Kaleshan 2 - Chahta Holisso Holitopa 1886

¹ Yohmi tok a̱ i̱ himmak afʋmmi auah ushta ma anonti ʋno, Banabas ita, tuklot Titʋs a̱ ilauinlit Cheluselem a̱ il ia tok.

² Yohmi ka Chihowa yak osh ʋm otʋninchi na ona lish, ʋbanumpa Chentail ʋhleha ha̱ isht im anumpohonli li tuk ʋt isht im anumpuli li tok; yohmi kia ʋbanumpa tosholit a̱ya li tuk a̱ peh pilla ná, anonti himmakma ʋbanumpa tosholit a̱ya li kia peh pilla ná, ahni li hatuk osh luma hosh hatak annoa achukma kak o̱ im anumpuli li tok.

³ Yohmi ka Titʋs ʋt si awant a̱ya tuk ʋt, Klik atuk o̱, hakshuk tʋpa he i̱ mihi̱ha kia, ik yʋmohmo ki tok.

⁴ Yohmi ka yʋmmʋt itibapishi ik a̱hlo takla iba chukowa kʋt, Klaist Chisʋs puyulla ho̱ a yuka keyut il aha̱shwa ka pim akostinincha chi̱ hosh lumʋt piba chukowa tok; yohmi kʋt falaminchit pi yukacha chi̱ hatok; yohmi tuk kia ik yohmo ki tok oke.

⁵ Ʋbanumpa a̱hli yʋt hʋchin tonla chi̱ kak o̱, yʋmmak ash o̱ hʋshi kanʋlli achʋfa kia i̱ nutakʋt il a kanʋlli tok keyu.

⁶ Amba, kʋna hosh holitompa ʋhleha ahoba kʋt, nana ho̱ kaniohmi yoh kia, yʋmmak okʋto nan isht ʋm a kaniohmi keyu; Chihowa yʋt hatak a̱ nashuka yak o̱ pisa keyu; holitompa ahoba yʋmmak ash o̱ it im anumpuli li tok a̱ nana isht a̱bafohki tok keyu.

⁷ Amba hakshup ik tapo ʋbanumpa in tosholi la hi ʋt si ʋlhtoka ma, hakshup tʋpa ʋbanumpa in toshola hi ʋt Pita ak osh ʋlhtoka tok a̱ pisa mʋt;

⁸ Pita ya̱ hakshup tʋpa ʋbanumpa in toshola he atokoli tok mak osh ʋbanumpa isht ai a̱hlichi tok, anonti mih mak inli hosh ʋbanumpa Chentail a̱ in tosholi li ka isht ai a̱hlichi tok oka.

⁹ Yohmi ka Chemis, Sefas, micha Chan aiena kʋt pehlichika yo̱ ahoba hatuk osh isht i̱ kana ʋma tok a̱ pisa mʋt, ʋno, micha Banabas, il ita tuklo kʋt il iba holhtina chi̱ kak o̱, ibbak isht impakimma ya̱ pima tok; yohmikma ʋbanumpa ik ithano yak o̱ im anumpulit il iakma, ilap ʋt hakshup tʋpa ʋbanumpa in toshola chi̱ hatok.

¹⁰ Ilbʋsha ma il ithana he pim ahni tok; yʋmmak okʋno ʋno ak kia aiokpanchit achunanchi li tok.

¹¹ Yʋmohmi tok kia Pita yʋt Antiak a̱ ant anta ma, atokowʋt im asanali li tok, nan ik ʋlhpeso yohmi tok ak oka.

¹² Chemis ʋt tohno tok a̱ ik lo ki̱sha kano, Pita yʋt Chentail a̱ ibai impa tok; yohmi tok kia ai ʋla ma, hakshup tʋpa ya̱ i̱ nukshopa hatuk osh, kohchʋt il a filʋmmi tok.

¹³ Mihma Chu inla ak kia nan il ahobi tok; yohmi kak o̱ Banabas ak kia nan il ahobi ka iba taklʋt yʋmohmi tok.

¹⁴ Yohmi kia yohmit ʋbanumpa ieshit ai ʋlhpiesʋt itʋnoho̱wa keyu ho̱ pisa li mʋt, momʋt ha̱klo ho̱, Pita ya̱, Chishno ʋt Chu chia hoh kia, Chentail nana a kaniohmi ka ish yʋmohmi cha, Chu nana a kaniohmi ka chik yʋmohmo ho kak osh, nanta katiohmi ho̱ Chentail ʋt Chu chohmit ahanta he ish im ahni cho? im achi li tok.

¹⁵ Pishno ʋt Chu yosh il ʋtta tok, yohmi kʋt Chentail nan ashʋchi pia keyu,

¹⁶ Hatak ʋt ʋba nan ʋlhpisa iakaiya kak osh isht ai ʋlhpiesa keyu, amba Chisʋs Klaist i̱ yimmi hok mak osh isht ai ʋlhpiesa ka ithaiyana hosh, ʋba nan ʋlhpisa yak o̱ keyu, amba Klaist i̱ yimmi mak o̱ isht a pi ʋlhpiesa chi̱ kʋt, Chisʋs Klaist il i̱ yimmi tok; ʋba nan ʋlhpisa iakaiya hokʋno hatak nana hosh isht ai ʋlhpiesa he keyu hoka.

¹⁷ Yohmi ka Klaist ak o̱ isht ai ʋlhpiesa pi bʋnna hokʋto, pishno ʋt nana ashʋchi pia moma hatuk ʋt otaiyani; yohmi ka Klaist ʋt nan ai ashʋchi in tishu ho̱? ik yʋmohmo pullashke.

¹⁸ Nana ka okpʋni li tukʋt anonti ikbi likmʋt, nan ʋlhpisa kobʋffi toba li hoke.

¹⁹ Ʋba nan ʋlhpisa pulla ho̱ ʋba nan ʋlhpisa ya̱ im illi li kʋt, Chihowa yak o̱ ai okcha̱ya la he atok.

²⁰ Klaist a̱ ititaiyukhʋna iba takalit sʋlli hoke: yohmi kia si okcha̱ya hoke; yohmi kʋt ʋno ak o̱ keyu, amba Klaist ak osh okcha̱yʋt sa foyuka hoke; himak a̱ okcha̱yʋt haknip a halaia li moma hokʋto, Chihowa Ushi, yʋmmʋt a̱ hullot si ʋlhtobʋt illi tok a̱ i̱ yimmi li hosh si okcha̱ya hoke.

²¹ Chihowa nan isht i̱ kana ya̱ akshuchi li keyu; nan isht ai ʋlhpiesa hʋt ʋba nan ʋlhpisa yak o̱ isht atoba, yʋmmak okmʋno Klaist ʋt pilla illi tok.