Kaleshan 1 - Chahta Holisso Holitopa 1886

Hatak keyu, amba Chihowa pulla hosh ʋbanumpa isht anumpula chi̱ ka atokoli tok a̱ Pal ʋt achi, 1: 6 Kaleshan ʋbanumpuli ʋt chekosi ʋbanumpa ha̱ i̱ filami kak o̱ okokko! ahnit miha; 11 hatak o̱ keyu, amba Chihowa yo̱ ʋbanumpa ha̱ im ai ithʋna; 14 nana ka ik ʋlhtoko ki̱sha kʋt hatak kaniohmi hatuk ʋt anoli, 17 yʋmmak atuk ʋt ont i̱ himmak o̱ im anukfila kaniohmi kʋt anoli.

¹ Pal apostel sia kʋt hatak kaniohmi ho̱ nan a si ʋlhtoka tok keyu, mikmʋt hatak nan ahni hatok keyu, Chisʋs Klaist, micha I̱ki Chihowa, yʋmmʋt illi tok a̱ falaminchit tanichi tok ita tuklo kak atok:

² Yohmi ka itibapishi li ʋhleha si apehʋt ma̱ya kʋt, momʋt chʋch Kaleshan yakni hiohli ka pit hʋchi aiokpʋchi lishke.

³ I̱ki Chihowa, micha hʋpin Chitokaka Chisʋs Klaist ita tuklo nan isht i̱ kana, micha isht it i̱ nanaiya ita tuklo kʋt hʋchi anukfoyukashke.

⁴ Yʋmmak okʋt Pi̱ki Chihowa nan ahni tok mak o̱ yakni ik achukmo ilʋppa a pi a hlakoficha chi̱ hosh, nan il aiashʋchi pulla kak o̱ yʋmmak okʋt il im issa tok.

⁵ Chihowa Pi̱ki yʋmmak osh holitopʋt bilia cha biliashke. Amen.

⁶ Chekosi fehna ho̱ Klaist isht i̱ kana isht hʋchi hoho̱yo tok a̱ i̱ filʋmmit, ʋbanumpa inla yo̱ hʋsh eshi ka, okokko! ahni lishke.

⁷ Yʋmmʋt ʋbanumpa keyu; amba kanimi kʋt hʋchi anuktuklochi cha, Klaist im ʋbanumpa ha̱ shanaiyʋchi bʋnna kʋt a̱shʋshke.

⁸ Yohmi kia pishno, keyukmʋt ʋba yakni enchil ak okmá nana hosh ʋbanumpa inla isht e hʋchim anumpohonli tuk a̱ keyu ho̱ isht anumpulikmʋt, okpulot taha he ik im ʋlhpisá.

⁹ Tikba ka e hʋchim achi tok a̱, anonti himak a̱ mih mak inli ho̱ hʋchim achi lishke; Hatak nana kia ʋbanumpa hʋsh eshi tok a̱ inla yo̱ isht anumpulikmʋt, okpulot taha he ik im ʋlhpisá.

¹⁰ Himak a̱ hatak ak osh, keyukmʋt Chihowa ak osh a̱ kana he ahni li cho? hatak o̱ yukpali sa bʋnna ho̱? hatak ak o̱ yukpali li momakmʋt, Klaist in tishu sia ha he keyu hokʋt.

¹¹ Amba itibapishi li ʋhleha ma! hatak nan ahni keyu ho̱ ʋbanumpa isht anumpohonli li tuk ʋt hʋch ithʋnanchi lishke.

¹² Hatak o̱ im ai ishi li tuk keyu, micha im ai ithʋna li tuk keyu hokʋt; amba Chisʋs Klaist ak osh ʋm otʋninchi hatuk.

¹³ Nitak cha̱shpo ma kaniohmit Chu okla im ʋbanumpa anukfoyukʋt a̱yʋt, atablichit Chihowa in chʋch a̱ ilbʋshalit, chukilissʋchi li;

¹⁴ Yohmi kʋt Chu im ʋbanumpa ithʋna li kʋt, ʋm okla achʋfa ai itilaui li laua ka i̱ shaiyahlit, an tikba ʋhleha im anumpa ʋlhpisa ik holisso atok a̱ amosholi li fehnʋt im antia li tok a̱, hʋsh ha̱klo tuk oka.

¹⁵ Yohmi tok kia Chihowa yʋmmak osh hʋshki im oshʋto ya̱ ai ishit sa kohchi cha, isht i̱ kana isht sa hoyo tok,

¹⁶ Yohmi kʋt ʋlhpesa ahni cha, Ushi ya̱ si ai otʋninchi kʋt, ʋbanumpa ik ithano ʋhleha ha̱ ʋbanumpa isht im anumpohonli la chi̱ ak atok; yohmi mak inli ho̱ hatak nana kia it im anumpuli li tok keyu.

¹⁷ Mihmʋt Cheluselem a̱ iʋt apostel ʋhleha sa ti̱kba tok a̱ ont pisa li tok keyu; amba Alabia yak o̱ ona li tok osh, anonti falamʋt Tamaskʋs a̱ ona li tok.

¹⁸ Atuk osh afʋmmi tuchina ma Pita ya̱ pist ia hosh Cheluselem a̱ ona li tok; mihmʋt ibai anta li̱ nitak auah tahlapi tok.

¹⁹ Yohmi kia apostel ʋhleha inla yano ak peso, Chemis Chitokaka itibapishi ak illa tok.

²⁰ Chihowa itikba yo̱ hikiʋt nana puta hʋch i̱ holissochi li kʋt, holabi li keyu ka ho pesá.

²¹ I̱ himmak o̱ Silia, micha Silisia foka ka ona li tok.

²² Micha Chutia chʋch puta Klaist ibafoyuka yʋt sa nashuka ya̱ ik peso ki̱sha tuk atok.

²³ Amba cha̱shpo ka pilbʋshali tok yʋmmak ash ot himak ano ai yimmi ka ti̱kba ka okpʋni tok ʋt isht anumpohonli ka ha̱klo kak illa tok.

²⁴ Micha ʋno ak atuk mak o̱ Chihowa ya̱ holitobli tok.