʋchit ompohomo hoke; yohmi ho̱ Chisʋs Klaist i̱ yimmi pulla ho̱ nan ai yukpa im issa tok a̱ kʋna hosh i̱ yimmikmʋt isha hi atok.

²³ Yohmi kia ai yimmi ka yʋt ik lo ki̱sha ma, ʋba nan ʋlhpisa ya̱ il i̱ nutakʋt il ai ashʋt, ai yimmi ka yʋt himmak o̱ haiaka he yak o̱ il anukchieta hi a̱ pi atoblichi tok.

²⁴ Yʋmohmi ka ʋba nan ʋlhpisa yʋt pi kostininchi yosh Klaist a̱ pisht im ona na, na yimmi pulla hosh isht ai ʋlhpiesa hi atok.

²⁵ Yohmi tok kia ai yimmi ka yʋt ai ʋla ha yokʋno, kostininchi ya̱ il i̱ nuktaka keyu hoke.

²⁶ Klaist Chisʋs a̱ i̱ yimmi pulla hosh hʋsh moma kʋt Chihowa im ʋlla hʋchia hokʋt.

²⁷ Klaist a̱ ishit hohchifot hʋchi baptismo tok aiyuka hokʋto, Klaist a̱ isht hʋsh foyuka hoke.

²⁸ Chu okmá, Klik okmá, nana kʋt iksho; yuka yokmá, yuka keyu yokmá, nana kʋt iksho; nakni okmá, ohoyo hokmá nana kʋt iksho, amba hʋsh moyuma kʋt achʋfʋt Klaist Chisʋs a̱ hʋsh ibafoyuka hoke.

²⁹ Yohmi kʋt Klaist a̱ immi hʋchia hokmʋt, Eblaham isht atiaka hʋchia, micha nan im issa tok a̱ ai isha he ʋlhpesa hʋchia hoke.