Heblu 9 - Chahta Holisso Holitopa 1886

Ʋba nan‐ʋlhpisa yokʋto issish a̱ hlatahampla hi a̱ im apesa 1; 11 amba Klaist ʋt ilap issish, micha ilap fehna isht a hlakofa hi o̱ ile kanchi tok ʋt mihi yosh holitopa fehna: 15 nan ʋlhpisa himona ai a̱hlichi hosh Klaist ʋt illa he ʋlhpiesa hatok.

¹ Yohmi ka nan it im ʋlhpisa ʋmmona yʋmmak ash ot Chihowa aiokpʋchi nan isht ʋlhpisa puta, micha aholito pa yakni ilʋppa ahala̱iya aiena ka i̱shi tok ʋt ai a̱hlishke.

² Yohmi ka ʋlhtipo yokʋt toba tok: ʋmmona yʋmma anu̱kaka yak o̱ pʋla ai o̱ hikia, micha ai impa, micha pʋska otʋni aiena kʋt a̱sha beka tok, yʋmmak osh aholitopa hohchifo hoke.

³ Mihma nan‐tʋnna isht ompoholmo ʋba takali atukla mish a̱sha ka, ʋlhtipo yokʋto aholitopa moma i̱ shahli hohchifo hoke:

⁴ Yʋmmak oka anu̱kaka ya̱ na balama aluachi tʋli holisso lakna isht toba, micha nan it im ʋlhpisa yash im itombi yokʋt tʋli holisso lakna yosh isht ompoholmot apakfoyupa, yʋmmak o̱ tʋli holisso lakna nan ai ʋlhto manna yosh ʋlhto, micha Alon in tʋbi yʋt bikobli tok, micha tʋli patʋssa tuklo nan it im ʋlhpisa yʋt ai o̱ holihi̱so tok aiena kʋt foyuka hosh taloha tok:

⁵ Mihma paknaka ya̱ Chelubim holitopa ʋhleha hʋt isht ai i̱ kana ai o̱ binili ya̱ o̱ hoshontikahanchi tok, yʋmmak oka himonasi ka achʋfa aiyukʋt isht il anumpula he keyushke.

⁶ Yohmi ka nana puta kʋt yakohmit ʋlhtaiyaha ha yak o̱, na holitompa isht ʋtta yak osh ʋlhtipo ʋmmona anu̱kaka yak o̱ chukowʋt, Chihowa aiokpʋchit a hlopulli beka tok:

⁷ Amba atukla hokʋno na holitompa isht ʋtta chinto kak osh ilap bano hosh afʋmmikma himonna ho̱ chukowa kʋt, issish ik esho keyu hosh yʋmmak o̱ ilap nan ai ashʋchi, micha okla nan ai ashʋchi aiena ka isht ʋlhtoba mak o̱ pit im issa beka tok:

⁸ Shilombish Holitopa yak osh ʋlhtipo ʋmmona yash ot hikia imoma hokʋno, aholitopa moma i̱ shahli anu̱kaka a chukowa yokʋt ik otano ki̱sha ho̱ ilʋppak o̱ otʋninchi tok:

⁹ Yʋmmak osh nitak yʋmmak fehna ka nan isht ʋlhpisa hatok; yʋmmak ash o̱ na hʋlbina, micha nan ai ashʋchi isht ʋlhtoba ita tuklo ka im ihi̱sa tok: yohmi ka yʋmma isht ahanta hokʋno yʋmmak okʋt nan isht il akostininchi imma hokʋno nuktʋla ai a̱hli yo̱ im ikba he keyu hatok.

¹⁰ Yʋmmak okʋt nan ilhpak, micha nan ishko puta, micha il achifa ilaiyuka, micha haknip imma nan isht ʋlhpisa puta aiena kak illa hosh im ʋlhpihi̱sa na nan ai ʋlhpesa nitak ʋt ʋla hi atok.

¹¹ Amba Klaist ʋt ʋla hokʋt ʋlhtipo chito, micha ʋlhtaha achukma kʋt i̱ shahli, ibbak isht a toba keyu, yʋmma achi kʋt nan toba ilʋppak o̱ chohmi keyu, na holitompa isht ʋtta chinto hosh nana achukma ʋla chi̱ puta ka isht ahanta kʋt;

¹² Issi kosoma, micha wak ushi issish o̱ keyu, amba ilap im issish ak inli ho̱ isht a pi ʋlhtombʋt bilia ya̱ isht a pim ataiyahli ha yosh, aholitopa yoka himonna achʋfa chukowa tok.

¹³ Yohmi ka wak nakni, micha issi kosoma issish, micha wak tek himita hullushmi hituk chubbi ya̱ ik kashofo ka ai o̱ fimimpa kak osh kanimihchit haknip a̱ kashofi hatok okma;

¹⁴ Shilombish okcha̱yʋt bilia anukfo̱ka pulla hatuk osh isht ik ai ono kia iksho hosh Klaist ʋt Chihowa yoka pit il im issa tok; yʋmma im issish okak heto i̱ shahlichi fehna hosh nan a kaniohmit isht ai illi ya̱ a hʋchi filʋmmichit, isht hʋsh il akostininchi yoka hʋchi̱ kashofichi na Chihowa okcha̱ya yoka hʋsh holitobla hinla hoke.

¹⁵ Yohmi ka yʋmmak okʋt nan it im ʋlhpisa ʋmmona nuta ai ashʋt nan ai ashahanchi tok ʋt isht ʋlhtoba chi̱ mak o̱, illi pulla hatuk mak osh nan it im ʋlhpisa himona yoka ai a̱hlichi toba ho̱, im annoho̱wa tok puta hokʋt ai okcha̱yʋt bilia isha he im ai ʋlhpiesa im ihi̱sa tok a̱ isha hi atok.

¹⁶ Nan it im ʋlhpisa yʋt tobakma, nan it im ʋlhpisa isht ai a̱hli kʋt illi kak o̱ pulla chatuk mak inlishke.

¹⁷ Yohmi ka nan it im ʋlhpisa isht ai a̱hli yash osh ok cha̱ya imoma hokʋno isht ik ai a̱hlo kamohmi, amba illi ha yak o̱ isht ai a̱hli chatuk oke.

¹⁸ Yʋmohmi hoka nan it im ʋlhpisa ʋmmona hokʋt issish iksho ho̱ isht ai a̱hli tok keyu hoke.

¹⁹ Yohmi ka Moses okʋt ʋba nan ʋlhpisa yʋt nana apihi̱sa ka mominchit okla puta ka isht im anumpohonlit taiyahli mʋt, wak ushi, micha issi kosoma ushi issish ita tuklo, oka kapʋssa, micha chukfi hishi humma, micha hissop aiena ho̱ ieshi cha, holisso, micha okla moma aieninchit isht o̱ fimmi mʋt,

²⁰ Ilʋppak osh nan it im ʋlhpisa issish mak o̱ Chihowa yokʋt hʋchim apihi̱sa tuk oke, achi tok.

²¹ Anonti yʋmmak ash ot ʋlhtipo, micha Chihowa isht aiokpʋchi ai‐ʋlhto aiena ka issish isht o̱ fimmi mak inli tok.

²² Yohmi ka ʋba nan ʋlhpisa yak atuk pulla mak o̱ nan oklu̱ha kʋt moma chohmit issish isht a kashofa hoke; micha issish hlatahampa keyu hokʋno nan ai ashʋchika isht a kashofa iksho hoke.

²³ Yohmi hoka nana ʋba ai asha puta ka isht ʋlhpisa puta kʋt ilʋppak ash o̱ isht a kashofa hi atuk; amba nana ʋba ai asha yʋmmak oka nan ai ashʋchika isht ʋlhtoba achukma kʋt ilʋppak ash o̱ i̱ shahli ho̱ isht a kashofa hi atuk oke.

²⁴ Yohmi ka Chisʋs ʋt aholitopa puta ibbak isht a toba, yʋmmak o̱ ai a̱hli fehna ka isht ʋlhpisa hatok ak o̱ chukowa tok keyu; amba pishno ak atuk pulla mak o̱ Chihowa itikba ya̱ himonasi kʋno ai otaiyana chi̱ kak osh ʋba yakni fehna ka chukowa tok:

²⁵ Na holitompa isht ʋtta chinto yokʋto aholitopa yoka afʋmmikma in issish o̱ isht chukowa beka tok, chiyuhmit himonna̱ ilap ash il im issa hi atok keyu hoke:

²⁶ Yohmi tok okma, yakni intolahpi toba ʋmmona tok ta̱kla ka himonna̱ ihinla hi atok pulla; amba himonasi kʋno himonna achʋfa ho̱ yakni ont ishtaiyopi yak o̱ ant ai otaiyani kʋt, nan ai ashʋchi isht kanchi mak osh ilap il im issa hosh illi tok.

²⁷ Yohmi ka hatak puta kʋt himonna ho̱ illa hi ʋt im ʋlhpihi̱sa tok; amba misha pilla hokʋno nan im ʋlhpisa nitak osh ʋla hi oke:

²⁸ Yʋmma chiyuhmit Klaist ak kia la̱wa nan im ai ashʋchi isht kancha chi̱ mak osh himonna ma il im issa tok: yohmi kʋt yʋmma hoho̱yo ʋhleha hokʋno nan ai ashʋchi ik im iksho hosh atukla okchalincha chi̱ hosh otaiyana hi oke.